તાપી શુદ્ધિકરણ / અમદાવાદની જેમ સુરતમાં પણ બનશે શાનદાર રિવરફ્રન્ટ, સી.આર.પાટીલનું મોટું નિવેદન

• તાપી શુદ્ધિકરણને લઇ સી.આર.પાટીલનું નિવેદન
• રાજ્ય સરકાર દ્વારા 900 કરોડ રૂપિયાનું ટેન્ડર કરાવ્યું
• હવે સુરતમાં પણ ચમકશે અમદાવાદની જેમ રિવરફ્રન્ટ

અમદાવાદના રિવરફ્રન્ટની જેમ હવે સુરતનું પણ રિવરફ્રન્ટ ચમકશે. ત્યારે તાપી શુદ્ધિકરણને લઇને સી.આર.પાટીલે મહત્વનું નિવેદન આપ્યું છે. તાપી શુદ્ધિકરણ માટે ટેન્ડરર સાથે સૌથી મોટું કામ કરાશે. ટેન્ડરરને એક પણ રૂપિયો ચૂકવ્યા વગર તાપી ઉંડી કરવાનું આયોજન છે. ટેન્ડરર પાસે રોયલ્ટીના રૂપિયા ન લઇને 21 કીમી લાંબી તાપી ઉંડી કરાશે. રાજ્ય સરકાર દ્વારા 900 કરોડ રૂપિયાનું ટેન્ડર કરાવ્યું છે.'

લગભગ 20 ફૂટ સુધી આ નદીને ઊંડી પણ કરી આપશે : પાટીલ

સી.આર પાટીલે જણાવ્યું કે, 'પૂર આવે છે તો પાણી ઉભરાઇ જાય છે એટલી ડેપ્થ તો ઓછી થઇ ગઇ છે, એનું પણ હમણાં રાજ્ય સરકાર દ્વારા એક ટેન્ડર કરવામાં આવ્યું. અને ટેન્ડરમાં છૂટછાટ આપી. જે મોટા-મોટા ટેન્ડરો આવતા હતાં એમને કહ્યું રેતી અમારો બિઝનેસ નથી, પરંતુ તેમની પાસે ખૂબ મોટી-મોટી મશીનરી છે, એમને કહ્યું કે આ રોયલ્ટી અમે ફાળવવા જઇએ, રોજ અમારે માથાકૂટ કરવી, અમે કામ કરીએ પરંતુ અમને તમે પૈસા નથી ચૂકવતા, પરંતુ અમે રોયલ્ટીના પણ પૈસા નહીં આપીએ અને સરકારે નિર્ણય કર્યો કે રોયલ્ટીના પૈસા નહીં માંગીએ. સાથે-સાથે ટેન્ડરરને એક પણ રૂપિયો સરકાર કે કોર્પોરેશન ચૂકવશે નહીં. એ રેતી કાઢશે. સાથે-સાથે 23 કિમીની લંબાઇમાં, લગભગ 20 ફૂટ સુધી આ નદીને ઊંડી પણ કરી આપશે અને 10 વર્ષ સુધી તેનું મેન્ટેનન્સ પણ કરશે.'

સુરતમાં રિવરફ્રન્ટ પ્રોજેક્ટ માટે 3904 કરોડના ખર્ચનો અંદાજો

અમદાવાદની જેમ સુરતમાં પણ શાનદાર રિવરફ્રન્ટ બનશે. આ પ્રોજેક્ટની વિગતો એવી છે કે, રૂંઢ અને ભાઠા વચ્ચે બેરેજ બની જતાં પાણીથી ભરેલી તાપી નદીના બંને તરફ આવેલા અને સુરત શહેરમાંથી પસાર થતાં ૩૩ કિ.મી.ના પટ એટલે કે 66 રનિંગ કિ.મી. વિસ્તારને આકર્ષક બનાવવા માટે રિવર ફ્રન્ટ ડેવલપમેન્ટનું આયોજન કરાયું છે. આ પ્રોજેક્ટ માટે 3904 કરોડના ખર્ચનો અંદાજો લગાવાયો છે.