રાજકોટના ગ્રામ્ય વિસ્તારમાં દેખાયેલા દીપડાને લઇને વનવિભાગે સતર્ક બન્યું છે. રાજકોટના જસદણ, ધોરાજી અને જેતપુરમાં દીપડો દેખાવાને લઇ વન વિભાગની અનેક ટીમો દીપડાને ઝડપી લેવા કામે લાગી છે. દીપડાની ગ્રામ્ય પંથકમાં દહેશતને લઇ અલગ અલગ જગ્યાએ 5 પાંજરા મુકવામાં આવ્યા છે. બીજી બાજુ દીપડો સાંજના સમયે કોઇ વ્યક્તિ પર હુમલો ન કરે તે માટે વાડી વિસ્તારમાં ખુલ્લામાં ન સુવા માટે વનવિભાગે લોકોને અપીલ કરી છે. વનવિભાગ રાજકોટના ગ્રામ્ય પંથકમાં દીપડાની હીલચાલ પર નજર રાખી રહ્યું છે.
DFO તુષાર પટેલ
DFO તુષાર પટેલનું નિવેદન
રાજકોટ વન વિભાગના DFO તુષાર પટેલે જણાવ્યું હતું કે, સૌ પ્રથમ 22 તારીખે દીપડો દેખાયાના સમાચાર વન વિભાગને મળ્યા હતા, ત્યારથી જ અલગ અલગ ટીમો બનાવીને સર્ચ ઓપરેશન હાથ ધરવામાં આવ્યું હતું. આ સર્ચ દરમિયાન દીપડો હોવાના નિશાનો પણ જોવા મળ્યા હતા. રાજકોટમાં મોટા ભાગે વિસ્તારના વન વિસ્તારમાં દીપડાની વસ્તી છે, જે હ્યુમન વિસ્તારમાં આવતા નથી પરંતુ ક્યારેક આવી જાય છે. જો કે, તે માનવ વસવાટ વિસ્તારમાં આવી જતા તેને પકડવા માટે કામગીરી ચાલી રહી છે.
લોકોને અપીલ
વન વિભાગે લોકોને અપીલ કરી છે કે, કેટલીક અફવાઓથી દૂર રહેવું જોઈએ અને વન વિભાગ દ્વારા વખતો વખત આપવામાં આવતી સૂચનાઓનું પાલન કરવું જોઈએ. તેમજ રાત્રીના સમય એકલા ટ્રાવેલિંગ ન કરવું જોઈએ. વધુમાં કહ્યું કે, વાડી વિસ્તારમાં એકલા જવાનું ટાળવું જોઈએ. વધુમાં સલાહ આપી છે કે, દસથી પંદર લોકોના ટોળામાં ફરવું જોઈએ. વાડી વિસ્તારના લોકોને બંધ ઓરડામાં ઉંઘવું જોઈએ. જો કોઈ વાડી વિસ્તારમાં કોઈ માસ-મચ્છી જમતા હોય તો તેમને વધેલો ભાગ જ્યાં ત્યાં ફેકવો જોઈએ નહી તેમજ તેને જમીનમાં દાટી દેવો જોઈએ.
