આતંક / તંત્ર હાથ પર હાથ દઈ બેઠું: જામનગરમાં છ મહિનામાં પાંચ હજાર લોકોને શ્વાન કરડવાના બનાવો, જરૂરી પગલાં ઝીરો

• જામનગરમાં રખડતા શ્વાનનો ત્રાસ
• ડોગ બાઈટસ દર રોજ 20 કેસ નોંધાઈ રહ્યાં છે
• જાન્યુઆરીમાં 837 કેસ નોંધાયા 

જામનગરમાં છેલ્લા કેટલાક સમયથી ડોગ બાઈટસના કેસમાં નોંધપાત્ર વધારો જોવા મળી રહ્યો છે. સરકારી આંકડા જણાવે છે કે, છેલ્લા છ મહિનામાં પાંચ હજાર શ્વાન કરડવાના કેસ નોંધાયા છે. જામનગરની જી જી હોસ્પિટલમાં દરરોજ 20 જેટલાં કેસ તો  ફક્ત શ્વાન કરડવાના આવી રહ્યા છે. ડોગ બાઈટ્સના કેસ વધવાના કારણે હોસ્પિટલમાં એન્ટી રેબિટ્સ ક્લિનિક શરુ કરવામાં આવી છે. 

જાન્યુઆરીમાં 837 કેસ
હોસ્પિટલના ત્રણ નંબરના વોર્ડમાં શ્વાન કરડવાને લગતા દર્દીઓને રસી આપવાથી લઈને સારવાર કરવાની કામગીરી કરવામાં આવી રહી છે. ડોગ કરડવાના કેસની મહિના વાઈઝ વાત કરીએ તો જાન્યુઆરીમાં 837, ફેબ્રુઆરીમાં 834 કેસ, માર્ચમાં 817 કેસ, એપ્રિલમાં 761 કેસ, મેમાં 792 કેસ, જુનમાં 689 કેસ, જુલાઈમાં 706 કેસ, ઑગસ્ટમા 599 કેસ નોંધાયા છે. જામનગર શહેરની વાત કરીએ તો 5 વર્ષ પહેલા મહાનગર પાલિકા દ્વારા શ્વાન ખસીકરણની કાર્યવાહી કરવામાં આવી હતી. જેમાં 5 હજાર શ્વાનનું ખસીકરણ કરવામાં આવ્યું હતું.

નક્કર પગલાં લેવાની માંગ
સ્ટેન્ડિંગ કમિટીમાં ફરીથી શ્વાનના ખસીકરણની સૈદ્ધાતિક મંજૂરી મળી ગઈ છે. જેની ટેન્ડરિંગ પ્રક્રિયા બાદ કાર્યવાહી હાથ ધરવામાં આવશે. શહેરમાં રણજિતસાગર ડેમ નજીક ઢોરના ડબ્બા ખાતે શ્વાન ખસિકરણની કાર્યવાહી કરવામાં આવે છે. અહીં શ્વાનને બે દિવસ રાખવામાં આવે છે ત્યારબાદ જે તે વિસ્તારમાં ફરી છોડવામાં આવે છે. છેલ્લા છ માસના આંકડા પર નજર કરીએ તો ડોગ બાઈટ્સના કેસમાં ઉછાળો જોવા મળી રહ્યો છે. ત્યારે તંત્ર દ્વારા આ અંગે નક્કર પગલાં લેવામાં આવે તેવી માંગ પણ ઉઠવા પામી છે.