રણનીતિ / VIDEO: કોંગ્રેસના મોટા ગજાના આ ધારાસભ્ય પોતાની બેઠક છોડવા તૈયાર, પોતે જ કરેલી જાહેરાતથી રાજકીય ગરમાવો

• દિયોદરમાં કોંગ્રેસનું જનજાગરણ અભિયાન
• કાર્યક્રમમાં બોલ્યાં ગેનીબેન ઠાકોર
• "કોંગ્રેસને જીતાડવા મારી બેઠક છોડવા તૈયાર"

ગુજરાત વિધાનસભાની 2022ની ચૂંટણી પહેલા કોંગ્રેસ એક્શન મોડમાં આવી ગઇ છે.બનાસકાંઠાના દિયોદરમાં કોંગ્રેસનો જન જાગરણ અભિયાન કાર્યક્રમ યોજાયો હતો.જેમાં ધારાસભ્ય ગેનીબેન ઠાકોરે કહ્યું કે, કોંગ્રેસને જીતાડવા હું મારી બેઠક છોડવા તૈયાર છું.બીજો યોગ્ય ઉમેદવાર હશે તો હું મારી બેઠક છોડવા તૈયાર છું.આપણે કોંગ્રેસને જ જીતાડવાની છે.આગામી સમયે બુથ પર તલવાર-કટાર લઇ ઉભા રહેવું પડશે.કોંગ્રેસને જીતાડવા ક્યાંક ભગતસિંહ થવું પડશે તો ક્યાંક ઝાંસીની રાણી બનવું પડે તો પણ બનીશું.

શું ગેનીબેનને હારનો ડર છે?
વાવના ધારાસભ્ય ગેનીબેન ઠાકોરે ગત ચૂંટણીમાં ભાજપના દિગ્ગજ નેતા શંકરસિંહ ચોધરીને માત આપી હતી. જે બાદ કોંગ્રેસમાં તેમનું કદ મોટાગજાનું થઈ ગયું છે પણ આજે આપેલા બેઠક છોડવા તૈયારના નિવેદન બાદ સોશિયલ મીડિયામાં તેમજ લોકમુખે એવી વાત ચર્ચાઇ રહી છે કે ગેનીબેનને હારનો ડર છે જેથી આવા નિવેદનો આપી રહ્યા છે. પણ સામે હકીકતએ છે કે ગેનીબેને જો કોઈ સારો ઉમેદવાર મળે તો જ બેઠક છોડવાની તૈયારી બતાવી છે. 

ગેનીબેનની જાહેરાત વખતે કોણ કોણ હતું હાજર?
આગામી વિધાનસભાની 2022 માં યોજાનાર ચૂંટણીને અનુલક્ષીને કોંગ્રેસ દ્વારા પ્રચાર પ્રસાર ની શરૂઆત કરી દેવામાં આવી છે,  જે અંતર્ગત કોંગ્રેસ દ્વારા અત્યારે જનજાગરણ અભિયાન શરૂ કરાયું છે જેમાં ભાજપ સરકાર વિકાસના કામો માં નિષ્ફળ નીવડી હોવાના તેમજ મોંઘવારી અને ભ્રષ્ટાચાર જેવા મુદ્દે લોકોને જાગૃત કરવાનો પ્રયાસ કરાઇ રહ્યો છે. બનાસકાંઠાના દિયોદર ખાતે આજે જન જાગરણ અભિયાન અને સ્નેહમિલન કાર્યક્રમ યોજાયો હતો. જેમાં રાજસ્થાન સરકારના આરોગ્ય મંત્રી રઘુ શર્મા,  ગુજરાત પ્રદેશ કોંગ્રેસ પ્રભારી જીતેન્દ્ર બધેલ, કાર્યકારી પ્રમુખ હાર્દિક પટેલ, ભરતસિંહ સોલંકી, અર્જુનભાઈ મોઢવાડિયા સહિત બનાસકાંઠાના કોંગ્રેસના ધારાસભ્યો ઉપસ્થિત રહ્યા હતા, આ જનજાગરણ કાર્યક્રમમાં કોંગ્રેસ નેતાઓએ ભાજપ સરકાર પર આકરા પ્રહારો કરી આવનારી વિધાનસભાની ચૂંટણીમાં કોંગ્રેસને જીતાડવા માટે અપીલ કરી હતી 

ગઈકાલે સાસરિયાંમાં ઘુંઘટમાં રહીને આપ્યું હતું ભાષણ
વાવના ધારાસભ્ય ગેની બહેન ઠાકોર પોતાના સાસરાના ગામ એવા દિયોદર પંથકના કોતરવાડા ગયા હતા. કોતરવાડા ગામમાં લાયબ્રેરીના ઉદ્ઘાટનના કાર્યક્રમ ઉપસ્થિત રહેલા ગેની બહેને ઘૂંઘટમાં રહીને ભાષણ આપ્યું હતું. સાસરાના ગામના વડીલોની આમન્યા અને સામાજિક પ્રથાને અનુસરીને ગેની બહેને છેવટ સુધી આ જ રીતે ઉદબોધન કર્યું હતું.