Ahmedabad News: સફેદ કપડાં પહેરીને ચિક્કાર દારૂ પીધેલી હાલતમાં કમલેશ બીએમડબ્લ્યુ લઇને નીકળ્યો હતો. કમલેશ એટલો નશામાં હતો કે તેને ખુદનું પણ ભાન હતું નહીં.
Share
અમદાવાદ BMW કાર અકસ્માત કેસ
દારૂના નશામાં ચૂર નબીરાએ કર્યો હતો અકસ્માત
BMW કારનો પોલીસે 3 KM સુધી કર્યો હતો પીછો: PI
અમદાવાદના રસ્તા છે કે નબીરાઓના બાપનો બગીચો છે તે નક્કી કરવું છેલ્લા એક અઠવાડિયાથી અઘરું સાબિત થઇ રહ્યું છે. બાપના પૈસા પર જલસા કરનારા નબીરા અમદાવાદના રસ્તાને પોતાની જાગીર સમજી બેઠા છે. ગત બુધવારે મોડીરાતે તથ્ય પટેલે ઇસ્કોનબ્રિજ પર અકસ્માત સર્જીને મોતનું તાંડવ રચ્યું હતું, ત્યાર બાદ મણીનગર વિસ્તારમાં કેદાર નામના યુવકે દારૂના નશામાં કારનો અકસ્માત સર્જ્યો હતો ત્યારે હવે ગઈકાલે મોડીરાતે શહેરના પોશ વિસ્તારમાં દારૂડિયાએ પૂરઝડપે પોતાની બીએમડબ્લ્યુ કાર હંકારીને અકસ્માત કર્યો હોવાની ચોંકાવનારી ઘટના સામે આવી છે. મોડી રાતે પોલીસે બીએમડબ્લ્યુ કારચાલકને ફિલ્મી ઢબે પીછો કરીને ઝડપી પાડ્યો છે. કાર ચાલક કમલેશ બિશ્નોઈ સામે વસ્ત્રીપુર અને સેટેલાઈટ પોલીસ સ્ટેશનમાં ફરિયાદ નોંધાઈ છે.
દારૂના નશામાં ચૂર નબીરાએ કર્યો હતો અકસ્માત
અકસ્માત મુદ્દે સેટેલાઈટ પોલીસ સ્ટેશન PI કેયુર વ્યાસનું નિવેદન સામે આવ્યું છે. તેમણે જણાવ્યું કે, વાહન ચેકિંગ દરમિયાન એક કારનો અકસ્માત થયો હતો. અકસ્માત કરેલી કારનો પોલીસે 3 કિલોમીટર સુધી પીછો કર્યો હતો. વસ્ત્રાપુર અને સેટેલાઈટ પોલીસે કારની શોધ કરી હતી. આ દરમિયાન કાર માણેકબાગ પાસેથી મળી આવી હતી. જેનો કાર ચાલક કમલેશ બિશ્નોઈ દારૂના નશામાં ધૂત હતો. જેને ઝડપી સેટેલાઈટ પોલીસ સ્ટેશન લાવી કમલેશ વિરુદ્ધ ફરિયાદ નોંધવામાં આવી હતી. કમલેશ બિશ્નોઈએ રાજસ્થાનથી દારુ લાવી પીધો હતો. વસ્ત્રાપુર પોલીસ સ્ટેશનમાં પણ પોલીસે કમલેશ વિરુદ્ધ ગુનો નોંધ્યો છે.
પોલીસને જોઈને ભાગવાની કરી કોશિશ
ગઈકાલે રાત્રે વસ્ત્રાપુર પોલીસ ચેકિંગ કરતી હતી ત્યારે 40 વર્ષિય કમલેશ બિશ્નોઇ (રહે. શીરોમણિ બંગલો, સીટીએમ) નામનો નબીરો પોતાની બીએમડબ્લ્યુ કાર લઇને પસાર થયો હતો. પોલીસને જોઇને કમલેશ બિશ્નોઇએ પૂરઝડપે પોતાની કારને હંકારીને ભાગવાની કોશિશ કરી હતી. કમલેશ જે રીતે પોતાની કાર ચલાવતો હતો તે જોતાં પોલીસને ચોક્કસ થઇ ગયું હતું કે તે દારૂ પીધેલી હાલતમાં છે.
રેલિંગ પાસે અથડાવી હતી કાર
અમદાવાદમાં ફરી વિસ્મય અને તથ્યકાંડ ન થાય તે માટે પોલીસે તેનો પીછો કર્યો હતો. વસ્ત્રાપુર પોલીસે પોતાની જીપ બીએમડબ્લ્યુ પાછળ ભગાવી હતી. કમલેશે બીએમડબ્લ્યુ કારને એટલી સ્પીડમાં હંકારી હતી કે તેણે સરકારી સંપત્તિને નુકસાન પહોંચાડવાનું શરૂ કરી દીધું હતું. કમલેશ આમ તેમ કાર ચલાવતો હતો અને અંતે રેલિંગ પાસે કારને અથડાવી હતી. આ ઘટના જોઇને સ્થાનિકોનું ટોળું દોડી આવ્યું હતું અને તેને મેથીપાક ચખાડ્યો હતો. જ્યારે વસ્ત્રાપુર પોલીસ પણ આવી જતાં તેની ધરપકડ કરી હતી.
વસ્ત્રાપુર અને સેટેલાઈટ પોલીસે નોંધ્યો ગુનો
કમલેશ બિશ્નોઇ વિરુદ્ધ વસ્ત્રાપુર પોલીસે ગુનો દાખલ કર્યો છે જ્યારે સેટેલાઇટ પોલીસે પણ ગુનો દાખલ કર્યો છે. કમલેશ પટેલે એટલો ચિક્કાર દારૂ પીધો હતો કે તેને ઊભા રહેવાનો પણ હોશ હતો નહીં. પોલીસ સૂત્રોના જણાવ્યા અનુસાર કમલેશ બિશ્નોઇ ગુનાહિત ઇતિહાસ ધરાવે છે. જો પોલીસે સમયસૂચકતા વાપરીને બિશ્નોઇનો પીછો કર્યો ના હોત તો કદાચ વધુ એક વખત અકસ્માતની મોટી ઘટના બની હોત.
