ઈરફાન ખાન, રાધિકા મદાન અને કરીના કપૂર સ્ટારર ફિલ્મ 'અંગ્રેજી મીડિયમ' આજે એટલે કે 13 માર્ચે રિલીઝ થઈ ચૂકી છે. બીમારીને કારણે લાંબા બ્રેક બાદ ઈરફાન ખાને પડદાં પર વાપસી કરી છે. આ ફિલ્મ ઈરફાન ખાનની ફિલ્મ હિન્દી મીડિયમની સીક્વલ છે. જોકે, કોરોના વાયરસને કારણે દેશના 3 રાજ્યો કેરળ, દિલ્હી અને જમ્મૂ-કશ્મીરમાં આ ફિલ્મ રિલીઝ થઈ નથી, કારણ કે અહીં 31 માર્ચ સુધી બધાં જ થિયેટર અને મલ્ટીપ્લેક્સ બંધ કરવામાં આવ્યા છે. અહીં આ ફિલ્મ 31 માર્ચ પછી રિલીઝ કરવામાં આવશે.
ઈરફાન ખાનની કમબેક ફિલ્મની ફેન્સ આતુરતાથી રાહ જોઈ રહ્યાં હતા. કેન્સર સામે લડીને ઈરફાને આ ફિલ્મનું શૂટિંગ કર્યું હતું. ફિલ્મની કહાનીની વાત કરીએ તો ઉદયપુરમાં રહેતા ચંપક બંસલ (ઈરફાન ખાન) મીઠાઈની દુકાન ચલાવે છે. ઈરફાન જાણીતા મીઠાઈવાળા ઘસીટારામનો પૌત્ર છે. તેનો બિઝનેસ પણ સારો ચાલી રહ્યો છે. બસ અંગ્રેજી બોલવામાં તે થોડો પાછળ પડે છે. હવે ચંપક તો વધુ ભણેલો નથી પરંતુ એ તેની દીકરી તારિકા (રાધિકા મદાન)ને મોટાં સપનાઓ જોવાથી રોકતો નથી. તેની દીકરી ભણવામાં એટલી હોશિયાર નથી પરંતુ તે લંડનમાં અભ્યાસ કરવાના સપના જુએ છે. તેને લંડનની ટ્રૂફોર્ડ યૂનિવર્સિટીમાં એડમિશન જોઈએ. હવે દીકરીની આ જીદ્દને કારણે ચંપક ફસાઈ જાય છે. તેણે દીકરીના સપના પૂરા તો કરવા છે પરંતુ દીકરીને ખુદથી દૂર પણ નથી મોકલવી.
પરંતુ પછી ચંપક દીકરીનું સપનું પૂરું કરવાનો નિર્ણય લે છે અને પછી તે દીકરીનું લંડન એડમિશન કરાવવાના પ્રયાસોમાં લાગી જાય છે. તેના આ કામમાં તેનો મિત્ર ઘસીટેરામ (દીપક ડોબરિયાલ) મદદ કરે છે. આ બંને લંડનની નાગરિકતા લેવા પણ તૈયાર થઈ જાય છે અને એ પણ નકલી પાસપોર્ટ પર. હવે તારિકાને લંડનની ટ્રૂફોર્ડ યૂનિવર્સિટીમાં એડમિશન અપાવવા માટે કઈ-કઈ ટ્રિક અપનાવશે ફિલ્મની કહાની તેના પર જ આધારિત છે. શું તે તારિકાનું લંડનમાં એડમિશન કરાવી શકશે? શું ચંપક તેના મિશનમાં કામયાબ થશે? ચંપક અને ઘસીટેરામનું જૂઠ બધાંની સામે તો નહીં આવી જાય? આ સવાલોના જવાબ જાણવા માટે તમારે ફિલ્મ જોવી પડશે.
ડિરેક્શન
ફિલ્મનું ટ્રેલર જોઈને એવું લાગી રહ્યું હતું કે ફિલ્મમાં વિદેશી યૂનિવર્સિટીમાં એડમિશનને લઈને થતી પરેશાની દર્શાવવામાં આવશે. જોકે, ફિલ્મમાં આ મુદ્દો થોડો સાઈડલાઈન થયેલો દેખાયો અને ફિલ્મમાં પિતા અને દીકરીના સંબંધ પણ વધુ ફોકસ કરવામાં આવ્યું છે. જેના કારણે ફિલ્મ તેના મૂળ મુદ્દાથી હટી ગઈ છે. ફિલ્મના ડિરેક્શનની વાત કરીએ તો ડિરેક્ટર હોમી અદજાનિયાની આ ફિલ્મ દર્શકોને અંત સુધી પકડી રાખવામાં થોડી નિષ્ફળ ગઈ છે. ફિલ્માં ફીલ ગુડ ફેક્ટર મિસિંગ છે. ફિલ્મને જોતા તમે અંદાજો લગાવી શકો છો કે આગળ ફિલ્મમમાં શું થવાનું છે. ડિરેક્ટર સાકેત ચૌધરીની ફિલ્મ હિન્દી મીડિયમની જેમ અંગ્રેજી મીડિયમ દર્શકોના દિલમાં ખાસ જગ્યા બનાવી શકે છે નહીં એ જોવાનું રહ્યું.
ફિલ્મમાં ઈરફાન ખાન અને દીપક ડોબરિયાલની એક્ટિંગ કાબિલે-એ-તારીફ છે. ઈરફાન ફિલ્મમાં કમાલ દેખાઈ રહ્યો છે. દીપકની એક્ટિંગ પણ બેમિસાલ છે. આ બંનેની નેચરલ કોમિક ટાઈમિંગ દરેક સીનમાં જાન ફૂંકી દે છે. આ સિવાય ઈરફાનની દીકરીના રોલમાં રાધિકા મદાને પણ સારું કામ કર્યું છે અને પોતાનો રોલ બખૂબી નિભાવ્યો છે. કરીના કપૂરની એક્ટિંગની વાત કરીએ તો તે ઠીકઠાક છે. તે ફિલ્મમાં હોય કે ન હોય તેનાથી કોઈ ફરક પડતો નહીં. ફિલ્મમાં તેને વધુ કંઈ કરતાં દેખાડી નથી.
આ ઈરફાનની કમબેક ફિલ્મ છે. સાથે જ ફિલ્મમાં ઈરફાનની દરદાર એક્ટિંગ, કોમિક ટાઈમિંગ અને કોમેડી દર્શકોને પકડી રાખે છે. જેથી એકવાર તો આ ફિલ્મ અવશ્ય જોવી જોઈએ.
