ચિંતાનું મોજું / આજે સુરત, જામનગરમાં મેઘઆગમન, જુનાગઢના ખેતરોમાં ભરાયા પાણી, નવરાત્રીમાં વરસાદ વિલન બને તેવી આગાહી

• રાજ્યમાં નવરાત્રીનાં એક દિવસ પહેલા છવાયો વરસાદી માહોલ
• સુરત, અમરેલી, કાલાવડમાં છવાયો વરસાદી માહોલ
• વરસાદની આગાહીને પગલે ગરબા આયોજકો ચિંતીત

 અમરેલી જિલ્લાના બગસરા પંથકમાં વરસાદ 

આવતીકાલથી નવરાત્રી શરૂઆત થઈ રહી છે. ત્યારે હવામાન વિભાગ દ્વારા નવરાત્રીમાં વરસાદની આગાહી કરી હતી. જે આગાહીને પગલે રાજ્યમાં ફરી વરસાદી માહોલ છવાતા ગરબા આયોજકો ચિંતીત બન્યા છે. અમરેલી જીલ્લામાં પણ વરસાદી માહોલ છવાયો હતો. અમરેલી જીલ્લાનાં બગસરા પંથકમાં વરસાદ પડ્યો હતો. બગસરાનાં લુધીયા ચુડાવડ સહિતનાં ગામોમાં વરસાદ પડ્યો હતો. 

ભારે પવન સાથે ધોધમાર વરસ્યો વરસાદ 
સતત બીજા દિવસે કાલાવડમાં વરસાદ વરસ્યો હતો.  કાલાવડ તાલુકાનાં અનેક ગામોમાં વરસાદ પડ્યો હતો. ભારે પવન સાથે ધોધમાર વરસાદ વરસ્યો હતો. વરસાદી પાણી મુખ્ય બજારમાં ફરી વળ્યા હતા. 

કપાસ,મગફળી અને ડુંગળી સહિતના પાકમાં નુકસાન
કાલાવડનાં નવાગામ, માછરડા, મોટી વાવડી સહિતનાં ગામોમાં વરસાદ પડ્યો હતો. વરસાદથી ખેડૂતોનાં ઉભા પાકમાં મોટું નુકશાન થવાની શક્યતા છે. કપાસ, મગફળી અને ડુંગળી સહિતનાં પાકમાં નુકશાન છે. ખેડૂતોની સાથે ગરબા મંડળનાં સંચાલકોમાં પણ ચિંતા વ્યાપી ગઈ છે. 

બફારા બાદ શરૂ થયો ઝરમર વરસાદ
સુરતમાં પણ ભારે પવન સાથે વરસાદ શરૂ થયો હતો. બફારા બાદ ઝરમર વરસાદ શરૂ થયો હતો. શહેરનાં અલગ અલગ વિસ્તારોમાં ઝરમર વરસાદ પડ્યો હતો.