- સુરતમાંથી લીધેલા દવાના સેમ્પલ ફેલ
- પ્રોટીન અને વિટામિનની દવાના સેમ્પલ ફેલ
- લોકોના આરોગ્ય સાથે ચેડા કેમ?
સુરતમાં પેસ્ટ્રી, પનીર, માયોનીઝ બાદ હવે દવાના સેમ્પલ પણ ફેલ થયા છે. જે બાદ સુરતીઓમાં ભારે હડકંપ મચી ગયો છે. સુરત મહાનગરપાલિકાની આરોગ્ય વિભાગની ટીમ દ્વારા વિવિધ મેડકલોમાંથી લેવામાં આવેલા દવાના સેમ્પલ ફેલ થયા છે. મહાનગરપાલિકાની તપાસમાં શારીરિક તંદુરસ્તી માટે લેવામાં આવતી હેલ્થ સપ્લિમેન્ટની દવાઓ પણ સુરક્ષિત ન હોવાનું સામે આવ્યું છે. તપાસમાં પ્રોટીન અને વિટામિનની દવાના સેમ્પલ ફેલ થયા છે. જે બાદ લોકોમાં ભારે રોષ જોવા મળી રહ્યો છે.
વિવિધ મેડિકલોમાં હાથ ધરાયું હતું ચેકિંગ
ઉનાળાને ધ્યાને રાખીને સુરતના આરોગ્ય વિભાગ દ્વારા સતત તપાસ કરવામાં આવી રહી છે. જે અંતર્ગત સુરત આરોગ્ય વિભાગ દ્વારા શહેરના વિવિધ મેડિકલોમાં ચેકિંગ હાથ ધરવામાં આવ્યું હતું. શહેરના શાહપોર, મગોબની, બામરોલી સહિતના વિસ્તારોમાં આરોગ્ય વિભાગે સર્ચ હાથ ધર્યું હતું. આ દરમિયાન કેટલાક મેડિકલોમાં તંદુરસ્તી માટે લેવામાં આવતી દવામાં પણ મિલાવટ હોવાનું સામે આવ્યું હતું.
4 મેડિકલોમાંથી લીધેલા સેમ્પલ ફેલ
આરોગ્ય વિભાગે શહેરના 9 જેટલા ઝોનમાંથી 18 જેટલી મેડિકલોમાંથી સેમ્પલ લીધા હતા. જેમાંથી ચાર મેડિકલોમાંથી લેવામાં આવેલા સેમ્પલ ફેલ જતાં કાર્યવાહી કરવામાં આવી હતી. દવામાં વિટામીનની જેટલી માત્રા હોવી જોઈએ તેના કરતાં ઓછી હોવાની વિગતો સામે આવી હતી. આરોગ્ય વિભાગની તપાસમાં શાહપોરની આશિષ મેડિકલના સેમ્પલ ફેલ ગયા છે. જ્યારે મગોબની જય અંબે કેમિસ્ટ, બામરોલીની એસ.એચ.કેમિસ્ટની દવાના સેમ્પલ ફેલ થતાં મનપાએ તમામ વિરુદ્ધ કાર્યવાહી હાથ ધરી છે. મનપા દ્વારા એકને દંડ ફટકારવામાં આવ્યો છે. જ્યારે 3 ફરિયાદ નોંધાવવાની કામગીરી હાથ ધરવામાં આવી છે.
ખાણીપીણીના વિવિધ એકમો પર પાડ્યા હતા દરોડા
આપને જણાવી દઈએ કે, થોડા દિવસ અગાઉ જ આરોગ્ય વિભાગની તપાસ દરમિયાન પિઝા હટ, લા-પીનોઝ, ડોમિનોઝ પિઝા, ગુજ્જુ કાફે સહિતની ફ્રેન્ચાઈઝીસના નમૂના ફેલ થયા હતા. જેથી આરોગ્ય વિભાગની ટીમે 40 કિલો અખાદ્ય જથ્થાનો નાશ કર્યો હતો. સુરતના આરોગ્ય વિભાગની તપાસમાં ચીઝ અને માયોનીઝની ગુણવત્તા ધારા ધોરણ પ્રમાણે ન હોવાનું સામે આવતા 40 કિલો ચીઝ અને માયોનીઝનો નાશ કરવામાં આવ્યો હતો.
પિઝા હટ, લા-પીનોઝ સહિતના નમૂના ફેલ
સુરત શહેરમાં પોશ ગણાતા એવા ઘોડદોડ રોડ અને પીપલોદ જેવા વિસ્તારોમાં ખાણીપીણીના વિવિધ એકમો પર આરોગ્ય વિભાગે દરોડા પાડ્યા હતા અને ખાદ્ય પદાર્થોના નમૂના લઈને ટેસ્ટિંગ માટે લેબોરેટરીમાં મોકલ્યા હતા. આ દરમિયાન પિઝા હટ ઘોડદોડ રોડ, લા-પીનોઝ પિઝા પાલનપોર, કેએસ ચારકોલ પીપલોદ, ડેન્સ પિઝા અડાજણ, ગુજ્જુ કાફે જહાંગીરાબાદ, ડોમિનોસ પિઝા ભરથાણાના નમૂના ફેલ ગયા હતા.
સળગતા સવાલ
- લોકોના આરોગ્ય સાથે ચેડા કોણ કરે છે?
- કોના પાપે લોકોને અયોગ્ય દવા મળે છે?
- ખરાબ દવાનું વેચાણ કરનારા વિરુદ્ધ કાર્યવાહી થશે?
- લોકોને અયોગ્ય દવા કેમ આપવામાં આવે છે?
- થોડા રૂપિયાના નફા માટે લોકોના આરોગ્ય સાથે ચેડા કેમ?
- રાજ્યના બીજા શહેરમાં દવાના સેમ્પલ લેવામાં આવશે?
- અયોગ્ય દવાનું વેચાણ કરનારા વિરુદ્ધ દાખલારૂપ કાર્યવાહી થશે?
