દુર્ઘટના / નવસારીમાં કાળ બનીને તૂટી બાલ્કની: 40 વર્ષની મહિલાનું અકાળે મૃત્યુ, જર્જરિત ઈમારતની નોટિસ છતાં રહેતા હતા લોકો

• નવસારીના વોર્ડ-4માં કમેલા રોડ પર કોમ્પલેક્ષની બાલ્કની તૂટી
• જર્જરિત લોખંડવાલા કોમ્પલેક્ષના પહેલા માળની બાલ્કની તૂટી પડી
• બાલ્કનીમાં ઉભેલી યુવતી નીચે પટકાતા મૃત્યુ
• યુવતીને ગંભીર હાલતમાં નજીકની હોસ્પિટલમાં ખસેડાઈ હતી
• હોસ્પિટલમાં સારવાર દરમિયાન 40 વર્ષીય મહિલાનું મૃત્યુ

Navsari Complex Collapses : નવસારીમાં કોમ્પલેક્ષની બાલ્કની એક મહિલા માટે કાળ બની હોવાનું સામે આવ્યું છે. વાત જાણે એમ છે કે, નવસારીમાં એક જર્જરિત કોમ્પલેક્ષના પહેલા માળે એક મહિલા ઊભી હતી. જોકે આ જર્જરિત કોમ્પલેક્ષની બાલ્કની તૂટતાં મહિલા નીચે પટકાઈ હતી. જે બાદ મહિલાને ગંભીર હાલતમાં હોસ્પિટલ ખસેડવામાં આવી હતી. જોકે મહિલાને ગંભીર ઇજાઓ પહોંચી હોઇ સારવાર દરમિયાન તેમનું મોત થયું હતું. નોંધનિય છે કે, નવસારી પાલિકા જર્જરિત બિલ્ડિંગો અને કોમ્પલેક્ષને માત્ર નોટિસ આપીને જ સંતોષ માની રહી હોવાનું ચર્ચાઇ રહ્યું છે. 

નવસારીના વોર્ડ નં. 4 માં કમેલા રોડની  ઘટના 
નવસારી શહેરના વોર્ડ નં.4માં કમેલા રોડ પર આવેલ જર્જરિત લોખંડવાલા કોમ્પલેક્ષના પહેલા માળની બાલ્કની તૂટી પડી હોવાની ઘટના સામે આવી છે. આ દુર્ઘટના બની ત્યાં 40 વર્ષીય રઈસાબાનુ રાઈન પહેલા માળે હાજર હતા. આ દરમિયાન બાલ્કની તૂટતાં પહેલા માળેથી નીચે પટકાયા બાદ તેમને સારવાર અર્થે હોસ્પિટલ ખસેડાયા હતા. જ્યાં સારવાર દરમિયાન તેમનું મોત થયું છે. 

નગરપાલિકા માત્ર નોટિસો આપી માની રહી છે સંતોષ 
નવસારીમાં બાલ્કનીમાં ઉભેલી મહીલા નીચે પટકાતા મોત નિપજ્યાં બાદ હવે સામે આવ્યું છે કે, કોમ્પલેક્ષની ચારેય ઇમારતોને અગાઉ પાલીકાએ નોટીસ આપી હતી. જર્જરીત હોવાથી પાલિકા દ્વારા સમારકામની નોટીસ અપાઈ હતી. આ તરફ હવે ઘટના બાદ પાલિકાએ બિલ્ડીંગ ખાલી કરાવવાનું શરુ કર્યું છે. પણ નગરજનોમાં ચર્ચા છે કે, પાલિકા માત્ર નોટિસો આપી સંતોષ માની રહી છે. અગાઉ જર્જરીત થયેલી બે ઈમારતોને તોડી પડાઇ હતી. તો હજુ પણ જર્જરિત બે ઇમારતોમાં લોકો રહે છે. જો હજી કોઈ મોટી દુર્ઘટના સર્જાય તો જવાબદાર કોણ ? તેવા સવાલો નવસારીમાં ઉઠી રહ્યા છે.