ઓપીનીયન પોલ / શું 2024માં ગુજરાતમાં ક્લીન સ્વીપની હેટ્રીક કરી શકશે BJP? નવા સર્વેમાં સામે આવ્યા ચોંકાવનારા આંકડા, જુઓ કોને કેટલી સીટનું અનુમાન

• લોકસભાની ચૂંટણીને લઈ ચોંકાવનારો સર્વે
• 292 લોકસભા મતવિસ્તારોમાં સર્વે કરાયો
• 61 ટકા મતદારો ભારતીય જનતા પાર્ટીની તરફેણમાં

લોકસભાની ચૂંટણી જેમ જેમ નજીક આવે છે તેમ તેમ ચૂંટણીલક્ષી રાજનીતિ પણ સ્પષ્ટ જોવા મળી રહી છે. કેટલીક પાર્ટીઓ તેમના પક્ષ નક્કી કરી રહી છે. એક તરફ NDA ગઠબંધ ભાજપ છે તો બીજી તરફ તેની ટક્કર લેવા માટે વિપક્ષી પાર્ટીઓનો ગઠબંધન I.N.D.I.A. બન્યું છે અને આ ગઠબંધનની પહેલ બિહારના મુખ્યમંત્રી નીતિશ કુમાર દ્વારા કરવામાં આવી અને અત્યાર સુધીમાં આ ગઠબંધનની 2 બેઠકો થઈ ચૂકી છે.

292 લોકસભા મતવિસ્તારોમાં સર્વે
લોકસભાની ચૂંટણીને લઈ હવે નગારે ઘા  વાગી ગયા છે અને ચૂંટણીના આડે 200 દિવસથી પણ ઓછો સમય રહ્યો છે. તે પહેલા ઈન્ડિયા ટીવી-સીએનએક્સેએ એક સર્વે કર્યો હતો. આ સર્વેમાં આવા ઘણા આંકડા સામે આવ્યા છે જે બંન્ને ગઠબંધનની ચિંતા વધારી દે તેવા છે. અત્યાર સુધી જ્યાં એનડીએના ઉમેદવારો જીત હાસંલ કરતા હતા ત્યાં કેટલીક સીટો પર વિપક્ષના ઉમેદવારો જીતતા જોવા મળી રહ્યા છે અને કેટલીક જગ્યાએ તેનાથી વિરૂદ્ધ પણ જોવા મળી રહ્યું છે. INDIA TV-CNXના આ ઓપિનિયન પોલમાં દેશના 292 લોકસભા મતવિસ્તારોમાં સર્વે કરવામાં આવ્યો હતો.  આ સર્વેમાં સેમ્પલ સાઈઝ 44548 લોકોનું હતું. જેમાં 23871 પુરૂષો અને 20677 મહિલાઓએ ભાગ લીધો હતો. 

INDIA TV-CNXનો ઓપીનીયન પોલ
કેન્દ્રમાં ભારતીય જનતા પાર્ટીની સરકાર બનાવવામાં ગુજરાતે ખૂબ મહત્વની ભૂમિકા ભજવી છે. પ્રધાનમંત્રી નરેન્દ્ર મોદી અને કેન્દ્રીય મંત્રી અમિત શાહનું ગૃહ રાજ્ય પણ છે અને ગુજરાત ભાજપનો ગઢ પણ કહેવાય છે. પરંતુ આ વખતે ભાજપના ગઢમાં ગાબડો પડશે કે, ભાજપનો આ ગઢ દર વખતની જેમ મજબૂત બનશે. આ ઓપીનીયન પોલ અનુસાર, આ વખતે પણ ભાજપ ગુજરાતમાં 26માંથી 26 બેઠકો જીતતી જોવા મળી રહી છે.

કોને કેટલા ટકા વોટ
આ બધાની વચ્ચે બીજી તરફ રાજ્યમાં વોટ ટકાવારીની વાત કરીએ તો 61 ટકા મતદારો ભારતીય જનતા પાર્ટીની તરફેણમાં મતદાન કરી શકે છે. આ સાથે જ 28 ટકા મતદારો કોંગ્રેસ તરફ અને માત્ર 8 ટકા આમ આદમી પાર્ટી તરફ વોટ કરે તેવો આ સર્વેમાં જાણવા મળ્યું છે. 3 ટકા મતદારો અન્યના ખાતામાં વોટ આપી શકે છે