પુત્રી લાલસામાં પુત્રની હત્યા / 2 દીકરાના બાપને જોઈતી હતી પુત્રી, પુત્ર આવ્યો તો મારી નાખ્યો, ઉત્તરાયણે બનેલી ઘટનાથી ભારે ચકચાર

• એમપીના બૈતૂલમાં દીકરીની લાલસામાં નવજાત દીકરાની હત્યાનો મામલો
• 2 પુત્રના પિતાને જોઈતી હતી દીકરી, ત્રીજો પુત્ર આવતાં પિત્તો છટક્યો
• પત્નીને માર મારીને નવજાતને ગળું દબાવીને મારી નાખ્યો 

પુત્ર લાલસામાં દીકરીઓની હત્યાની વાત તો બધાને ખબર છે પરંતુ કદાચ પહેલી વાર દીકરી માટે દીકરાની હત્યાની ખબર સામે આવી છે જે જાણીને ચોંકી જવાય તેવું છે. 
મધ્યપ્રદેશના બેતુલમાં એક વ્યક્તિએ દીકરીની ઇચ્છામાં પુત્રની હત્યા કરી નાખી. તેણે પહેલા તેની પત્નીને ખૂબ માર માર્યો હતો અને પછી તેના 12 દિવસના પુત્રનું ગળું દબાવી દીધું હતું. 

ઉત્તરાયણના દિવસે બની ઘટના 
આ ઘટના બેતુલના બાજરવાડા ગામની છે. અનિલ ઉઇકે નામના શખ્સને બે પુત્રો છે, મોટો દીકરો સાત વર્ષનો છે અને નાનો દીકરો પાંચ વર્ષનો છે. જ્યારે પત્ની રુચિકા ત્રીજી વખત ગર્ભવતી થઈ ત્યારે તેને આશા હતી કે આ વખતે દીકરી આવશે પરંતુ બન્યું ઉલટું અને ત્રીજો પણ દીકરો જ આવ્યો. આ વાતથી અનિલ ખૂબ ગુસ્સે ભરાયો અને રવિવારે સાંજે દારૂ પીને ઘરે પરત ફર્યો હતો અને પત્ની સાથે ઝઘડો કરવા લાગ્યો હતો. આરોપીએ પત્નીને દોષી માનીને પહેલા તેને જોરદાર માર માર્યો હતો. પતિનો રંગ જોતા રૃચિકા ઘરની બહાર નીકળી ગઈ હતી પરંતુ થોડા સમય બાદ પાછી આવી ત્યારે તેના પગ નીચેથી જમીન સરકી ગઈ, તેનો નવજાત પુત્ર ઝૂંપડીમાં મૃત અવસ્થામાં પડ્યો હતો. તેના ગળા પર દબાવવાના નિશાન હતા.

પૂછપરછમાં શું બોલ્યો આરોપી 
આ ઘટના બાદ ગામમાં હડકંપ મચ્યો છે. તરત પોલીસનો કાફલો ઘટનાસ્થળે ધસી આવ્યો હતો અને તાબડતોબ આરોપી અનિલની ધરપકડ કરવામાં આવી હતી. પૂછપરછ દરમિયાન આરોપીએ જણાવ્યું હતું કે, તેને પહેલાથી જ બે પુત્રો છે, તેથી તેને ઘરમાં એક પુત્રી જોઈતી હતી પરંતુ ત્રીજો પણ દીકરો આવતાં તે સહન કરી શક્યો ન હતો. 

પુત્ર લાલસામાં દીકરીઓની હત્યાથી ઉલટી ઘટના
સામાન્ય રીતે પુત્ર લાલસામાં દીકરીઓની હત્યા થતી હોય છે પરંતુ આ ઘટના ઉલટી બની છે. દીકરા કે દીકરી જે પણ ભાગ્યમાં હોય તેનો સ્વીકાર કરી લેવો જોઈએ. સંતાનમાં કોઈ પણ પ્રકારની લાલસમાં જ ન રાખવી વધારે યોગ્ય છે. આ ઘટના બાદ સોશિયલ મીડિયામાં લોકોએ પણ ભારે આઘાત વ્યક્ત કર્યો હતો.