- હરિયાણાના ગુરુગ્રામમાં બહાર આવ્યો ચોંકાવનારો કિસ્સો
- 3 વર્ષ બાદ મહિલા અને તેનો સગીર પુત્ર ઘરની કેદમાંથી આવ્યાં બહાર
- કોરોનાની બીકે 2020ની સાલમાં પુત્ર સાથે ઘરમાં પુરાઈ ગઈ હતી
- પતિને પણ અંદર આવવા દેતી નહોતી, ઘર બહાર ભાડે રહીને ઘર ચલાવતો
હરિયાણાના ગુરુગ્રામના ચક્કરપુરમાં એક ભાડાના મકાનમાં 33 વર્ષીય મહિલાએ તેના સગીર પુત્ર સાથે પોતાની જાતને ત્રણ વર્ષ સુધી "કેદ" રાખી હતી. તેમણે કોરોના મહામારીથી બચવા માટે આવું કર્યું હતું. પોલીસના જણાવ્યા અનુસાર મંગળવારે આ ઘટના ત્યારે સામે આવી જ્યારે અધિકારીઓની ટીમે બંનેને ઘરની બહાર કાઢ્યા. બાદમાં માતા-પુત્રને ગુરુગ્રામની સિવિલ હોસ્પિટલમાં લઈ જવામાં આવ્યા હતા. સિવિલ સર્જન ગુરુગ્રામના જણાવ્યા અનુસાર, "મહિલાને કેટલીક માનસિક સમસ્યાઓ છે. આ મામલો 17 ફેબ્રુઆરીએ ત્યારે પ્રકાશમાં આવ્યો હતો જ્યારે મુનમુનના પતિ સુજાન માંઝીએ ચકરપુર પોલીસ ચોકીમાં તૈનાત સહાયક સબ-ઇન્સ્પેક્ટર પ્રવીણ કુમારનો સંપર્ક કર્યો હતો. સુજાન એક ખાનગી કંપનીમાં એન્જિનિયર છે.
2020મા કોરોના વખતે પુત્રને લઈને ઘરમાં પુરાઈ ગઈ
પોલીસના જણાવ્યા અનુસાર, પોતાના પુત્ર સાથે ત્રણ વર્ષ સુધી પોતાની જાતને "કેદ" કરતી વખતે, મહિલાએ તેના પતિને, જે 2020 માં પ્રથમ લોકડાઉન પ્રતિબંધો હળવા કરવામાં આવ્યા બાદ ઓફિસ ગયો હતો, તેને ઘરમાં પ્રવેશવાની મંજૂરી આપી ન હતી.
3 વર્ષ સુધી પતિએ શું કર્યું
પતિ સુજાને શરૂઆતના કેટલાક દિવસો મિત્રો અને સંબંધીઓ સાથે વિતાવ્યા હતા અને જ્યારે તે તેની પત્નીને સમજાવવામાં નિષ્ફળ ગયો, ત્યારે તેણે તે જ વિસ્તારમાં બીજા ભાડાના મકાનમાં રહેવાનું શરૂ કર્યું. પતિના જણાવ્યા પ્રમાણે આ સમય દરમિયાન પત્ની અને પુત્રના સંપર્કમાં રહેવા માટે વીડિયો કોલ જ એકમાત્ર રસ્તો હતો. આ સમય દરમિયાન તે ઘરનું ભાડું અને વીજળીનું બિલ ચૂકવતો હતો. તે પોતાના દીકરાની સ્કૂલની ફી પણ જમા કરાવી દેતો હતો એટલું નહી પરંતુ કરિયાણું અને શાકભાજી ખરીદતો અને પોતાની પત્નીના ઘરના મુખ્ય દરવાજાની બહાર રાશનની થેલીઓ મૂકી જતો.
7 વર્ષના પુત્ર સાથે ઘરમાં પુરાઈ, આજે બહાર આવી
મહિલા 2020ના પહેલા લોકડાઉન વખતે 7 વર્ષના પુત્ર સાથે ઘરમાં પુરાઈ ગઈ હતી તે હવે બહાર આવી છે પુત્રની ઉંમર 10 વર્ષ થઈ છે. બાળકની માતા ઘરે જ તેના વાળ અને વાળ કાપતી હતી. ઘરનો કચરો પણ 3 વર્ષ સુધી બહાર ન ફેંકાયો, કચરો, કાપેલા વાળ અને ગંદકી એ જ રૂમમાં સંગ્રહિત કરવામાં આવી હતી જ્યાં બાળક રહેતું હતું. પાડોશના લોકોને પણ ખબર ન હતી કે માતા-પુત્ર ઘરમાં કેદ છે. ઘરમાં બાળક દિવાલો પર પેઇન્ટિંગ બનાવીને દિવાલો પર પેન્સિલથી અભ્યાસ કરતો હતો.
પોલીસ મહિલા અને તેના પુત્રને છોડાવીને બહાર લાવી
એએસઆઈ પ્રવીણ કુમારે કહ્યું, "શરૂઆતમાં, મને સુજનના દાવાઓ પર વિશ્વાસ ન હતો, પરંતુ જ્યારે તેણે તેની પત્ની અને પુત્રને મારી સાથે વીડિયો કોલ પર વાત કરાવી, ત્યારે મેં આ મામલે દખલ કરી. મહિલા જે ઘરમાં રહેતી હતી ત્યાં એટલી ગંદકી અને કચરો હતો કે થોડા દિવસ વધુ પસાર થઈ ગયા હોત તો કંઈક અઘટિત ઘટના બની હોત. કોવિડના ડરને કારણે મહિલાએ આ ત્રણ વર્ષ દરમિયાન રસોઈ ગેસ અને સંગ્રહિત પાણીનો પણ ઉપયોગ કર્યો ન હતો. ત્રણ વર્ષ બાદ પત્ની અને પુત્રને મેળવીને સુજાન ખુબ જ ખુશ છે, તેમણે આ માટે પોલીસનો આભાર માન્યો હતો. "હવે તેની સારવાર ચાલી રહી છે. આશા છે કે, ટૂંક સમયમાં જ મારું જીવન પાટા પર આવી જશે.
