મિત્રો, જાન્યુઆરી માસની તા.ર૦-૦૧-ર૦ર૦ના સપ્તાહના ગ્રહોની ખગોળીય સ્થિતિનો અભ્યાસ કરતાં અને ગ્રહોના બનતા યોગો જોતાં આ યોગો બજાર માટે કેવી અસર આપશે તે આપણે જોઇએ.
આ સપ્તાહના મહત્ત્વના યોગોઃ
આ સપ્તાહના મહત્ત્વના યોગોમાં સૂર્ય અને હર્ષલનો કેન્દ્રયોગ થાય છે. આ સપ્તાહમાં બુધ અને સૂર્યનું ક્રાંતિસામ્ય થાય છે. સપ્તાહની શરૂઆતના આગળના રવિવારે રાત્રે શુક્ર અને રાહુનો ત્રિકોણયોગ થયેલ છે તેની અસર આ સપ્તાહના પહેલા દિવસે ઓપનિંગમાં આવી શકે છે. આ સપ્તાહમાં મંગળ-ગુરુ સ્વગૃહી છે અને આ સપ્તાહમાં શનિ પોતાની સ્વગૃહી મકર રાશિમાં પ્રવેશે છે.
શેરબજારઃ મિત્રો, આ સપ્તાહના ઉપરોક્ત ગ્રહયોગનો અભ્યાસ કરતાં શેરબજારમાં સપ્તાહની શરૂઆત મજબૂતાઇ સાથેના માર્કેટથી ઓપનિંગથી થઇ શકે છે પણ શેરબજારમાં સપ્તાહની શરૂઆતથી જ બજાર બેતરફી વધઘટ બતાવી શકે છે પણ સપ્તાહની શરૂઆતમાં દરેક ભાવે વેચવું હિતાવહ છે. આ દિવસોમાં નિફટીનો વેપાર વેચીને કરી શકાય અથવા નિફ્ટી પુટનો વેપાર કરવાથી લાભ મળી શકે છે. ગ્રહયોગ જોતાં આ દિવસોમાં ઓટો, રિલાયન્સ, બેન્ક સેક્ટરમાં વધઘટ વધુ આવી શકે છે. આ સપ્તાહના મધ્યના દિવસોમાં બજારમાં વેચવાલી આવે તેવા યોગો છે. આ દિવસોમાં એકાદ દિવસ મોટી અને ઝડપી વેચવાલી આવી શકે છે. આ નરમ ભાવમાં નફો બુક કરતાં જવો હિતાવહ છે. સપ્તાહના અંતિમ દિવસોમાં પણ બજારમાં નરમ ધ્યાન રાખીને વેપાર કરવો. આ દિવસોમાં બજારમાં સાંકડી વધઘટ અથવા બેતરફી વધઘટ જોવા મળી શકે છે. આ દિવસોના અંતિમ દિવસે બજારમાં વેચવાલી આવી શકે છે.
સોના-ચાંદીઃ આ સપ્તાહના ગ્રહયોગો જોતાં સોના-ચાંદીમાં તેજીની લાઇનની શક્યતા ઓછી છે. આ સપ્તાહની શરૂઆતથી બજારમાં નરમાઇના યોગો છે અથવા ભાવમાં સાંકડી વધઘટ જોવા મળી શકે છે પણ વેચીને વેપાર કરનારને લાભ મળી શકે છે. આ સપ્તાહની શરૂઆતના દિવસથી બજારમાં મંદીનો વેપાર સોના અને ચાંદીમાં ગોઠવતાં જવો પણ દરેક ભાવે વેચી શકાય તેવી રીતે વેપાર કરવો. આ દિવસોમાં ચાંદીમાં વેચવાલી વધુ આવી શકે એવા યોગો હોવાથી ચાંદીનું વેચાણ વધુ કરવું હિતાવહ છે. સપ્તાહના ઇન્ટરનેશનલ બજારમાં વેચવાલી આવતાં સ્થાનિક બજારમાં પણ નરમ ભાવ જોવા મળે.
