સર્વે / અમદાવાદના માથે મંડરાતો ખતરો! રથયાત્રાના રૂટમાં 287 મકાનો ભયજનક સ્થિતિમાં, AMCની નોટિસ

• 20 જૂને નીકળશે જગન્નાથજીની 146મી રથયાત્રા
• રથયાત્રાના રૂટમાં 287 મકાન જર્જરિત
• AMCએ મકાન માલિકને ફટકારી નોટિસ 

જમાલપુર ખાતેના પ્રસિદ્ધ જગન્નાથજી મંદિરેથી દર વર્ષની અષાઢી બીજે અમદાવાદની અસ્મિતા સમાન રથયાત્રા ઠાઠમાઠથી નીકળતી આવી છે. ભગવાન જગન્નાથ, બહેન સુભદ્રા અને ભાઈ બલરામ સાથે તે દિવસે લોકોનાં સુખ-દુઃખથી વાકેફ થવા નિજમંદિરથી બહાર નીકળી નગરચર્યાએ નીકળતાં હોય છે, જેમાં હજારો શ્રદ્ધાળુઓની ભીડ પ્રભુનાં દર્શનાર્થે સમગ્ર રથયાત્રાના રૂટ પર ઊમટી પડે છે.

રથયાત્રા પહેલા કરાયો જોખમી મકાનોનો સર્વે
આ ઐતિહાસિક રથયાત્રા અગાઉ મધ્ય ઝોનના એસ્ટેટ વિભાગ દ્વારા રૂટ પરનાં જોખમી મકાનોનો સર્વે કરવામાં આવે છે. આ પણ એક પરંપરાગત સર્વેની પ્રક્રિયા બની છે, જે મુજબ દર વર્ષે રૂટ પરનાં જોખમી મકાનોની સંખ્યામાં વધ-ઘટ થાય છે. આ વખતના સર્વેમાં તંત્રના ચોપડે કુલ 287 મકાન જર્જરિત હોવાનું નોંધાયું છે. જેમાં જમાલપુર, ખાડિયા, શાહપુર અને દરિયાપુર વિસ્તારનો સમાવેશ થાય છે. જેથી AMCએ તમામ મકાન ધારકોને નોટિસ ફટકારી છે. 

કોટ વિસ્તારમાં મોટા ભાગે જૂના મકાનો
સૌથી વધુ ભયજનક મકાન ખાડિયામાં છે. રથયાત્રા અમદાવાદના કોટ વિસ્તારમાં ફરે છે, જ્યાં મોટા ભાગે જૂના મકાનો છે. જેમાના કેટલાક જર્જરિત હાલતમાં છે. મકાનમા રિપેરિંગ કામકાજ કરવુ પડે તેમ છે પણ કેટલાક મકાનો ભાડે આપેલા હોવાથી તેઓ રિપેરિંગ કરાવવાની તસ્દી લેતા નથી. આવા મકાનોને કારણે રથયાત્રા વખતે કોઇ દુર્ઘટના થવાની સંભાવનાઓ વધી જાય છે. જેના માટે અમદાવાદ મહાનગરપાલિકાએ સર્વે કરી ભયજનક મકાનોને નોટિસ પાઠવી છે. 

દર વર્ષે આપવામાં આવે છે નોટિસ
ઉલ્લેખનીય છે કે, દરવર્ષે રથયાત્રા વખતે ભયજનક મકાનોને નોટિસ આપવામા આવે છે, પરંતુ કોઈ નક્કર કાર્યવાહી કરવામા આવતી નથી. જેના કારણે આવા મકાનોની સ્થિતિમાં કોઈ ફરક પડતો નથી. આ જર્જરિત મકાનો ચાહે તે વપરાશી હોય કે બિનવપરાશી હોય, પરંતુ સત્તાવાળાઓ દ્વારા જે તે મકાનના જર્જરિત ભાગને તત્કાળ ઉતારી લેવાની નોટિસ પાઠવાય છે. જોકે, જે તે મકાનના માલિક અને ભાડુઆત વચ્ચેના ઝઘડાના કારણે તેના રિપેરિંગનો મામલો ટલ્લે ચઢતો રહે છે. પરિણામે વરસાદ બાદ ભયજનક મકાન આખેઆખું તૂટી પડીને જાન-માલને ગંભીર નુકસાન થાય તેવા કિસ્સા પણ નોંધાય છે.

જાણો ક્યા વોર્ડમાં કેટલા જર્જરિત મકાનો
રથયાત્રાના રૂટ પરના કયાં વોર્ડમાં કેટલા ભયજનક મકાનો આવેલા છે તેની પર જો નજર કરીએ તો જમાલપુરમાં 10 ભયજનક મકાનો આવેલા છે. જ્યારે ખાડિયામાં 148, ખાડિયા 2માં 32, દરિયાપુરમાં 109, શાહીબાગમાં 9 અને શાહપુરમાં 4 ભયજન મકાનો આવેલા છે.