ગુજરાત / લાભપાંચમના દિવસે જ ક્યાંક ખેડૂતોને ન બોલાવાયા તો ક્યાંક ખેડૂતો જ ન આવ્યા, કોંગ્રેસે કહ્યું- સરકારની બેદરકારી

• આજથી ટેકાના ભાવે મગફળી ખરીદીની શરૂઆત
• સરકારની બેદરકારીથી લાભ પાંચમના દિવસે ખેડૂતો હેરાન થયા: વસોયા
• સરકારી બેદરકારીના લીધે ખરીદ કેન્દ્રો શરૂ ન થયા: વસોયા
• અરવલ્લી, બનાસકાંઠા, ભાવનગરમાં ખરીદી શરૂ થઇ નથી

આજથી ટેકાના ભાવે મગફળી ખરીદીની શરૂઆત થઇ છે. જો કે હજુ પણ કેટલાક જિલ્લાઓમાં ખરીદી શરૂ નથી થઇ શકી. અરવલ્લી, બનાસકાંઠા, ભાવનગર સહિત કેટલીક જગ્યાઓ પર ટેકાના ભાવે મગફળીની ખરીદી નથી શરૂ થઇ. મેસેજના મળવાને કારણે ખરીદી શરૂ નથી થઇ. તો બીજી તરફ ખુલ્લા બજારમાં ખેડૂતોને માર્કેટિંગ યાર્ડમાં ટેકાના ભાવ કરતા વધુ પૈસા મળતા હોઈ ખેડૂતો મગફળીનું વેચાણ કરીને વધુ પૈસા કમાઈ રહ્યાં છે. તો ખરીદી ન થતા કોંગ્રેસે સરકાર પર આક્ષેપો કર્યા છે.

ખેડૂતો લાભ પાંચમના દિવસે મગફળી વેચી ન શક્યા: કોંગ્રેસ ધારાસભ્ય લલિત વસોયા

આજથી સરકાર દ્વારા ટેકાના ભાવે મગફળીની ખરીદી શરૂ કરવામાં આવી છે. જોકે મગફળી ખરીદીને લઇ કેટલીક જગ્યાઓએ તકલીફો પડતા કોંગ્રેસના ધારાસભ્ય લલિત વસોયા મેદાને આવ્યા છે. તેમણે સરકાર ઉપર નક્કર આયોજન વગર ખરીદી કરવાનો આરોપ લગાવ્યો છે. સરકારની બેદરકારીને કારણે ખરીદ કેન્દ્રો શરૂ ન થયા હોવાથી ખેડૂતો લાભપાંચમના દિવસે હેરાન થઇ રહ્યા છે. ખેડૂતો મુહૂર્તને દિવસે મગફળી ન વેચી શક્યા હોવાનો પણ લિલત વસોયાએ આરોપ લગાવ્યો હતો. સરકારે જાહેરાત કરતા પહેલા વ્યવસ્થા ગોઠવવાની જરૂર હતી.

રાજકોટ યાર્ડમાં ખેડૂતોને ન બોલાવાયા 

રાજકોટમાં જૂના માર્કેટિંગ યાર્ડ ખાતે મગફળીની ખરીદીનો પ્રારંભ થયો છે. પરંતુ એકપણ ખેડૂત વેચાણ માટે આવ્યા નથી. ખાનગી હરાજીમાં પુરતા ભાવ મળતા ખેડૂતો માર્કેટિંગ યાર્ડમાં પહોંચ્યા નથી. તો જેતપુર યાર્ડમાં ખેડૂતોને બોલાવવામાં આવ્યા નહતા. કમોસમી વરસાદ થાય તો ખેડૂતોની મગફળીને અસર થાય માટે સાવચેતીના ભાગરૂપે ખરીદી રદ કરવામાં આવી હતી. 

વરસાદની આગાહીના પગલે ભાવનગર યાર્ડમાં ખરીદી મુલતવી રખાઈ

જ્યારે ભાવનગરમાં ટેકાના ભાવે ખરીદી કરવાની શરૂ થવાની હતી. પરંતુ સૌરાષ્ટ્રમાં વરસાદની આગાહીને લઈને 6 દિવસ સુધી ટેકાના ભાવે મગફળીની ખરીદી મુલતવી રાખવામાં આવી છે. 15 નવેમ્બરથી મગફળીની ટેકાના ભાવે ખરીદી કરવામાં આવશે. પુરવઠા વિભાગને લેબર માટે કોઈ કર્મચારીઓ નહીં મળતા આજે જિલ્લામાં કોઈ જગ્યાએ મગફળીની ખરીદી નહીં થાય આ ઉપરાંત ભાવનગર જિલ્લામાં ગત વર્ષે ૧૭ હજાર ખેડૂતોએ રજિસ્ટ્રેશન કરાવ્યું હતું જે આ વર્ષે ઘટીને માત્ર 6000 ખેડૂતોએ જ ટેકાના ભાવે મગફળી નું વેચાણ કરવા માટેનું રજિસ્ટ્રેશન કરાવ્યું છે.

