સપનું સાકાર / માત્ર 12 કલાકમાં દિલ્હી TO મુંબઈ: 1 લાખ કરોડના એક્સપ્રેસ વેનું 70% કામ પૂર્ણ, ગુજરાતમાંથી થાય છે પસાર

• દિલ્હી સાથે હવે મુંબઈનું સીધું જોડાણ થશે
• દિલ્હી-મુંબઇ એક્સપ્રેસ વેનું કામ 70 ટકા પૂર્ણ
• 1350 કિલોમીટર લાંબો આ પ્રોજેક્ટ 1 લાખ કરોડ રૂપિયામાં પૂર્ણ થશે 

70 ટકા કાર્ય પૂર્ણ
દિલ્હી-મુંબઇ એક્સપ્રેસ વેનું કામ 70 ટકા પૂર્ણ થઇ ગયું છે. હવે માત્ર 30 ટકા કામ બાકી રહ્યું છે. આગામી વર્ષ એટલે 2023થી આ એક્સપ્રેસ વે વાહનોના પરિવહન માટે ખુલો મૂકી શકાશે. 1350 કિલોમીટર લાંબો આ પ્રોજેક્ટ 1 લાખ કરોડ રૂપિયાનો છે. આ એક્સપ્રેસ વે બન્યા બાદ દિલ્હી-મુંબઇ વચ્ચેનું અંતર ઘટી જશે અને મુસાફરીનો સમય પણ ઘણો ઓછો થશે.

દિલ્હી સીધું જોડાશે મુંબઈ સાથે
માર્ગ પરિવહન અને રાજમાર્ગ મંત્રી નીતિન ગડકરીના એક આયોજિત કાર્યક્રમ દિલ્હી-મુંબઈ એક્સપ્રેસ વેની પ્રગતિ વિશે માહિતી આપી છે. તેમણે કહ્યું હતું કે, મુંબઈનાં નરીમન પોઇન્ટથી દિલ્હી સુધી અવિરત જોડાણનું સપનું પૂર્ણ થવા જઈ રહ્યું છે. દિલ્હી મુંબઈ એક્સપ્રેસ વે હરિયાણા, ગુરુગ્રામના રાજીવ ચોકથી શરૂ થશે અને મેવાત, જયપુર કોટા, ભોપાલ અને અમદાવાદ થઈને મુંબઈ જશે.

 

The 8 lane greenfield Delhi-Mumbai Expressway will be the longest expressway in India and is being constructed at record pace. pic.twitter.com/IMyA9gMXzp

— Nitin Gadkari (@nitin_gadkari) January 25, 2021

માત્ર 12 કલાકમાં દિલ્હીથી મુંબઈ
માર્ગ પરિવહન મંત્રાલયના જણાવ્યા અનુસાર, દિલ્હીથી મુંબઈ જવા માટે 20 કલાકને જગ્યાએ 12 કલાકનો સમય લાગશે. આ રીતે એક્સપ્રેસ વે દ્વારા લોકો પોતાના અંગત વાહનો દ્વારા સરળતાથી મુસાફરી કરી શકશે. આનાથી તેમનો સમય તો બચશે સાથે સાથે ટ્રેનો અને ફ્લાઇટ્સ પર લોકોની નિર્ભરતા પણ ઓછી થશે.

એક્સપ્રેસ વેનું અંતર 1350 કિમી
લોકો ત્યારપછી ટ્રેનના બદલે રોડ રૂટ પણ પસંદ કરશે. હાલ દિલ્હી-મુંબઈ રોડથી 1450 કિમીનું અંતર છે. એક્સપ્રેસ વેથી આ અંતર ઘટીને 1350 થઈ જશે. એક્સપ્રેસને જાન્યુઆરી 2023 સુધીમાં તૈયાર કરવાનું લક્ષ્ય છે. મુંબઈ-દિલ્હી એક્સપ્રેસ વેને જવાહરલાલ નહેરુ પોર્ટ ટ્રસ્ટ સુધી લંબાવવામાં આવશે.

માલવાહક વાહનોને ખર્ચો બચશે
1350 કિલોમીટર લાંબા એક્સપ્રેસ વે શરૂ થયા બાદ દરરોજ 8.76 લાખ લિટર અને વાર્ષિક આશરે 320 મિલિયન લિટર પેટ્રોલની બચત થશે. માર્ગ પરિવહન મંત્રાલયના જણાવ્યા અનુસાર, આ એક્સપ્રેસ વે પરથી માલ પરિવહનનો ખર્ચ ઓછો થશે. આ રીતે એક્સપ્રેસ વે અને આસપાસના શહેરોમાં લોજિસ્ટિક્સ ખર્ચ 8થી 9 ટકા બચશે.

12 લેન હશે 
નેશનલ હાઇવે ઓથોરિટી ઓફ ઇન્ડિયાના જણાવ્યા અનુસાર એક્સપ્રેસ વેને એવી રીતે ડિઝાઇન કરવામાં આવશે કે જરૂર પડ્યે તેને 8 લેનમાંથી 12 લેનમાં સરળતાથી અપગ્રેડ કરી શકાય. 1350 કિલોમીટરનો એક્સપ્રેસ વે 20 કિ.મી.ના રિઝર્વ ફોરેસ્ટથી ચાલશે. એટલે કે, વૃક્ષોને ઓછામાં ઓછા કાપવા પડશે.