મોંઘવારીનો ડામ / જીવવું હરામ કરી મૂકશે આ મોંઘવારી, બસ-ઓટો સવારી પણ થઈ રહી છે મોંઘી, આ રાજ્યે વધાર્યું ભાડું

• દેશમાં મોંઘવારીનો હાહાકાર
• દરરોજ કોઈને કોઈ વસ્તુ કે સેવાના વધે છે ભાવ
• કેરળમાં વધ્યાં બસ અને ઓટોના ભાડા

પેટ્રોલ, ડીઝલ, ગેસ, ફળફળાદી અને શાકભાજી સહિતની તમામ વસ્તુઓના ભાવમાં થયેલા ધરખમ વધારાએ સામાન્ય જનતાનું જીવવું હવે હરામ બરોબર થયું છે. હવે સામાન્ય લોકો પર ટૂંક સમયમાં મોંઘા ભાડાનો બોજ પડવાનો છે. આવતા મહિનાથી બસ, ઓટો જેવા જાહેર પરિવહનના ભાડામાં વધારો થવાનો છે.

કેરળ સરકારે બસ, ઓટો અને ટેક્સીના લઘુતમ ભાડામાં કર્યો વધારો 

કેરળ સરકારે બસ, ઓટો અને ટેક્સીના લઘુતમ ભાડામાં વધારો કરવાની જાહેરાત કરી છે. આ વધેલા ભાડા 1 મે 2022થી લાગુ થશે. અન્ય રાજ્યોની સરકારો પણ ટૂંક સમયમાં આ અંગે નિર્ણય લઈ શકે છે. દિલ્હી અને મુંબઇ જેવા ઘણા શહેરોમાં સીએનજીના ભાવમાં છેલ્લા 15 દિવસમાં 15 રૂપિયા પ્રતિ કિલો સુધીનો વધારો થયો છે, જ્યારે ડીઝલના ભાવમાં પણ નોંધપાત્ર વધારો થયો છે.જેને જોતા ઓટો અને ખાનગી બસ માલિકો ભાડા વધારાની માંગ કરી રહ્યા છે. રાજ્ય સરકારો માટે સરકારી બસોના ભાડા વર્તમાન સ્તરે વધુ લાંબા સમય સુધી જાળવવું મુશ્કેલ બનશે. તેઓને ટૂંક સમયમાં જ બસ ભાડામાં વધારો કરવાની પણ ફરજ પડશે.

ઓછામાં ઓછું ભાડુ 8 રુપિયાથી વધારીને 10 રુપિયા કરાયું 
કેરળના પરિવહન પ્રધાન એન્ટની રાજુએ જણાવ્યું હતું કે બસનું લઘુતમ ભાડું 8 રૂપિયાથી વધારીને 10 રૂપિયા કરવામાં આવ્યું છે. આ પછી, સરકારે પ્રતિ કિલોમીટર ભાડુ 90 પૈસાથી વધારીને 1 રૂપિયા કરવાનો નિર્ણય લીધો છે. તેમણે કહ્યું કે વિદ્યાર્થીઓની ટિકિટના દરમાં વધારાના મુદ્દાની તપાસ માટે એક આયોગની રચના કરવામાં આવી છે.

ઓટો ભાડામાં 20 ટકાનો વધારો
એન્ટની રાજુએ જણાવ્યું હતું કે સરકારે ઓટો ભાડામાં વધારો કરવાનો પણ નિર્ણય લીધો છે. હવે પહેલા બે કિલોમીટર માટે 30 રૂપિયા લેવામાં આવશે. આ પછી, દરેક કિલોમીટર માટે 15 રૂપિયા લેવામાં આવશે. હવે, પહેલા દોઢ કિલોમીટર માટે 25 રૂપિયા અને પછી દરેક કિલોમીટર માટે 12 રૂપિયા લેવામાં આવે છે.

ટેક્સીના ભાડામાં થયો આટલો વધારો 

ટેક્સીના ભાડાની વાત કરીએ તો રાજ્ય સરકારે 1500 સીસીની ક્ષમતા ધરાવતી કાર માટે પ્રથમ 5 કિમીનું લઘુતમ ભાડું ઘટાડીને 200 રૂપિયા કરી દીધું છે. અત્યારે તે 175 રૂપિયા છે. આ ક્ષમતાથી વધુ ક્ષમતા ધરાવતી કારનું લઘુતમ ભાડું 200 રૂપિયાથી વધારીને 225 રૂપિયા કરવામાં આવ્યું છે. 17 કિલોમીટરની જગ્યાએ હવે પ્રતિ કિલોમીટર ટેક્સીઓ 20 રૂપિયા ચાર્જ કરશે. વધેલું ભાડું ૧ મેથી અમલમાં આવશે.