લૂંટ / બાઈકને કારથી ઠોકર મારી 29 લાખ પડાવી લીધા, બાદમાં માર મારી થયા રફુચક્કર, મોરબીનો આંખ ઉઘડતો કિસ્સો

• મોરબીમાં ચકચારી લૂંટની ઘટનાનો મામલો
• 3 દિવસ બાદ પાણ આરોપીઓ ન પકડાતા અનેક સવાલો
• એલસીબી, એસઓજીની ટીમો જહેનતશીલ હોવાનો પોલીસનો દાવો

મોરબી પંથકમાં વધુ એક લૂંટની ઘટના સામે આવી છે. જેમાં પીપળી ગામ પાસે આવેલ કારખાનામાંથી 29 લાખની રોકડ લઈ ઘરે જતા યુવાને માર મારી ત્રણ શખ્સોએ રૂપિયા લૂંટી લીધા હતા. આરોપીએ કાર મારફતે યુવાનના બાઇકને ઠોકર મારી લૂંટની ઘટનાને અંજામ આપ્યો હતો. જે મામલે યુવાને મોરબી તાલુકા પોલીસ મથકમાં ફરિયાદ નોંધાવી હતી. જેને ત્રણ દિવસ જેટલો સમય વિતવા છતાં આરોપીઓ પોલીસ પકડથી દૂર છે.

હજુ સુધી આરોપીઓ પકડાયા નથી

કારની ઠોકરે ચડેલા યુવાનને ગંભીર ઇજા પહોંચી હતી. ઉપરાંત કારમાં આવેલા ત્રણ શખ્સોએ યુવાને ઢિકાપાટુનો માર માર્યો હતો જેને લઈને ઈજાગ્રસ્ત યુવાને પ્રથમ મોરબીના સામાકાંઠા વિસ્તારમાં આવેલ શિવમ હોસ્પિટલ ખાતે સારવાર માટે ખસેડાયો હતો. ત્યારબાદ ભોગ બનેલ યુવાન મોરબી તાલુકા પોલીસ સ્ટેશન ખાતે પહોંચ્યો હતો.જયા ફરિયાદ નોંધાવતા પોલીસે નાકાબંધી કરાવી હતી અને સ્થાનિક પોલીસ તેમજ એલસીબી, એસઓજી સહિતની ટીમો આરોપીઓને પકડવા માટે દોડતી થઈ ગઈ હતી. જોકે આરોપી સુધી પહોંચવામા પોલીસનો પનો ટૂંકો પડતો હોય તેમ હજુ સુધી આરોપીઓ પકડાયા નથી.

શુ હતી સમગ્ર ઘટના ?

મોરબી નજીકના પીપળી ગામે રહેતા ચંદ્રેશભાઇ સવજીભાઈ શિરવી સીરામીક કારખાનામાં કેસીયર તરીકે કામ કરે છે. જે પોતાનું કામકાજ પૂરું કરીને ૨૯ લાખ રૂપિયા સાથે પોતાના ઘરે જઈ રહ્યા હતા આ વેળાએ ગામના આશ્રમ નજીક તેના બાઇકને અજાણી કારમાં આવેલા ત્રણ શખ્સોએ ઠોકર મારી હતી અને ચંદ્રેશભાઇ કશું સમજે તે પહેલા યુવાનને ઢીકાપાટુનો માર માર્યો હતો ત્યારબાદ તેની પાસે રહેલ રોકડા રૂપિયા 29 લાખ ભરેલ થેલો લઈને કારમાં આવેલા ત્રણેય શખ્સો કાર લઈ ફરાર થઈ ગયા હતા. ત્યારબાદ આ ઘટનાની જાણ થતાં   તેના શેઠ હિતેશભાઈ દલસાણીયા પણ પહોંચ્યા હતા. ત્યારબાદ ફરિયાદ નોંધાવી હતી.

પોલીસ દ્વારા તપાસનો ધમધમાટ

લૂંટના બનાવનો ભેદ ઉકેલવા માટે સ્થાનિક પોલીસ ઉપરાંત એલસીબી, એસઓજીની ટીમો જહેનતશીલ છે અને મોરબી તાલુકા પોલીસ સહિતની ટીમો દ્વારા સીસીટીવી કેમેરાના ફૂટેજ મેળવીને તેમજ ટેકનિકલ માધ્યમની મદદથી આરોપી સુધી પહોંચવાના પ્રયત્નો કરવામાં આવી રહ્યા છે.