આંદોલન / ખેડૂત અગ્રણીનો મોટો આરોપ, કહ્યું ''બેઠકમાં તો ગૃહમંત્રી શાહે કહ્યું હતું કે ટેકાના ભાવે બધા પાક ન ખરીદી શકાય કારણ કે...''

• કૃષિ કાયદાઓના વિરોધમાં ખેડૂતોનો હલ્લાબોલ 
• આજે ઉપવાસ પર બેઠા ખેડૂતો, અમિત શાહ કરી રહ્યા છે મંત્રીઓ સાથે બેઠક 
• ખેડૂત અગ્રણીએ ટેકાના ભાવ મુદ્દે મોદી સરકાર લગાવ્યો મોટો આરોપ 

મોદી સરકાર પર લગાવ્યો મોટો આરોપ 

ખેડૂત અગ્રણી ગુરનામ સિંહ ચઢૂણીએ સરકાર પર મોટો આરોપ લગાવ્યો છે. તેમણે કહ્યું કે સરકાર MSPને લઈને લોકોમાં ભ્રમ ફેલાવી રહી છે. ગૃહમંત્રી અમિત શાહે તો ડિસેમ્બર મહિનામાં થયેલ બેઠકમાં કહ્યું હતું કે સરકાર 23 પાકને ટેકાના ભાવે ખરીદી ન શકે કારણ કે તે માટે 17 લાખ કરોડ રૂપિયાનો ખર્ચ આવશે. તેમણે વધુમાં કહ્યું કે સરકાર બધા જ રાજ્યોમાં ટેકાના ભાવે ખરીદી નથી કરતી અને ટેકાના ભાવ મુદ્દે સરકાર વિચારી રહી છે કે પહેલા જે ભાવે ખરીદવામાં આવતું હતું તે એમ જ ચાલુ રહેશે પરંતુ ખેડૂતો હવે તેના પર જ ટકી ન શકે. 

 

Govt is misleading everyone on MSP. Home Minister Amit Shah replied to us during 8th Dec meet that they can't buy all 23 crops at MSP as its costs Rs 17 lakhs crores. : Gurnam Singh Chaduni, President, Bhartiya Kisan Union (Haryana) pic.twitter.com/yUVc9xo1kK

— ANI (@ANI) December 14, 2020

ખેડૂતોની મોટી બેઠક 

ખેડૂતો આજે ભૂખ હડતાળ કરી રહ્યા છે આજે સાંજે ગાઝીપુર અને અન્ય બોર્ડરના ખેડૂતો બેઠક કરશે ને તે બાદ સિંઘુ બોર્ડર પર બધા જ સંગઠનો એકત્રિત થશે અને આગળની રણનીતિ પર ચર્ચા કરશે. આંદોલનને લઈને આ બેઠકમાં મોટો નિર્ણય લેવાઈ શકે છે. 

મોદી સરકારના મંત્રીઓની મોટી બેઠક 

થોડીવારમાં કૃષિ કાયદા અને વિરોધ મામલે મોદી સરકારના ગ્રુપ ઓફ મિનિસ્ટર્સની બેઠક થશે જેમાં ગૃહમંત્રી અમિત શાહ પણ સામેલ થશે અને તે સિવાયના મંત્રીઓ બેઠકમાં હાજર રહે તેવી શક્યતા છે. મીડિયા અહેવાલો અનુસાર માનવામાં આવી રહ્યું છે કે નરેન્દ્ર સિંહ તોમર સાથે ફરીથી અમિત શાહ અલગથી ચર્ચા પણ કરી શકે છે. 

ખેડૂત આંદોલન બન્યું ઉગ્ર

દેશના અલગ અલગ ભાગોમાં ખેડૂતોની ભૂખ હડતાળ શરૂ થઈ છે. રાજસ્થાનના શાહજહાંપુરમાં મોટી સંખ્યામાં ખેડૂતો સીમા પર આંદોલન કરી રહ્યા છે અને ભૂખ હડતાળ પર છે. દિલ્હીમાં સિંધુ, ટીકરી, ગાઝીપુર સીમા પર ખેડૂતોના ધરણા ચાલી રહ્યા છે. ખેડૂતોની તરફથી સડક જામ કરવામાં આવી રહી છે અને સાથે જ ભાજપના નેતાઓને ઘેરવાનો પ્લાન પણ છે.