સ્પોર્ટસ / ક્રિકેટના ઇતિહાસમાં પ્રથમ વખત બની આ ઘટના, ક્રિકેટર પતિના સ્થાને પત્નીએ કર્યું આ કામ

• ક્રિકેટના ઇતિહાસમાં પહેલી વાર પતિના સ્થાને ભારતીય પત્નીએ વિકેટકીપિંગ કર્યું
• શરાન્યા યુરોપિયન ક્રિકેટ સિરીઝ ટી-૧૦ લીગની પુરુષ ટીમમાં રમનારી પ્રથમ મહિલા ક્રિકેટર છે

આ સિરીઝની સેમિફાઇનલ મેચમાં એ વખતે ઇતિહાસ રચાયો, જ્યારે એક વિકેટકીપરના સ્થાને તેની પત્નીએ વિકેટકીપિંગ કર્યું. કેએસવી ક્રિકેટ ક્લબ તરફથી રમી રહેલો ફિન સદારંગાની વિકેટકીપર છે. મેચ દરમિયાન તેણે બોલિંગ કરવાનો નિર્ણય કર્યો. આથી વિકેટકીપરનું સ્થાન તેની જ પત્ની શરાન્યા સદારંગાનીએ સંભાળ્યું અને ઇતિહાસ રચાઈ ગયો.

સેમિફાઇનલમાં જ્યારે તેનો પતિ ફિન બોલિંગ કરી રહ્યો હતો ત્યારે શરાન્યા વિકેટકીપિંગ કરી રહી હતી. ક્રિકેટના મેદાનમાં આવું દૃશ્ય ક્યારેય જોવા મળ્યું નહોતું. શરાન્યા સદારંગાની અને ફિને પ્રેમલગ્ન કર્યાં છે. આશ્ચર્યની વાત એ છે કે પતિ ફિને શરાન્યાની સરનેમ પોતાના નામની પાછળ લગાડી છે. ઉલ્લેખનીય છે કે શરાન્યા સદારંગાનીએ તાજેતરમાં જ સમાચારોમાં ઝળકી હતી. યુરોપિયન ક્રિકેટ સિરીઝ ટી-૧૦ લીગમાં પુરુષોની ટીમમાં રમનારી પ્રથમ મહિલા ક્રિકેટર છે. શરાન્યા ભારતીય મૂળની છે.