ખુલાસો / આણંદ સ્પાયકાંડ કેસનો ખેલ ઉઘાડો પડ્યો: એક અંગૂઠે થતો કરોડો 'વહીવટ', મળતીયા પાસેથી મળ્યું મશીન

• આણંદ કલેકટર કચેરીમાં સ્પાય કેમેરા લગાવવાનો કેસ
• કચેરીમાંથી ક્લિયર થયેલી ફાઈલોનું ACB અને ED કરશે રિવ્યુ
• જે.ડી પટેલ બિનખેતીની ફાઇલ ક્લીયર કરવા લેતો હતો લાંચ

 આણંદ કલેક્ટર કચેરીમાં સ્પાય કેમેરા લગાવવા મામલે એક પછી એક મોટા ખુલાસા થઈ રહ્યા છે.  ત્યારે કેતકી વ્યાસ અને જેડી પટેલ ફરતે ગાળિયો કસાયો છે.  ત્યારે હવે તપાસમાં ACB તેમજ ED એ ઝંપલાવ્યું છે.  કલેક્ટર કચેરીમાંથી ક્લીયર થયેલ તમામ ફાઈલોનું રિવ્યું એસીબી તેમજ ઈડી લેશે. ત્યારે જે ડી પટેલ બિનખેતીની ફાઈલ ક્લીયર કરવા માટે લાંચ લેતો હતો. તેમજ કલેક્ટરમાંથી બિનખેતીની ફાઈલ મંજુર થયા બાદ 7/12  માં એન્ટ્રી કરવાની હોય છે. જેમાં જે ડી પટેલની ફિંગરપ્રિન્ટથી 7/12 માં એન્ટ્રી પડતી હતી. 

નોંધ પાડવા માટેનો વહીવટ થયા બાદ ફિંગરપ્રિન્ટ થતી હોવાનો આક્ષેપ 
કલેક્ટર દ્વારા બિનખેતીની ફાઈલ સમય મર્યાદામાં નિકાલ કરવામાં આવતો હતો. જે બાદ જે. ડી. પટેલ ફિંગરપ્રિન્ટ નહી આપી નોંધ દાખલ કરવા માટે ઠાગાઠૈયા કરતો હતો. તેમજ પોતાને મળેલી સત્તાનો જે ડી પટેલે વહીવટ કરવામાં દુરૂપયોગ કર્યો હતો.  એલસીબીને જે.ડી. પટેલનાં મળતીયા હરીશ ચાવડાની કારમાંથી ફિંગર પ્રિન્ટ મશીન મળી આવતા જપ્ત કર્યું હતું. જેનો ઉપયોગ નોંધ પાડવા માટેનો વહીવટ થયા બાદ ફિંગરપ્રિન્ટ થતી હોવાનો આક્ષેપ છે. અને જે ડી પટેલની ફિંગર બાદ જ 7/12 માં બિનખેતીની નોંધ કરવામાં આવતી હતી.  

હાલ કેતકી વ્યાસ બિલોદરા જેલમાં કેદ
આણંદ કલેક્ટર ડી.એસ ગઢવીની ઓફિસમાં સ્પાય કેમેરા લગાવવા મામલે પોલીસે ADM કેતકી વ્યાસ, નાયબ મામલતદાર જે.ડી પટેલ અને હરેશ ચાવડા વિરુદ્ધ ગુનો નોંધી ત્રણેયની ધરપકડ કરી હતી. જો કે, સમગ્ર મામલાને લઈ ADM કેતકી વ્યાસને સસ્પેન્ડ કરાઈ છે. અત્રે જણાવી દઈએ કે, આરોપી કેતકી વ્યાસ બિલોદરા જેલમાં કેદ છે.
ADM કેતકી વ્યાસને કરાયા સસ્પેન્ડ 
આણંદ કલેકટર કચેરીમાં સ્પાયકાંડને લઇને કાર્યવાહી ધમધમાટ ચાલી રહ્યો છે. સસ્પેન્ડેડ કલેક્ટર ડી.એસ.ગઢવીના સ્પાયકાંડમાં કેતકી વ્યાસ સંડોવાયેલ છે. સ્પાયકાંડની પૂછપરછમાં કરોડોની જમીન ઉપરાંતના વહીવટ બાબતના ખુલાસા થયા છે. કેતકી વ્યાસના કૌભાંડના પણ એક બાદ એક ખુલાસા સામે આવી રહ્યાં છે.
કેતકી વ્યાસનો વધુ એક વિવાદ
સ્પાયકાંડની આરોપી કેતકી વ્યાસનો વધુ એક વિવાદ સામે આવ્યો છે. બાવળાનો એક પરિવાર કેતકી વ્યાસના કૌભાંડનો શિકાર બન્યો હતો. પરિવારને ફસાવવા કેતકી વ્યાસે ખોટી ફરિયાદ હોવાનો આરોપ લગાવવામાં આવ્યો છે.  મહેન્દ્રસિંહ ચૌહાણે ખોટા ઓર્ડર અંગે કેતકી વ્યાસ પર સવાલ ઉઠાવતા ફરિયાદ કરી છે. કેતકી વ્યાસે તેમની બદલીના દિવસે જ મારી વિરુદ્ધ ખોટી FIR નોંધાવી હતી તેમજ ફરિયાદમાં જે આરોપ લગાવ્યા છે તે તમામ પાયાવિહોણા છે તેમ મહેન્દ્રસિંહ ચૌહાણે જણાવ્યું છે.