નિર્ણય / આબુ અથવા રાજસ્થાન જતાં ગુજરાતીઓ ચેતજો: ખાડા પડવાના કારણે બંધ કરવો પડ્યો આ રસ્તો, થયો ટ્રાફિક જામ

• પાલનપુર-આબુરોડ હાઈવે કરાયો બંધ
• રસ્તા પર ખાડા હોવાને કારણે હાઈવે બંધ 
• રાજસ્થાન જતા અનેક વાહનચાલકો અટવાયા

માઉન્ટ આબુ જતાં મુસાફરો માટે મહત્વના સમાચાર સામે આવ્યા છે. વરસાદના કારણે પાલનપુર આબુરોડ હાઇવે પર મોટા મોટા ખાડા પડી જવાને કારણે વાહનો ફસાઈ ગયા છે. જેના કારણે પોલીસ દ્વારા પાલનપુર-આબુરોડ હાઈવે બંધ કરાયો છે. છેલ્લા 2 મહિનામાં હાઈવે બીજી વખત બંધ કરવામાં આવ્યો છે. પાલનપુર આબુરોડ હાઈવે બંધ કરાતા એરોમા સર્કલથી આબુરોડ જવા માટેનું ડાયવર્ઝન અપાયું છે.

35 કિલોમીટરનું ડાયવર્ઝન અપાયું
સામાન્ય વરસાદમાં રસ્તા પર ખાડા પડી જતાં તેમાં વાહનો ફસાઈ ગયા છે. જેના કારણે પાલનપુર આબુરોડ નેશનલ હાઈવે બંધ કરવામાં આવ્યો છે. આ ઉપરાંત પાલનપુર એરોમા સર્કલથી આબુરોડ માર્ગ પર જવા માટે 35 કિલોમીટરનું ડાયવર્ઝન આપવામાં આવ્યું છે. અમદાવાદથી આબુ જતા વાહનોને ચંડીસર વાઘરોળ થઈને ડાયવર્ઝન અપાયું છે. જેના કારણે પાલનપુર એરોમા સર્કલ પર વાહનોની લાંબી કતાર જોવા મળી રહી છે. અમદાવાદ અને અન્ય વિસ્તારથી રાજસ્થાન જતા અનેક વાહનચાલકો અટવાયા છે.

વાહનચાલકોને હાલાકી 
પાલનપુર-આબુરોડ હાઇવે પર સામાન્ય વરસાદમાં મોટા મોટા ખાડા પડી જતાં આ હાઈવે બંધ કરવાનો વારો આવ્યો છે. આ હાઈવે પરથી દરરોજ હજારો વાહનો પસાર થયા છે. ત્યારે હાઇવે બંધ કરવામાં આવતા વાહનચાલકોને હાલાકીનો સામનો કરવો પડી રહ્યો છે. 

બે માસમાં ચોથી વખત બંધ કરાયો હાઈવે 
આપને જણાવી દઈએ કે, NHAIની નબળી કામગીરીના કારણે પાલનપુર-આબુરોડ હાઇવે બે માસમાં ચોથી વખત બંધ કરાયો છે. ત્યારે તાત્કાલિક ધોરણે નેશનલ હાઇવે ઓથોરિટી દ્વારા આ રસ્તાને લઈને ચોક્કસ કામગીરી કરવામાં આવે તેવી માંગ ઉઠી છે.