કોરોના સંકટ / દેશમાં 24 કલાકમાં સૌથી વધુ વિક્રમજનક આટલા કેસ વધ્યા જયારે રિકવરી રેટ પણ વધ્યો

આરોગ્ય વિભાગના આંકડા મુજબ દેશમાં અત્યારે કુલ કેસ 90927 કેસ છે જેમાંથી 53946 એક્ટિવ કેસ છે, 34108 રિકવર કેસ છે, 1 વિદેશી દર્દી છે અને 2872 લોકોના મોત નિપજ્યા છે. છેલ્લા 24 કલાકમાં દેશમાં 120 લોકોના મોત થયા છે.

સારા સમાચાર: રિકવરી રેટ વધ્યો

સારા સમાચાર એ છે કે દેશમાં રિકવરી રેટમાં પણ 37.51%નો વધારો થયો છે. છેલ્લો સૌથી મોટો ઉછાળો 11 મેના રોજ નોંધાયો હતો જયારે 4213 નવા કેસ નોંધાયા હતા અને 97 મોત નોંધાયા હતા. 3 રાજ્યોમાં 10000થી વધુ કેસ નોંધાયા છે જેમાં સૌથી કપરી સ્થિતિ મહારાષ્ટ્રમાં છે જ્યાં 30706 કેસ નોંધાયા છે ત્યાર બાદ ગુજરાતમાં 10988 કેસ નોંધાયા છે અને તામિલનાડુમાં 10585 કેસ નોંધાયા છે. 

આ છે રાજ્યો દીઠ કેસ અને મોતના આંકડા

દેશની 2872 મોતમાં મહારાષ્ટ્રમાં 1135 મોત નોંધાયા છે જયારે ગુજરાતમાં 625 મોત નોંધાયા છે. ત્યાર બાદ મધ્યપ્રદેશ, પશ્ચિમ બંગાળ, દિલ્હી, રાજસ્થાન, ઉત્તર પ્રદેશ, તામિલનાડુ અને આંધ્રપ્રદેશમાં અનુક્રમે 243, 232, 129, 126, 104, 74 અને 49 મોત નોંધાઈ છે. આ તરફ આરોગ્ય વિભાગે કહ્યું હતું કે દેશના 80% કોરોના કેસ દેશના 12 રાજ્યોમાં આવેલા 30 મ્યુનિસિપલ વિસ્તારોમાં આવેલા છે. આરોગ્ય વિભાગે આ વિસ્તારના ઉચ્ચ અધિકારીઓ અને જિલ્લા કલેકટર સાથે મિટિંગ યોજીને ચર્ચા કરી હતી. 

શું ચર્ચા થઇ આ મિટિંગમાં?

આ મિટિંગમાં દર્દીઓની કાળજી અને દર્દીઓ જેમને મળ્યા હતા તેમનું ટ્રેસિંગ અને સર્વેલન્સ કરવા માટે તાકીદ કરાઈ હતી. આ ઉપરાંત ફ્રન્ટ લાઈન હેલ્થ વર્કર્સને પ્રોટેક્ટિવ સાધનો મળી રહે અને તેમની સાથે સંપર્ક જળવાયેલો રહે એ બાબત ઉપર ધ્યાન કેન્દ્રિત કરાયું હતું. આ તરફ કોરોનાના આઇસોલેશન સેન્ટરમાં સ્વચ્છતા અને વેસ્ટ મેનેજમેન્ટ જળવાઈ રહે એ બાબત પર પણ ભાર મુકાયો હતો.