Asia Cup 2022 / વીવીએસ લક્ષ્મણ ટીમ ઇન્ડિયાના વચગાળા કોચ જાહેર, રાહુલ દ્રવિડ કોરોના સંક્રમિત થતાં BCCIએ લીધો નિર્ણય

• એશિયા કપ માટે BCCIનો નિર્ણય
• વીવીએસ લક્ષ્મણ વચગાળાના કોચ નિયુક્ત
• હેડ કોચ રાહુલ દ્રવિડ હાલ કોરોના સંક્રમિત

ભારત એશિયા કપમાં પોતાની પ્રથમ મેચ રવિવારે (28 ઓગસ્ટ) પાકિસ્તાન સામે રમશે. ટીમ ઈન્ડિયાની તૈયારીઓને ત્યારે મોટો ઝટકો લાગ્યો જ્યારે હેડ કોચ રાહુલ દ્રવિડ કોરોના સંક્રમિત થઈ ગયા. ભારતીય ક્રિકેટ બોર્ડે આ મુશ્કેલ સમયમાં વીવીએસ લક્ષ્મણની મદદ લીધી છે. તેને યુએઈમાં ટીમ સાથે રહેવાનું કહેવામાં આવ્યું છે. બીસીસીઆઇએ બુધવારે કહ્યું કે, લક્ષ્મણને એશિયા કપ માટેની ટીમના વચગાળાના કોચ તરીકે નિયુક્ત કરવામાં આવ્યા છે.

NEWS - VVS Laxman named interim Head Coach for Asia Cup 2022.

More details here 👇👇https://t.co/K4TMnLnbch #AsiaCup #TeamIndia

— BCCI (@BCCI) August 24, 2022

લક્ષ્મણને આયર્લેન્ડ સામેની શ્રેણી બાદ ઝિમ્બાબ્વે પ્રવાસ માટે સ્ટેન્ડ ઈન કોચ પણ બનાવવામાં આવ્યા હતા. નેશનલ ક્રિકેટ એકેડમીના વડા લક્ષ્મણ ઝિમ્બાબ્વેથી ભારત પરત ફરવાના હતા પરંતુ તેઓ યુએઈ પહોંચી ગયા છે. એશિયા કપ માટે જે ખેલાડીઓની પસંદગી કરવામાં આવી નથી તેઓ સ્વદેશ પરત ફર્યા છે. લક્ષ્મણની સાથે દુબઈમાં વાઈસ કેપ્ટન કેએલ રાહુલ, દીપક હૂડા અને આવેશ ખાન પણ હતા.

કોરોનાથી સ્વસ્થ થયા બાદ ટીમ સાથે જોડાશે
લક્ષ્મણ દુબઈમાં રોહિત શર્માની કેપ્ટન્સી હેઠળની ટીમ ઈન્ડિયા સાથે જોડાયા છે. બીસીસીઆઈએ દ્રવિડને તેના રિપ્લેસમેન્ટ તરીકે દુબઈ મોકલી આપ્યા છે. દ્રવિડ કોરોનાથી સ્વસ્થ થયા બાદ ટીમ સાથે જોડાશે. લક્ષ્મણના કોચપદ હેઠળ ટીમ ઈન્ડિયાએ બે મેચની ટી-20 શ્રેણીમાં આયર્લેન્ડને 2-0થી અને ઝિમ્બાબ્વેને ત્રણ વન ડેની શ્રેણીમાં 3-0થી હરાવ્યું હતુ.

બીસીસીઆઈના સચિવ જય શાહે આપી માહિતી
બીસીસીઆઈના સચિવ જય શાહે કહ્યું હતું કે દ્રવિડ કોવિડ પોઝિટિવ છે. તેમણે કહ્યું હતું કે ટીમ ઇન્ડિયા દુબઇ રવાના થઇ તે પહેલા રાહુલ કોરોના ટેસ્ટમાં સંક્રમિત મળી આવ્યા. તેનામાં હળવા લક્ષણો છે અને બીસીસીઆઈની તબીબી ટીમ દ્વારા તેની દેખરેખ રાખવામાં આવી રહી છે. દ્રવિડ હાલ પૂરતી ટીમ સાથે યુએઈ જશે નહીં. કોરોનામાંથી સાજા થયા બાદ દ્રવિડ ભારતીય ટીમની સાથે જોડાઈ શકશે.