કાશીમાં આવેલી જ્ઞાનવાપી મસ્જિદના આખા પરિસરના સર્વે પર વારાણસી કોર્ટમાં સુનાવણી શરુ થઈ છે. સિવિલ જજ સિનિયર ડિવિઝન ફાસ્ટ ટ્રેક કોર્ટ પ્રશાંતસિંહની કોર્ટમાં ગુરૂવારે ફરિયાદી વિજય શંકર રસ્તોગીએ 1991ના આદિ વિશ્વેશ્વર કેસમાં સમગ્ર જ્ઞાનવાપી સંકુલના ASI સર્વે અંગે દલીલો શરૂ કરી હતી.
વિજય શંકર રસ્તોગીએ શું દાવો કર્યો
ફરિયાદી વિજય શંકર રસ્તોગીએ એવો દાવો કર્યો છે કે હાલમાં જ્ઞાનવાપી મસ્જિદના કેન્દ્રીય ગૂંબજના કેન્દ્રબિંદુની બરાબર નીચે ભગવાન વિશ્વેશ્વરનું સ્વઘોષિત જ્યોતિર્લિંગ છે જેમાં ગંગાજીના સ્ત્રોતમાંથી સીધું જ પાણી આવે છે. આ તમામ તથ્યોની સત્યતા માટે એએસઆઈ તરફથી સમગ્ર કેમ્પસનો વૈજ્ઞાનિક સર્વે જરૂરી છે. તેમણે કહ્યું કે કેન્દ્રીય ગૂંબજની નીચે એક મોટું મંદિર, મોટી બાઉન્ડ્રી વોલ અને ભગવાન આદિ વિશ્વેશ્વરનું ખૂબ જ જૂનું મંદિર છે.
મુઘલ શાસકે ઈંટ અને પથ્થરોની દિવાલ બનાવીને બંધ કર્યું
મુઘલ શાસકે ઈંટ અને પથ્થરની દિવાલ બનાવીને તેને ઉપરથી બંધ કરી દીધી હતી. આ જગ્યાનો સર્વે પણ કરવામાં આવ્યો નથી. ચાર ફૂટ બાય ચાર ફૂટની ટનલ બનાવવી જોઈએ અને નીચેના બેઝમેન્ટને કોઈ નુકસાન ન થાય તે રીતે રડાર ટેક્નોલોજીથી સર્વે કરવો જોઈએ.
12 માર્ચે આવશે ચુકાદો
આખા જ્ઞાનવાપી પરિસરના સર્વેની હિંદુ પક્ષની માગ પર કોર્ટે 12 માર્ચની તારીખ નક્કી કરી છે. 12 માર્ચે કોર્ટ ચુકાદો આપશે કે આખા જ્ઞાનવાપી પરિસરનો એએસઆઈ સર્વે થવો જોઈકે નહીં?
નમાજીઓના ધસારાને કારણે જ્ઞાનવાપીના ભોંયરાની છત તૂટી
શ્રીકાશી વિશ્વનાથ મંદિર ટ્રસ્ટે જ્ઞાનવાપી સંકુલમાં દક્ષિણ (વ્યાસજી) ભોંયરાના સમારકામ માટે અને પૂજારીઓની સલામતી માટે કોર્ટનો સંપર્ક કર્યો છે. સોમવારે ટ્રસ્ટ તરફથી ડિસ્ટ્રિક્ટ જજની કોર્ટમાં કરવામાં આવેલી અરજીમાં એવું જણાવાયું કે નમાજ પઢનારા આવનાર લોકોના દબાણથી ભોંયરાની છતમાંથી પથ્થરનો ટુકડો તૂટીને મૂર્તિઓની બાજુમાં પડ્યો હતો જેને કારણે ગભરાટ ફેલાયો હતો. અરજીમાં ભોંયરાની છત પર નમાજ પઢનારાની અવરવજર બંધ કરવાનું અને છતનું સમારકામ કરવાનું કહ્યું છે. પૂજારીઓએ મંદિર પ્રશાસનને આવેદનપત્ર આપીને માહિતી આપી હતી કે ભોંયરામાં પૂજા સ્થળ પાસે જર્જરિત પથ્થરની દિવાલો અને છતના કારણે છત પરથી સતત પાણી ટપકી રહ્યું છે. છતના પથ્થરના બીમમાં તિરાડ પડી ગઈ છે.
પૂજા છૂટ બાદ જ્ઞાનવાપીમાં નમાજીઓની સંખ્યામાં વધારો
31 જાન્યુઆરીએ કોર્ટે વ્યાસજીના તહખાનામાં હિંદુઓને પૂજાની છૂટ બાદ જ્ઞાનવાપીમાં નમાજીઓની સંખ્યામાં વધારો થયો છે આને કારણે દબાણ આવતાં 15 ફેબ્રુઆરીના રોજ છત હલી ગઈ હતી અને છત પરથી એક પથ્થર તૂટીને વિગ્રહ પ્લેટફોર્મની બાજુમાં જ પડ્યો હતો. આવી સ્થિતિમાં પૂજારીઓ પર ખતરો તોળાઈ રહ્યો છે. મંદિર ટ્રસ્ટે અરજીમાં એવી પણ વિનંતી કરી છે કે, છતની અંદરથી પૂજા સ્થળનું સમારકામ કરવું જરૂરી છે. નહીંતર, અપ્રિય ઘટના ગમે ત્યારે બની શકે છે.
હિંદુઓને મળી છે પૂજાની મંજૂરી
31 જાન્યુઆરીના રોજ વારાણસી જિલ્લા કોર્ટે હિંદુઓને જ્ઞાનવાપીમાં ભોંયરામાં વ્યાસજીના તહખાનામાં પૂજાની મંજૂરી આપી છે. હિદુ પક્ષનો દાવો છે કે અહિં એક જમાનામાં મંદિર હતું જેને તોડીને બાબરી બનાવાઈ હતી.
