ક્રિકેટ / ઘેર પહોંચતાં જ પાકિસ્તાની ટીમમાં ભૂકંપ, વર્લ્ડ કપ બેઈજ્જતી બાદ આ દિગ્ગજનું રાજીનામું, બાબર આઝમની પણ ચર્ચા

• વર્લ્ડ કપમાં કારમી પછડાટ બાદ પાકિસ્તાન ટીમમાં ભાગમભાગ
• બોલિંગ કોચ મોર્ની મોર્કેલે રાજીનામું આપ્યું 
• ચીફ સિલેક્ટર ઈન્ઝમામ ઉલ હક પણ રાજીનામું આપી ચૂક્યું છે
• હવે બાબર આઝમના રાજીનામાની ચર્ચા 

વર્લ્ડ કપમાં કારમી પછડાટ ખાઈને ઘરભેગી થયેલી પાકિસ્તાન ટીમને ત્યાં પહોંચતાં જ આંચકો લાગ્યો છે. વર્લ્ડ કપમાં ટીમના ભારે ધબડકા બાદ પાકિસ્તાન ટીમના બોલિંગ કોચ મોર્ની મોર્કેલે પોતાના પદ પરથી રાજીનામું આપી દીધું છે. પાકિસ્તાન ક્રિકેટ બોર્ડે કહ્યું છે કે, તેઓ ટૂંક સમયમાં જ ટીમના નવા બોલિંગ કોચની જાહેરાત કરશે.

Morne Morkel resigns as Pakistan bowling coach

Details here ⤵️ https://t.co/El3BgWVbjh

— PCB Media (@TheRealPCBMedia) November 13, 2023

કોણ છે મોર્ની મર્કેલ 
સાઉથ આફ્રિકાના ભૂતપૂર્વ ફાસ્ટ બોલર મોર્કેલને 6 મહિના માટે પાકિસ્તાનની ટીમના બોલિંગ કોચ બનાવાયા હતા. તેમણે આ વર્ષે જૂનમાં આ પદ સંભાળ્યું હતું. તેમના કોચિંગમાં પાકિસ્તાનની ટીમે શ્રીલંકા પ્રવાસ પર પોતાની પ્રથમ ટેસ્ટ શ્રેણી રમી હતી.

બાબર આઝમ પણ રાજીનામું આપે તેવી શક્યતા 
થોડા સમય પહેલા પાકિસ્તાન ક્રિકેટ ટીમના ચીફ સિલેક્ટર ઈન્ઝમામ ઉલ હકે પણ પોતાના પદ પરથી રાજીનામું આપી દીધું છે. હારૂન રાશિદે પદ છોડ્યા બાદ 53 વર્ષીય ઈન્ઝમામ ઉલ હકને આ વર્ષે ઓગસ્ટ મહિનામાં પીસીબીના ચીફ સિલેક્ટર બનાવવામાં આવ્યા હતા. જોકે તેમને હજુ પદે પર પહોંચ્યાંના 3 મહિના થયા હતા કે તેમણે પણ રાજીનામું આપવું પડ્યું હતું. મીડિયા રિપોર્ટ્સ અનુસાર આ બંને રાજીનામા બાદ બાબર આઝમ પણ જલ્દી કેપ્ટનશિપમાંથી રાજીનામું આપી શકે છે. બાબર પણ તેના બોર્ડના વલણથી ખુશ નથી.

પાકિસ્તાન બે ભાગમાં ઘેર ગઈ 
પાકિસ્તાનની ટીમ બે ભાગમાં ઘેર જવા રવાના થઈ છે. પ્રથમ બેચમાં 12 નવેમ્બરે સવારે 8.55 વાગ્યે 11 ખેલાડીઓ રવાના થયા હતા. બાકીના ખેલાડીઓ તે જ દિવસે રાત્રે 8:20 વાગ્યે રવાના થયા હતા. તમામ ખેલાડીઓએ કોલકાતાથી ફ્લાઇટ પકડી હતી. બધા યુએઈ થઈને ઘરે પહોંચ્યા હતા. ફાસ્ટ બોલર હસન અલી હાલ પૂરતો ભારતમાં જ રહેશે કારણ કે ભારત તેનું સાસરું છે. તે 22 નવેમ્બરે ઘેર જવા રવાના થશે. પાકિસ્તાનના કોચ મિકી આર્થર 13થી 16 નવેમ્બર દરમિયાન યુએઈમાં રોકાશે. ત્યારબાદ 16 નવેમ્બરે લાહોર જવા રવાના થશે.