- એશિયન ગેમ્સમાં ભારત પોતાનો 72 વર્ષ જૂનો ઈતિહાસ બદલ્યો
- આ વર્ષની એશિયન ગેમ્સમાં ભારતના 100 મેડલની પુષ્ટિ થઈ ગઈ
- ભારત આ વખતે 100થી વધુ મેડલ જીતશે જે એક નવો રેકોર્ડ હશે
ભારત વિવિધ રમતગમત ક્ષેત્રે સતત પ્રગતિ કરી રહ્યું છે. આ એ વાતનો પુરાવો છે કે એશિયન ગેમ્સમાં ભારત પોતાનો 72 વર્ષ જૂનો ઈતિહાસ બદલવા જઈ રહ્યું છે. આ વર્ષની એશિયન ગેમ્સમાં ભારતના 100 મેડલની પુષ્ટિ થઈ ગઈ છે અને છેલ્લા કેટલાક દાયકાઓમાં આવું બન્યું ન હતું. આ વખતની એશિયન ગેમ્સમાં ભારતે 13મા દિવસ સુધી 95 મેડલ જીત્યા છે અને અલગ-અલગ ઈવેન્ટ્સમાં ભારતના ઓછામાં ઓછા 9 વધારાના મેડલ પણ નિશ્ચિત થઈ ગયા છે. મતલબ કે ભારત આ વખતે 100થી વધુ મેડલ જીતવા જઈ રહ્યું છે, જે એક નવો રેકોર્ડ હશે. ભારતીય ખેલાડીઓએ એશિયન ગેમ્સમાં સતત 13મા દિવસે પોતાનું શાનદાર પ્રદર્શન જારી રાખ્યું છે. ભારતે અત્યાર સુધીમાં કુલ 95 મેડલ જીત્યા છે જેમાં 22 ગોલ્ડ, 34 સિલ્વર અને 39 બ્રોન્ઝ મેડલ સામેલ છે. શુક્રવારે ભારતની પુરુષ હોકી ટીમે જાપાન સામે શાનદાર જીત નોંધાવીને ગોલ્ડ મેડલ જીત્યો હતો. આ જીત સાથે ભારતીય પુરુષ હોકી ટીમે પેરિસ ઓલિમ્પિકમાં પોતાનું સ્થાન નિશ્ચિત કરી લીધું છે.
ભારતના 100 મેડલ કન્ફર્મ
આ સિવાય મહિલા કબડ્ડી સેમીફાઈનલમાં ભારતે નેપાળ સામે શાનદાર જીત હાંસલ કરી હતી. ભારતીય મહિલાઓએ 61-17થી જીત મેળવીને ફાઇનલમાં જગ્યા બનાવી લીધી. જેના કારણે મહિલા કબડ્ડીમાં પણ ભારતને મેડલ મળવાની ખાતરી છે. આ રીતે ભારત માટે તીરંદાજીમાં ત્રણ, કબડ્ડીમાં બે, ક્રિકેટમાં એક અને બેડમિન્ટનમાં એક મેડલ નિશ્ચિત થઈ ગયો છે.
ભારતીય પુરૂષ ક્રિકેટની વાત કરીએ તો ભારતે સેમિફાઇનલ મેચમાં બાંગ્લાદેશને હરાવીને ફાઇનલમાં જગ્યા બનાવી લીધી છે. હવે તેઓ ત્યાં અફઘાનિસ્તાન સામે ટકરાશે. આ કારણે ભારતને મેન્સ ક્રિકેટમાં પણ મેડલની ખાતરી છે, જ્યારે ઋતુરાજ ગાયકવાડની આગેવાની હેઠળની ટીમ ફાઇનલમાં અફઘાનિસ્તાનને હરાવે છે તો ભારતને વધુ એક ગોલ્ડ મેડલ મળશે. તમને જણાવી દઈએ કે હરમનપ્રીત કૌરના નેતૃત્વમાં ભારત મહિલા ક્રિકેટમાં ગોલ્ડ મેડલ જીતી ચૂક્યું છે.
