એક્શન / રાજકોટના જે યુવાનને કોરોના થયો તેના વિસ્તારમાં 250 આરોગ્ય કર્મીઓની તપાસ, જાણો શું કરી રહી છે ટિમ

• મક્કા મદીનાથી પરત ફરેલા યુવકનો કોરોના વાયરસ 
• આરોગ્ય તંત્રની 40 ટિમો દ્વારા જંગલેશ્વર વિસ્તારમાં હેલ્થ ચેકિંગ
• રાજકોટ શહેરમાં કલમ 144 લાગૂ કરાઈ

આ યુવક 7 માર્ચના રોજ મક્કા મદીનાથી ઉમરા પઢી યુવાન મુંબઇ પહોંચ્યો હતો. 8 માર્ચના મુંબઇથી રાજકોટ તેઓ ટ્રેન મારફત પહોંચ્યો હતો. મહત્વનું છે કે યુવાન પરિવારજનો સહિત 11 લોકો સાથે મક્કા મદીના ગયો હતો. 

રાજકોટમાં તેને સતત તાવ, શ્વાસ લેવામાં તકલીફ જેવી ફરીયાદ હતી. સાથે પ્રાથમિક સારવાર લેવા તે લોટસ હોસ્પિટલ પહોંચ્યો હતો. લોટસ હોસ્પિટલથી તેને સિવિલ હોસ્પિટલમાં રીફર કરાયો છે. 18 માર્ચના જામનગર સિવિલ હોસ્પિટલમાં આઇસોલેશન વોર્ડમાં તેને દાખલ કરવામાં આવ્યો હતો. ગુરૂવારે 19 માર્ચની સાંજે કોરોના વાયરસ પોઝીટીવની સત્તાવાર જાહેરાત કરવામાં આવી હતી. દેવપરામાં આવેલ ક્લિનીકમાં ડૉક્ટર જેઓએ તેમને પ્રાથમિક તપાસ કરી હતી તેઓ બીમાર પડતા તેમને પણ કવોરન્ટાઇન કરાયા છે. અને તેમના બ્લડ સેમ્પલ લેવાયા છે. ડૉક્ટર સહિત અન્ય 4 લોકોના પણ નમૂના લેવાયા છે. 

રાજકોટ જિલ્લાના આરોગ્ય તંત્રની 40 ટિમો દ્વારા જંગલેશ્વર વિસ્તારમાં હેલ્થ ચેકિંગ

રાજકોટમાં કોરોનાનો પોઝિટિવ કેસ નોંધાતા સમગ્ર ટિમ સતર્ક થઇ હતી. ત્યારબાદ રાજકોટ જિલ્લાના આરોગ્ય તંત્રની 40 ટિમો જંગલેશ્વર વિસ્તારમાં હેલ્થ ચેકિંગ માટે ગઇ હતી. જેમાં 250થી વધારે આરોગ્ય કર્મીઓએ યુવાનનું ઘર અને તેની સાથે ગયેલા તમામ લોકોનું ચેકઅપ કર્યું હતું. સાથે આસપાસના 15 ઘરોના તમામ સભ્યોના ટેસ્ટ કરાયા છે. તેની સાથે સાથે જંગલેશ્વર વિસ્તારના તમામ ઘરોને સતર્ક રહેવાની સૂચના અપાઇ છે. યુવાન સાથે મક્કા ગયેલા લોકોને કવોરન્ટાઇન કરાયા છે. અત્યાર સુધી તે વેન્ટિલેટર પર હતો પરંતુ તે હવે સામાન્ય શ્વાસોશ્વાસ ચાલી રહ્યા છે.

રાજકોટના કોરોનાના દર્દી સાથે આવેલા મુસાફરોની તપાસ કરવામાં આવી રહી છે. દર્દી સાથે ટ્રેનની મુસાફરીમાં જામનગરના મુસાફર પણ સાથે હતા. તંત્રએ મુસાફરો સુધી પહોંચવા કાર્યવાહી ધરી છે. શહેરના લાખોટા લેક, બાલા હનુમાન મંદિર, સૈફી મસ્જિદ બંધ કરી દેવામાં આવી છે.

રાજકોટ શહેરમાં કલમ 144 લાગૂ કરાઈ

કોરોનાનો પોઝિટીવ કેસ નોંધાતા સ્થાનિક તંત્ર દ્વારા રાજકોટમાં 144 લાગૂ કરી દેવામાં આવી છે. પોલીસ કમિશનરે શહેરવાસીઓ માટે બહાર જાહેરનામુ પાડ્યુ છે. 4 કરતા વધુ લોકોના એકઠા થવા પર પ્રતિબંધ મુકાયો છે. જાહેરસભા, સરઘસ કે રેલી કરવા પર પ્રતિબંધ ફરમાવાયો છે. 30 એપ્રિલ સુધી રાજકોટ શહેરમાં જાહેરનામુ પ્રસિધ્ધ રહેશે.