ધરપકડ / ચાંદખેડામાં જિમ ટ્રેનરે લિફ્ટમાં યુવતીનો હાથ પકડી અડપલાં કર્યા, કહ્યુંઃ કોઈને કહીશ તો મારી નાખીશ, ફરિયાદ દાખલ

• અમદાવાદના ચાંદખેડામાં જીમ ટ્રેનર સામે છેડતીની ફરિયાદ
• સરજુ એરેના કોમ્પલેક્ષમાં MAF જીમના ટ્રેનર સામે ફરિયાદ 
• ચાંદખેડા પોલીસે આરોપી નિલેશ ચૌહાણ કરી અટકાયત

 મહિલાઓની છેડતીના કેસ દિવસે ને દિવસે વધી રહ્યા છે. જિમમાં કસરત કરવા માટે પુરુષ ટ્રેનર રાખતી યુવતી માટે એક ચેતવણીરૂપ કિસ્સો સામે આવ્યો છે. ચાંદખેડામાં એક જિમ ટ્રેનરે લિફ્ટમાં હાથ પકડી યુવતીની છેડતી કરી હોવાનું સામે આવ્યું છે. જિમ ટ્રેનરે તેને કહ્યું હતું કે જો કોઈને કહીશ તો તને મારી નાખીશ. જેથી પીડિત યુવતીએ ચાંદખેડા પોલીસ સ્ટેશનમાં ફરિયાદ કરી છે. 

યુવતિ જીમમાં કસરત કરવા જાય છે
ચાંદખેડામાં રહેતી બીના (નામ બદલ્યું છે)એ છેડતીની ફરિયાદ નોંધાવી છે. બીના આઇઓસી રોડ પર બાઈકનો શો રૂમ ધરાવે છે. બીના ચાંદખેડા ખાતે આવેલ એમએએફ ફિટનેસ જિમમાં કસરત કરવા જાય   છે. ત્યાં તેને જિમ ટ્રેનર નીલેશ ચૌહાણ કસરત શીખવાડે છે.

નિલેશે બીનાને જાનથી મારી નાંખવાની ધમકી આપી હતીઃયુવતી
બીના જ્યારે જિમમાં કસરત કરવા ગઈ હતી અને જ્યારે જિમમાંથી લિફ્ટ દ્વારા નીચે જતી હતી. આ વખતે લિફ્ટમાં જિમ ટ્રેનર નીલેશ પણ હતો.નીલેશ લિફ્ટમાં અચાનક બીનાને સ્પર્શ કરવા લાગ્યો હતો. જેથી બીનાએ તેને ધક્કો માર્યો છતાં તે સ્પર્શ કરતો હતો. આથી બીનાએ નીલેશને કહ્યું કે મારા પતિને આ વાતની જાણ કરી દઈશ. નીલેશે બીનાને કહ્યું હતું કે તારા પતિને કાંઈ કહેતી નહીં નહિતર તને જાનથી મારી નાખીશ તેવું કહી ધમકાવી હતી.

નીલેશ બીના પાસે તેનો ન્યૂડ ફોટો માગ્યો હતોઃ યુવતિ
એક દિવસ નીલેશે બીનાને કહ્યું હતું કે મને તારો આજનો ફોટો અને છ મહિના પહેલાનો ફોટો આપવો પડશે. બીનાએ કહ્યું હતું કે થોડી વાર પછી આપું. જોકે નીલેશ બીના પાસે તેનો ન્યૂડ ફોટો માગ્યો હતો. બીનાએ ફોટો નહીં આપું તેમ કહ્યું હતું. બીના જ્યારે એરોબિક્સના ક્લાસમાં હતી ત્યારે નીલેશે તેને કલાસમાંથી બહાર બોલવીને કહ્યું હતું કે તું નીચે આવ મારે કામ છે. આમ કહી તે લિફ્ટમાં લઇ ગયો હતો. 

પોલીસે ગુનો નોંધી આરોપીની અટકાયત કરી
નીલેશે લિફ્ટમાં બીભત્સ અડપલાં કર્યાં હતાં. બીના લિફ્ટમાંથી નીકળી ન જાય તે માટે તેનો હાથ પકડીને જબરદસ્તી કરી હતી. બીના આ દરમિયાન નીલેશને ધક્કો મારીને લિફ્ટની બહાર નીકળી ગઈ હતી. બીનાએ તરત તેના પતિને જાણ કર્યા બાદ પોલીસને બોલાવી લીધી હતી. બીનાએ જિમ ટ્રેનર વિરુદ્ધ ફરિયાદ નોંધાવી હતી. પોલીસે ફરિયાદના આધારે તપાસ શરૂ કરી છે.