ગુજરાત / દૂધ નહીં મળવાનો મેસેજ વાયરલ થતાં ડેરી પર લોકોની પડાપડી, માલધારી સમાજને કનીરામ બાપૂએ જુઓ શું કરી અપીલ

• કોઈપણ જગ્યાએ આંદોલન દરમિયાન દૂધના ટેન્કરો રોકવા નહી : પૂજય કની રામ બાપુ
• અમદાવાદ શહેરમાં દૂધની ડેરીઓ બહાર લોકોના ધામા
• બોડકદેવ નજીક અમુલ ડેરી પાસે ગ્રાહકોની લાંબી કતારો

માલધારી સમાજ દ્વારા પોતાની વિવિધ માંગોને લઇને લડત આપવામાં આવી રહી છે. ત્યારે પોતાની માંગને પ્રબળ કરવા અને સરકાર સુધી અવાજ પહોંચાડવા આવતીકાલે રાજ્યના અનેક પ્રાંતોમાં માલધારી સમાજ દ્વારા દૂધ વિતરણ બંધ રાખી વિરોધ કરવાનું નક્કી કરાયું છે. જેને લઇને અમદાવાદ શહેરમાં દૂધની ડેરીઓ બહાર લોકોએ ધામા નાખ્યા છે. બોડકદેવ નજીક અમુલ ડેરી પાસે ગ્રાહકોની લાંબી કતારો જોવા મળી હતી. આવતીકાલે દૂધ નહી મળે તેવી ભીતિને લઇને લોકોએ રીતસરની પડાપડી કરી હતી. સોશિયલ મીડિયામાં માલધારી સમાજના મેસેજ વાયરલ થતા દૂધ માટે પડાપડી શરૂ થઇ છે. ઉપરાંત સુરત, રાજકોટ, સુરેન્દ્રનગર, વડોદરા સહીતના અનેક સ્થળોએ આ સ્થિતિ જોવા મળી હતી.

પૂજય કની રામ બાપુએ માલધારીઓને કરી અપીલ 
બીજી તરફ માલધારી સમાજના એક દિવસ દૂધ નહી વેચવા મામલે દુધરેજ વડવાળા મંદિરના ગાદીપતિ, માલધારી સમાજના ગુરૂ ગાદીના પૂજય કની રામ બાપુએ માલધારીઓને અપીલ કરી છે. તેમણે જણાવ્યું કે કોઈપણ જગ્યાએ આંદોલન દરમિયાન દૂધના ટેન્કરો રોકવા નહી. વધુમાં અમૂલ દૂધની વિતરણ વ્યવસ્થાને પણ અટકાવવી નહી. એટલું જ નહિ ડેરી તેમજ કોઈના દૂધ ટેંકરોને રોકીને પણ ધમાલ ન કરવા જણાવાયું છે.   તેમણે જણાવ્યું કે આપણે તો આપણી ગાયો-ભેંસોનું દૂધ નથી વેચવાનું. ડેરી આથી દ્વારકાવાળાને માનતા હોય તો મહેરબાની કરીને ધમાલ ન કરતા તેમ અંતમાં ગુરુએ જણાવ્યું હતું.
 
શું છે માલધારી  સમાજની માંગ? 
માલધારીઓની મુખ્ય માંગોમાં ગુજરાત શહેરી ઢોર નિયંત્રણ કાયદો ૨૦૨૨ સંપૂર્ણ નાબૂદ કરવો, ગીર બરડા આલેચના માલધારીઓના ૧૭૫૫૧ કુટુંબોને ST દરજ્જ પુનઃ સ્થાપિત કરવો,  માલધારી - ગોપાલક મંડળીઓને મતનો અધિકાર જે રદ કરેલ છે તે પુનઃસ્થાપિત કરવો, ગુજરાત સરકાર ૧૦૦ પશુએ ૪૦ એકર ગૌચર નિયત કરવું તેના પર દબાણો દૂર કરવા, નંદી વસાહત શહેરની બહાર પુનઃસ્થાપિત સહીતની માંગણીઑ કરાઇ રહી છે.