- વધતી જતી માંગ વચ્ચે દેશમાં વીજ સંકટ ઘેરાયું
- દેશના 85 પાવર પ્લાન્ટ્સમાં કોલસો ખતમ!
- મંગળવારે એક દિવસમાં જ વીજળીની સૌથી વધુ માંગ 201.066 GW નોંધવામાં આવી
ઉનાળામાં તાપમાનમાં વધારો થતાં જ દેશમાં વીજળીનું સંકટ પણ ઘેરી બની રહ્યું છે. દેશમાં વીજળીની માંગ રેકોર્ડ સ્તરને પાર કરી ગઈ છે. ત્યારે હવે પરિસ્થિતિ એવી સર્જાઇ છે કે, દેશના 85 પાવર પ્લાન્ટમાં કોલસો ખતમ થઈ રહ્યો છે. કાળઝાળ ગરમી વચ્ચે હવે દેશમાં વીજ સંકટની ભીતિ વર્તાવા લાગી છે. દેશમાં વીજળીની માંગ એટલી વધી ગઈ છે કે મંગળવારે વીજળીની માંગનો નવો રેકોર્ડ સર્જાયો હતો. મંગળવારે એક દિવસમાં જ વીજળીની સૌથી વધુ માંગ 201.066 GW નોંધવામાં આવી હતી.
વીજળીની માંગે ગયા વર્ષનો રેકોર્ડ તોડ્યો
દેશમાં વીજળીની માંગ એટલી હદે વધી ગઇ છે કે વીજળીની માંગનો એક નવો જ રેકોર્ડ સર્જાયો છે અને તેણે ગત વર્ષનો રેકોર્ડ તોડી નાખ્યો છે. ગયા વર્ષે 200.539 ગીગાવોટની માંગ નોંધાઈ હતી જ્યારે આ વર્ષે 201.066 ગીગાવોટની માંગ નોંધાઈ છે. હજુ એપ્રિલ મહિનો પૂરો નથી થયો ત્યાં તો આવી સ્થિતિ સર્જાઇ ગઇ છે તો મે અને જૂનમાં આ માંગ વધીને 215-220 GW થઈ શકે છે.
કોલસો નહીં તો વીજળી નહીં!
દેશભરના 85 પાવર પ્લાન્ટમાં કોલસાની સમસ્યા સર્જાઈ છે. જે આવનારા સમયમાં પાવર કટના રૂપમાં જોવા મળી શકે છે. પાવર પ્લાન્ટની ફરિયાદ છે કે રેલ રેકની અછતના કારણે કોલસો મેળવવામાં વિલંબ થઈ રહ્યો છે. આ બાબતે રેલવે પ્રવક્તા ગૌરવ બંસલનું કહેવું છે કે, પહેલાં 300 રેક આપવામાં આવતા હતા, હવે કોલસા મંત્રાલયના કહેવા પર 405 રેક આપવામાં આવ્યાં. હવે અમે 415 રેક આપી રહ્યાં છીએ કે જેની પર કોલસા મંત્રાલય સંમત છે. જો કોલસાના રેકને પાંચ દિવસ સુધી ડિટેઇન કરવામાં નહીં આવે અને ત્રણ દિવસ માટે રોકવામાં આવે તો અમે રેકને વધારે વધારી શકીએ છીએ. દેશભરના થર્મલ પાવર પ્લાન્ટમાં કોલસાનો સ્ટોક એક વાર ફરી ચર્ચામાં છે. કોલસાના અપૂરતા પરિવહનના કારણે આવું થયું હોવાનો આક્ષેપ કરવામાં આવી રહ્યો છે.
જાણો શું છે મુખ્ય થર્મલ પાવર પ્લાન્ટની સ્થિતિ!
જો આપણે દેશના મોટા થર્મલ પાવર પ્લાન્ટ્સની વાત કરીએ તો, સમગ્ર દેશમાં એકંદરે 85 થર્મલ પાવર પ્લાન્ટ્સ કોલસો ખતમ થવાના આરે છે, જેમાંથી રાજસ્થાનમાં 7માંથી 6, પશ્ચિમ બંગાળના તમામ 6, ઉત્તર પ્રદેશમાં 4માંથી 3, મધ્ય પ્રદેશના 4માંથી 3 પ્લાન્ટ, મહારાષ્ટ્રમાં 7માંથી 7 અને આંધ્ર પ્રદેશના તમામ 3 પ્લાન્ટમાં કોલસાનો સ્ટોક ગંભીર સ્થિતિએ પહોંચી ગયો છે.
યુપી પાસે માત્ર સાત દિવસનો જ સ્ટોક બચ્યો છે
એવું કહેવાય છે કે, યુપી પાસે માત્ર સાત દિવસનો જ સ્ટોક બચ્યો છે. હરિયાણા પાસે આઠ, રાજસ્થાન પાસે માત્ર 17 દિવસનો જ કોલસો સ્ટોકમાં છે. આંધ્રપ્રદેશ, તમિલનાડુ, તેલંગાણા, મધ્યપ્રદેશ, મહારાષ્ટ્ર, ગુજરાત, ઝારખંડ અને છત્તીસગઢમાં પણ આવી જ સ્થિતિ છે. રેલ્વે પાસે રેકના અભાવે પણ સંકટમાં વધારો થયો છે. રેલવે પાસે હાલમાં માત્ર 412 રેક છે, જેના કારણે કોલસાની અવરજવર ઝડપી નથી થઈ રહી. યુપીના ઉર્જામંત્રી એકે શર્માએ અધિકારીઓ સાથે બેઠક કરીને વીજળી સંકટ પર મંથન કર્યું છે.