ક્રૂડ ઓઇલઃ મિત્રો, આ સપ્તાહમાં પણ ક્રૂડ ઓઇલ આ સપ્તાહના ગ્રહયોગો જોતાં મજબૂત ભાવ બતાવી શકે છે. આ સપ્તાહની શરૂઆતના દિવસથી જ ક્રૂડ ઓઇલમાં થોડો થોડો સ્ટોક કરવો હિતાવહ છે. સપ્તાહની શરૂઆતના દિવસથી બજારમાં દરેક ભાવે સ્ટોક કરી શકાય તેવી રીતે વેપાર ગોઠવવો લાભદાયી રહે. શરૂઆતના દિવસથી સપ્તાહના મધ્યના દિવસો સુધી સ્ટોક વધારી શકો છો. સપ્તાહના મધ્યના દિવસોમાં એકાદ દિવસ સામાન્ય બેતરફી વધઘટ કે સાંકડી વધઘટ જોવા મળી શકે છે પણ ધ્યાન મજબૂત રાખીને વેપાર કરવો. સપ્તાહના અંતિમ દિવસોમાં પણ બજારમાં નવી માગ નીકળતાં મજબૂત બજાર રહી શકે છે. ફોરેન માર્કેટમાં બજારમાં સારી તેજીનો ઉછાળો આવતાં સ્થાનિક બજારમાં પણ મજબૂત ભાવ રહે. ક્રૂડ ઓઇલમાં નવી માગ નીકળતાં અને ફોરેન બજારની નવી ખરીદી નીકળતાં બજારમાં મજબૂત ભાવ જોવા મળી શકે છે.
એરંડા, તેલ-તેલીબિયાંઃ મિત્રો, આ સપ્તાહમાં સિંગતેલ, કપાસિયા તેલ, તેલીબિયાં અને એરંડામાં નવી માગ નીકળતાં મજબૂત ભાવ જોવા મળી શકે છે. આ સપ્તાહમાં તેલ-તેલીબિયાંમાં સપ્તાહની શરૂઆતના દિવસથી જ મજબૂત ધ્યાન રાખીને વેપાર કરતાં જવો લાભદાયી રહી શકે છે. સપ્તાહના અંતિમ દિવસોમાં પણ તેલ-તેલીબિયાં, એરંડામાં મજબૂતીના જ યોગો હોવાથી સ્ટોક કરીને જ વેપાર કરવો લાભદાયી રહી શકે છે. આ સપ્તાહમાં એકાદ દિવસ તેજીનો મોટો ઉછાળો જોવા મળી શકે છે. આ સપ્તાહમાં એરંડા, તેલ- તેલીબિયાંના ભાવમાં મજબૂતી જોવા મળી શકે છે.
કપાસ-કોટનઃ મિત્રો, આ સપ્તાહના ગ્રહયોગો જોતાં કોટન અને કપાસમાં આ સપ્તાહમાં તેજીના યોગો હોવાથી સપ્તાહની શરૂઆતના દિવસોથી જ કોટન-કપાસમાં તેજી તરફીનાે વેપાર કરવો લાભદાયી રહે. દરેક ભાવે શરૂઆતના દિવસોમાં સ્ટોક કરી શકીએ એવી રીતે સ્ટોક કરવો. સપ્તાહના મધ્યના દિવસો સુધી સ્ટોક વધારી શકાય છે. આ દિવસોમાં એકાદ દિવસ નવી માગ નીકળતાં બજારમાં સારો મજબૂત ભાવ જોવા મળી શકે છે પણ ભાવ જોઇને નફો બુક કરતાં જવો. સપ્તાહના અંતિમ દિવસોમાં પણ બજારમાં મજબૂતીના જ યોગો છે પણ નફારૂપી વેચવાલી આવી શકે છે. આ ભાવમાં મંદીનો વેપાર કરવો નહીં. એકંદરે આ સપ્તાહમાં કોટન-કપાસમાં તેજીના યોગો હોવાથી બજારમાં મજબૂતી જોવા મળી શકે છે.