જૂનાગઢમાં 10માંથી એક પણ ખેડૂત મગફળી વેચવા ન આવ્યા

તો આ તરફ જૂનાગઢના ખડિયામાં ટેકાના ભાવે ખરીદી શરૂ કરવામાં આવી હતી. આજે લાંભપાંચમે મુહૂર્ત કરવા માટે 10 જેટલા ખેડૂતોને બોલાવવામાં આવ્યા હતા. પરંતુ 10માંથી એક પણ ખેડૂત મગફળી વેચવા પહોંચ્યા નહતા. જૂનાગઢમાં 1715 ખેડૂતોએ મગફળી વેચવા માટે ઓનલાઇન રજિસ્ટ્રેશન કરાવ્યું હતું. જૂનાગઢમાં મગફળની ખરીદી શરૂ છતાં ખેડૂતો ન પહોંચતા અનેક તર્કવિતર્ક થયા હતાં. જ્યારે અરવલ્લીના મોડાસામાં મગફળી ખરીદીમાં પુરવઠા વિભાગની બેદરકારી સામે આવી છે. પુરવઠા વિભાગે ટ્રાન્સપોર્ટેશન કોન્ટ્રાક્ટ જ ન કરતા ખરીદી શરૂ થઇ નહીં.

નવા વાવેતર માટે પૈસાની જરૂર હોવાથી ખુલ્લા બજારમાં મગફળી વેચી દઇએ છીએઃ ખેડૂત

લાભ પાંચમના મુહૂર્તએ રાજય સરકાર દ્વારા ખેડૂતો માટે ટેકાના ભાવે મગફળી ખરીદવાની જાહેરાત કરવામાં આવી હતી પરંતુ શરૂ ન થતા. ખુલ્લા બજારમાં ખેડૂતોને માર્કેટિંગ યાર્ડમાં ટેકાના ભાવ કરતા વધુ પૈસા મળતા હોઈ ખેડૂતો મગફળીનું વેચાણ કરીને વધુ પૈસા કમાઈ રહ્યાં છે. બીજીબાજુ માર્કેટિંગ યાર્ડમાં મગફળીનો જથ્થો વધુ પડતો હોવાથી હાલ માર્કેટિંગ યાર્ડ ફૂલ થઇ જવા પામ્યું છે. ખેડૂતોનું કહેવું છે કે નવા વાવેતર માટે બિયારણ વગેરે ખરીદવા પૈસાની જરૂર હોવાથી ખુલ્લા બજારમાં માલ વહેંચી રહ્યાં છે. ભાવનગર જિલ્લામાં ગત વર્ષે 17 હજાર ખેડૂતોએ રજિસ્ટ્રેશન કરાવ્યુ હતું. ત્યારે આ વર્ષે તેમા ઘટાડો થતા માત્ર 6000 ખેડૂતોએ જ કરાવ્યું રજિસ્ટ્રેશન

ખેડૂતોને એક સપ્તાહના બદલે મોડા રૂપિયા મળે છેઃ કિસાન સંઘ 

લાભ પાંચમે રાજ્યમાં મગફળીની ખરીદીની શરૂઆત થવાની હતી. ત્યારે ભારતીય કિસાન સંઘે સરકાર પર નિશાન સાધતા કહ્યુ કે સરકાર ટેકાના ભાવ ઓછો આપે છે. વેંહચાયેલા ભાવના રૂપિયા નબળી સિસ્ટમના કારણે અઠવાડિયાની જગ્યાએ 3 મહિને મળે છે. વળતર ઓછુ મળતુ હોવાથી ઓછા ભાવે ખેડૂત પાક વેચી નાખે છે. સરકારે પોતાની નીતિઓમા સુધારો કરવો જોઈએ તેવી ટકોર પણ કિસાન સંઘે કરી છે.

પુરવઠા વિભાગનો દાવો- 155 પૈકી 140 સેન્ટર પર મગફળીની ખરીદી શરૂ

ટેકાના ભાવે મગફળીની ખરીદી મુદ્દે પુરવઠા વિભાગે દાવો કર્યો છે કે 155 પૈકી 140 સેન્ટર પર મગફળીની ખરીદી શરૂ થઇ છે. અને નિગમ દ્વારા ટોકન સ્વરૂપે રાજ્યમાં 1 હજાર મેસેજ કરાયા હતા.