સુવિધા / હવેથી નવા વ્હીકલ્સની નંબર પ્લેટ માટે નહીં ખાવા પડે RTOના ધક્કા, રાજ્યના આ શહેરીજનોને થશે ફાયદો

• વડોદરા RTOનું અનોખું આયોજન
• રજિસ્ટ્રેશન માટે RTOના ધક્કા નહીં ખાવા પડે
• 1 જુલાઇથી શો-રૂમથી પ્રક્રિયા શરૂ કરાશે

વડોદરામાં નવા વાહનોની નંબર પ્લેટ માટે હવે લોકોએ RTOના ધક્કા નહીં ખાવા પડે. આ માટે વડોદરા RTO દ્વારા અનોખું આયોજન કરવામાં આવ્યું છે. હવેથી વાહનોના રજિસ્ટ્રેશનથી લઈ નંબર પ્લેટની પ્રક્રિયા શો-રૂમથી જ થશે. આ પ્રક્રિયા આગામી 1 જુલાઈથી શરૂ કરાશે. મહત્વનું છે કે પહેલાં RTOમાંથી જ વેરિફાઇ અને એપ્રૂવલની કામગીરી થતી હતી અને આરટીઓમાંથી નંબર એલોટમેન્ટ થતા હતા.

ફી ભર્યા બાદ લાગી જશે નંબર પ્લેટ
વડોદરામાં તમામ વાહનોના રજિસ્ટ્રેશનથી લઈને નંબરની ફાળવણી સુધીની પ્રક્રિયા શો-રૂમમાંથી જ કરાશે. ફી અને ટેક્સ ભર્યા બાદ તરત જ નવા વાહનને નંબર પ્લેટ લાગી જશે. આ માટે શો-રૂમના ડીલર્સને RTO દ્વારા તાલીમ આપવામાં આવશે. 

નંબર પ્લેટ માટે નહીં જવું પડે RTOમાં
વડોદરા RTO દ્વારા જણાવવામાં આવ્યું છે કે,  મોટર વ્હીકલ એક્ટમાં આવેલા સુધારા મુજબ, પહેલાં RTOઓમાંથી નંબરની ફાળવણી થતી હતી, જે હવે ડીલર્સ કક્ષાએથી જ ફાળવવામાં આવશે. જેથી વાહનના નંબરની ફાળવણી પણ ઝડપી બનશે. તેમને આરટીઓ સુધી પણ નહીં આવવું પડે, નંબર પ્લેટ શો-રૂમમાં જ લાગી જશે. 

લાગે છે એક અઠવાડિયા જેટલો સમય 
અત્રે ઉલ્લેખનીય છે કે, જ્યારે કોઈ નવું વાહન ખરીદે છે, ત્યારે તે વાહનના દસ્તાવેજને ડિલર દ્વારા RTOને મોકલવામાં આવે છે. જે બાદ RTO દ્વારા તે વાહનના દસ્તાવેજોની ખરીઈ કર્યા બાદ આ નંબરની એચએસઆરપી તૈયાર કરવા યાદી મોકલે છે. નંબર પ્લેટ તૈયાર થઈને આવ્યા બાદ વાહનમાલિકને જાણ કરાય છે. આમાં એક અઠવાડિયા જેટલો સમય લાગે છે. તો જ્યારે કોઈ પસંદગીનો નંબરની ખરીદે છે, ત્યારે વધારે સમય લાગે છે. જોકે, હવે આ માટે પણ વધારે રાહ જોવી પડશે નહીં.