શરમજનક / રડવાના અવાજથી ઊંઘ ખરાબ થતા પિતાએ દોઢ મહિનાના બાળકને માર્યો ઢોર માર, પત્નીએ ઘરે આવીને જોયુ તો....

• પિતાએ કરી પુત્રની હત્યા 
• રડવાના અવાજથી ઊંધ બગડવાથી કરી હત્યા 
• હત્યા બાદ પિતા થઈ ગયો ફરાર 

દિલ્હીની નજીક આવેલા ફરીદાબાદમાં હત્યાનો એક સનસનીખેજ મામલો સામે આવ્યો છે. ઓલ્ડ ફરીદાબાદના રાજીવ નગર વિસ્તારમાં એક પિતાએ ઊંઘ ખરાબ થવાથી નારાજ થઈને પોતાના ડોઢ મહિનાના દિકરાની માર મારીને હત્યા કરી દીધી. મૃતક બાળકના મામાએ આ આરોપ લગાવ્યો છે.

હાલ પોલીસે મૃતકની માતાની ફરિયાદના આધારે આરોપી પિતા વિરુદ્ધ ગુનો નોંધી તપાસ શરૂ કરી છે. જોકે આરોપી પિતા હજુ ફરાર છે, જેને પોલીસ ટૂંક સમયમાં પકડી લેવાનો દાવો કરી રહી છે.

બાળકના રડવાથી બગડી હતી પિતાની ઊંઘ 
માસુમ બાળકની હત્યાથી સમગ્ર વિસ્તારમાં સનસની ફેલાઈ ગઈ છે અને લોકો પિતાની જલ્દીથી ધરપકડ કરવામાં આવે તેવી માંગ કરી રહ્યા છે. બાળકની માતાએ તેના પતિ પર પુત્રની હત્યાનો આરોપ લગાવ્યો છે અને તેણે જણાવ્યું કે દોઢ મહિના પહેલા તેમને બે જોડિયા બાળકો જન્મ્યા હતા. તેણે કહ્યું કે શુક્રવારે તે ફરીદાબાદની બસેલવા કોલોનીમાં તેના ભાઈને રાખડી બાંધવા ગઈ હતી, પરંતુ તેના એક પુત્રને તેના પતિએ ઘરે જ રાખી લીધો હતો. 

મૃત હાલતમાં મળ્યું બાળક
જ્યારે મૃતકની માતા રાખડી બાંધીને પરત આવી ત્યારે તેનું બાળક મૃત હાલતમાં પડેલું હતું અને પતિ ઘટનાસ્થળેથી ફરાર થઈ ગયો હતો. પાડોશીઓએ જણાવ્યું કે બાળક રડતો હતો અને જ્યારે તેઓએ જઈને જોયું તો બાળકના મોં અને નાકમાંથી લોહી નીકળતું હતું. આ પછી આરોપી પિતા સ્થળ પરથી ફરાર થઈ ગયો હતો. 

બીજી તરફ બાળકના મામાએ આરોપ લગાવ્યો હતો કે બાળકની હત્યાનો આરોપી પિતા સુંદર રાત્રે ગાડી પાસિંગનું કામ કરે છે અને દિવસે સૂઈ જાય છે. જ્યારે બાળક સૂતી વખતે રડવા લાગ્યો ત્યારે ઊંઘ બગડવાના કારણે તેને ગુસ્સો આવ્યો અને તેણે બાળકને ઢોર માર માર્યો. આ પછી પકડાઈ જવાના ડરથી તે સ્થળ પરથી ભાગી ગયો હતો.

હત્યા બાદ ફરાર છે આરોપી 
પોલીસે પરિવારના આરોપના આધારે આરોપી પિતા વિરુદ્ધ ગુનો નોંધ્યો છે. પોલીસે હાલ દરોડા પાડી આરોપીની શોધખોળ શરૂ કરી છે. જો કે આ ઘટના બાદ કળિયુગી પિતાને સજા આપવાની માંગ વધી રહી છે અને વિસ્તારના લોકો પીડિત પરિવારને સાંત્વના આપવા ઘરે પહોંચી રહ્યા છે.