મહામારી / ભારતમાં સતત વધતાં કોરોના કેસ વચ્ચે વેક્સિનેશન મુદ્દે કેન્દ્ર સરકારે લીધો આ મોટો નિર્ણય

• ભારતમાં કોરોના વાયરસના સતત વધી રહ્યા છે કેસ 
• હવે દરરોજ આપવામાં આવશે કોરોનાની રસી 
• રજાઓમાં ચાલુ રહેશે વેક્સિનેશન અભિયાન 

રસીકરણ અભિયાન તેજ કરવામાં આવશે 

દેશમાં કોરોના વાયરસના વધતાં કેસ વચ્ચે સંક્રમણને રોકવા માટે કેન્દ્ર સરકાર દ્વારા મોટો નિર્ણય લેવામાં આવ્યો છે. વેક્સિન અભિયાનમાં તેજી લાવવા માટે હવે 45થી ઉપરની આયુના લોકોને દરરોજ વેક્સિન આપવામાં આવશે. સરકારી રજાના દિવસોમાં પણ કોરોના વેક્સિન આપવાનું કામ ચાલુ જ રાખવામાં આવશે. આ સાથે બપોરે ત્રણ વાગ્યા બાદ તે લોકોને વેક્સિન આપવામાં આવશે જેમણે પહેલા નોંધણી કરાવી નથી. 

હવે વેક્સિન પર નવી સ્ટ્રેટેજી 

નોંધનીય છે કે દેશમાં જાન્યુઆરી મહિનામાં વેક્સિનેશન અભિયાન શરૂ કરવામાં આવ્યું હતું. પહેલી એપ્રિલથી દેશમાં 45 વર્ષથી વધુ ઉંમરના દરેક લોકોને વેક્સિનના ડોઝ આપવાનો નિર્ણય કરવામાં આવ્યો છે. 

ભારતમાં કોરોના વાયરસના કેસમાં 35 ટકાનો વધારો

કેન્દ્રીય સ્વાસ્થ્ય મંત્રાલયના જણાવ્યા અનુસાર, છેલ્લા 24 કલાકમાં 72,330 નવા કોરોનાના કેસ નોંધાયા છે. આ સાથે જ કુલ સંક્રમિતોની સંખ્યા વધીને 12,221,665 થઇ ગઇ છે. આ દરમિયાન 459 લોકોના મોત થયા છે, જે છેલ્લા કેટલાક મહિનાઓમાં સૌથી વધુ છે.  કોરોનાના કારણે કુલ મૃત્યુઆંક 1,62,927 પર પહોંચ્યો છે. ચિંતાની વાત એ છે કે આ વખતની લહેરમાં રિકવરી રેટમાં પણ ઘટાડો જોવા મળી રહ્યો છે. છેલ્લા 24 કલાકમાં 40 કલાકમાં 40 હજાર 382 લોકોએ કોરોનાને મ્હાત આપી છે, જ્યારબાદ અત્યાર સુધીમાં સાજા થનારાની સંખ્યા 11,474,683 પર પહોંચી ગઇ છે અને રિકવરી રેટ ઘટીને 93.89 ટકા થયો છે.

નોંધનીય છે કે માર્ચ મહિનાની શરૂઆતથી ભારતમાં કોરોના વાયરસની નવી લહેરની શરૂઆત થઈ છે. ભારતમાં સતત વધતાં કેસના કારણે દેશના જુદા જુદા રાજ્યોમાં વિવિધ પ્રતિબંધો લગાવી દેવાનો નિર્ણય લેવામાં આવ્યો છે ત્યારે કેસને રોકવા માટે કેન્દ્ર સરકાર રસીકરણ પર ભાર આપવા માટે અભિયાનને તેજ કરવા જઈ રહી છે.