વાવાઝોડુ / મોચાએ તબાહી મચાવી હવે પડ્યું નબળું, હજારો લોકોને ઘર વિહોણા કર્યા, 3ના લીધા જીવ અનેક વૃક્ષો ધરાશાયી

• મોચા વાવાઝોડુ બાંગ્લાદેશ-મ્યાનમાર તટ સાથે ટકરાયું
• અતિભારે વરસાદને કારણે અનેક ઘર ધરાશાયી
• ત્રણ લોકોએ જીવ ગુમાવ્યો

બંગાળની ખાડીથી ઉત્પન્ન થયેલ વાવાઝોડુ મોચા રવિવારના રોજ બાંગ્લાદેશ-મ્યાનમાર તટ સાથે ટકરાયું હતું. આ તોફાનને કારણે બાંગ્લાદેશ અને મ્યાનમારમાં ભયંકર તબાહી મચી ગઈ છે. ભારે પવન અને અતિભારે વરસાદને કારણે અનેક ઘર ધરાશાયી થયા છે. ઉપરાંત મોટી સંખ્યામાં ઝાડ પણ ધરાશાયી થયા છે, તો ત્રણ લોકોએ જીવ ગુમાવ્યો છે. મોચા વાવાઝોડાની સૌથી વધુ અસર મ્યાનમારના રખીન પ્રાંતમાં જોવા મળી હતી. અતિભારે વરસાદને કારણે રસ્તાઓએ નદીઓનું રૂપ લીધેલ છે. 

હવામાન વિભાગ અનુસાર મોચા વાવાઝોડુ મ્યાનમારમાં નબળુ પડી ગયું છે. રવિવારે રાત્રે અંદાજે બપોરે 2 વાગ્યે વાવાઝોડુ મ્યાનમાર તટ સાથે અને બાંગ્લાદેશમાં કોક્સ બજાર તટ સાથે ટકરાયું હતું. તોફાન આવ્યા પહેલા મ્યાનમારમાં અનેક લોકોને સ્થળાંતરિત કરવામાં આવ્યા હતા, તો અનેક લોકોએ શાળામાં શરણ લીધી હતી. મ્યાનમારથી સામે આવેલ વિડીયોમાં જોઈ શકાય છે કે, રસ્તાઓ અને ગલીઓ પર પાણીની નદી વહી રહી છે અને ઘર તથા ઝાડ ધરાશાયી થયા છે. 

Storm surges whipped up by a powerful cyclone moving inland from the Bay of Bengal inundated the Myanmar port city of Sittwe https://t.co/YG8TOBMG0X pic.twitter.com/li37p4HiRa

— Reuters (@Reuters) May 14, 2023

બાંગ્લાદેશમાં આવેલ મોચા વાવાઝોડુ બે દાયકાનું સૌથી શક્તિશાળી તોફાન હોઈ શકે છે. દક્ષિણ પશ્ચિમ બંગાળના તટીય વિસ્તારોમાં પણ NDRFની ટીમ તહેનાત કરવામાં આવી હતી. મ્યાનમારના સિતવે વિસ્તારમાં તોફાનને કારણે વીજળી અને ઈન્ટરનેટ સેવા ઠપ્પ થઈ ગયેલ છે. સ્થાનિક મીડિયા અનુસાર મ્યાનમારની સૈન્ય સરકાર લોકોની દવા, ભોજન અને કરિયાણાની વ્યવસ્થા કરી રહી છે. 

પશ્ચિમ બંગાળમાં પણ આપત્તિ વ્યવસ્થાપનના જવાનોને તટીય વિસ્તારોમાં તહેનાત કરવામાં આવ્યા હતા. બીચ પર જવા માટે પ્રતિબંધ મુકવામાં આવ્યો હતો. દિઘા અને માંદરમની વિસ્તારની સાથે સાથે બક્ખાલી અને સુંદરબન વિસ્તારમાં એલર્ટ જાહેર કરવામાં આવ્યું હતું.