- ગુજરાતના અનેક વિસ્તારોમાં સર્જાઈ જળબંબાકારની સ્થિતિ
- વરસાદને કારણે રાજ્યમાં કેટલાક રસ્તાઓ કરાયા બંધ
- સુરક્ષાને ધ્યાને રાખીને 3 નેશનલ હાઈવે અને 14 સ્ટેટ હાઈવે બંધ
Gujarat Weather Update: બંગાળની ખાડીમાં સર્જાયેલા લો પ્રેશરને કારણે ગુજરાતમાં વરસાદનો વધુ એક રાઉન્ડ ચાલી રહ્યો છે. રાજ્યના અનેક વિસ્તારોમાં મેઘરાજા ધમાકેદાર બેટિંગ કરી રહ્યા છે. ભારે વરસાદના કારણે રાજ્યમાં 177 રસ્તાઓ બંધ થયા છે. જેમાં 3 નેશનલ હાઈવે અને 14 સ્ટેટ હાઈવેનો સમાવેશ થાય છે. આ સાથે પંચાયત હસ્તકના 152 રસ્તાઓ પણ બંધ કરી દેવામાં આવ્યા છે.
24 કલાકમાં 248 તાલુકાઓમાં નોંધાયો વરસાદ
ગુજરાતમાં ઓગસ્ટ મહિનો સાવ કોરેકોરો ગયા બાદ હવે સપ્ટેમ્બરના મધ્યમાં વરસાદે જળબંબાકારની સ્થિતિ સર્જતા અનેક ગામડાઓમાં વરસાદી પાણી ઘૂસી ગયા છે. જેના કારણે લોકોની ઘરવખરીને ભારે નુકસાન પહોંચ્યું છે. આજે સવારે 6 વાગ્યે પૂરા થયેલા 24 કલાક દરમિયાન રાજ્યના 248 તાલુકાઓમાં વરસાદ નોંધાયો છે. જેમાં સૌથી વધારે વરસાદ જૂનાગઢના વિસાવદરમાં નોંધાયો છે. વિસાવદરમાં છેલ્લા 24 કલાકમાં સવા 12 ઇંચ જેટલો વરસાદ નોંધાયો છે.
177 રસ્તાઓ કરાયા બંધ
ગુજરાતમાં ભારે વરસાદના કારણે 177 રસ્તાઓ બંધ કરી દેવામાં આવ્યા છે. ગુજરાતના 3 નેશનલ હાઈવે અને 14 સ્ટેટ હાઈવેને બંધ કરવામાં આવ્યા છે. કચ્છ, છોટાઉદેપુર, ભરુચમાં એક-એક હાઈવે બંધ કરાયા છે. આ ઉપરાંત 152 પંચાયત હસ્તકના માર્ગો બંધ કરાયા છે. સૌથી વધુ ભરુચ જિલ્લામાં 69 માર્ગો બંધ કરી દેવામાં આવ્યા છે. જ્યારે પંચમહાલમાં 22, વડોદરા જિલ્લાના 20 માર્ગો વાહન વ્યવહાર માટે બંધ કરાયા છે.
NDRF અને SDRFની ટીમો સ્ટેન્ડબાય
ભારે વરસાદના કારણે રાજ્યમાં ગઈકાલ સુધીમાં 12,444 લોકોને સ્થળાંતરિત કરવામાં આવ્યા હતા. જ્યારે 617 જેટલા લોકોનું રેસ્ક્યૂ કરીને સલામત સ્થળે લઈ જવાયા હતા. રાજ્યમાં વરસાદની સ્થિતિને પહોંચી વળવા NDRFની 5 તેમજ SDRFની 13 ટીમ વિવિધ જિલ્લાઓમાં સ્ટેન્ડબાય રાખવામાં આવી છે. તો એરફોર્સના હેલિકોપ્ટર પણ સ્ટેન્ડ બાય રાખવામાં આવ્યા છે.
