ચુકાદો / આ વખતે CBI પર ભારે પડ્યાં કપિલ સિબ્બલ, તેમના આ એક તર્કથી અને લાલુ જેલની બહાર

• આરજેડી સુપ્રીમો લાલુપ્રસાદ યાદવને કોર્ટે આપ્યાં જામીન
• દુમકા કોષાગાર કેસમાં ઝારખંડ હાઈકોર્ટે આપ્યા જામીન
• હાલમાં લાલુની દિલ્હીની એમ્સમાં સારવાર ચાલી રહી છે

કોર્ટે કપિલ સિબ્બલની દલીલ માન્ય રાખી 

કોર્ટમાં લાલુપ્રસાદ યાદવના વકીલ અને કોંગ્રેસ નેતા કપિલ સિબ્બલે એવી દલીલ કરી કે લાલુએ છ એપ્રિલે અડધી સજા પૂરી કરી લીધી છે. કોર્ટે 19 ફેબ્રુઆરીએ સ્વીકાર્યું હતું કે લાલુની અડધી સજા પૂરી થવામાં એક  મહિનો અને 17 દિવસ ઓછા છે. બીજી તરફ સીબીઆઈ તરફથી લાલુની જામીન અરજીનો જોરદાર વિરોધ કરવામાં આવ્યો. સીબીઆઈના વકીલે કોર્ટને જણાવ્યું કે આઈપીસીમાં સાત વર્ષ અને પીસી એક્ટમા સાત વર્ષની સજા અપાઈ છે જે અલગ અલગ ચાલશે એટલે લાલુને કુલ 14 વર્ષની સજા થઈ છે. તેથી લાલુની જામીન અરજી ફગાવી દેવામાં આવે.

કોર્ટે સીબીઆઈની દલીલ ફગાવી

જોકે કોર્ટે સીબીઆઈની આ દલીલને ફગાવી દઈને લાલુપ્રસાદને શરતી જામીન આપ્યાં હતા. ઉલ્લેખનીય છે કે લાલુને ચાઈબાસાના બે, દેવઘર અને દુમકા કેસમાં નીચલી કોર્ટ તરફથી સજા મળી છે. આ ત્રણ કેસમાં તેમને પહેલેથી જામીન મળ્યાં છે અને હવે તેઓ દુમકા કોષાગાર મામલમાં જામીન પર મુક્ત થયા છે. જામીન મળ્યાં બાદ લાલુ જેલમાંથી બહાર આવી શકશે. જોકે હાલમાં લાલુ દિલ્હીની એમ્સમાં સારવાર લઈ રહ્યાં છે. 

લાલુ હાલમાં દિલ્હી એમ્સમાં સારવાર હેઠળ 

રાંચીના રિમ્સમાં સારવાર લઇ રહેલા લાલૂ પ્રસાદ યાદવની હાલત ચિંતાજનક બની હતી. લાલૂના દીકરા તેજસ્વી અનુસાર તેમની છાતીમાં પાણી ભરાઇ ગયું છે અને તેમનો ચેહરો ફૂલી ગયો હતો. લાલૂ યાદવની હાલત જોતા તેમને એર એમ્બ્યુલન્સ દ્વારા દિલ્હી સ્થિતિ એઇમ્સમાં લઇ જવાયા. જ્યાં તેમની સારવાર કરાઈ રહી છે. લાલૂ યાદવ રાંચીના રિમ્સથી એર એમ્બ્યુલન્સથી દિલ્હી પહોંચ્યા. AIIMSના કાર્ડિયો ન્યૂરો સેન્ટરમાં દાખલ કરાયા હતા.