શારીરિક છેડછાડ / રાજકોટ: વિદ્યાર્થિનીને સ્પર્શ કરી સન્માન ઘવાય તેવા શબ્દો ઉચ્ચારનાર પ્રોફેસર જ્યોતિન્દ્ર જાની સસ્પેન્ડ, કેસ જાણી લોહી ઉકળી જશે

• રાજકોટની એમ.જે.કુંડલિયા કોલેજના પ્રોફસર પર યૌન શોષણનો મુદ્દો
• આખરે પ્રોફેસર જ્યોતિન્દ્ર જાનીને સસ્પેન્ડ કરવામાં આવ્યા
• Ph.Dની વિદ્યાર્થિનીએ પ્રોફેસર પર લગાવ્યા હતા જાતિય શોષણના આરોપ

રાજકોટમાં પ્રોફેસર જ્યોતિન્દ્ર જાની પર યૌન શોષણના આરોપને લઇ વિરોધ કરવામાં આવી રહ્યો છે. જેને લઈ આખરે પ્રોફેસર જ્યોતિન્દ્ર જાનીને સસ્પેન્ડ કરવામાં આવ્યા છે. પ્રોફેસર પર સૌરાષ્ટ્ર યુનિ.ની વિદ્યાર્થિનીએ ગંભીર આરોપ લગાવ્યા હતા. Ph.Dની વિદ્યાર્થિનીએ પ્રોફેસર પર જાતિય શોષણના આરોપ લગાવ્યા હતા. 

ટ્રસ્ટીઓની બેઠકમાં લેવાયો નિર્ણય
અત્રે જણાવીએ કે, કુલપતિને પત્ર લખી પ્રોફેસર પર ગંભીર આરોપ કર્યા હતા. મહિલા કોલેજના સંચાલકો અને ટ્રસ્ટીઓની બેઠકમાં પ્રોફેસરને સસ્પેન્ડ કરવાનો નિર્ણય લેવાયો છે. NSUI દ્વારા પણ પ્રોફેસરને સસ્પેન્ડ કરવાની માગ કરાઇ હતી. 

જાણો સમગ્ર મામલો 
એમ. જે. કુંડલિયા કોલેજના પ્રોફેસર પાસે Ph.D કરતી એક વિદ્યાર્થિની સાથે ગાઈડ જ્યોતિન્દ્ર જાનીએ અણછાજતું વર્તન કરી શારીરિક છેડછાડ કરી હોવાની ફરિયાદ નોંધાઈ હતી. જેને લઈને કુલપતિએ UGCના નિયમ મુજબ એક કમિટીની રચના કરીને તપાસનો આદેશ પણ કર્યો હતો. તપાસ દરમિયાન કમિટી સમક્ષ કેટલીક ચોંકાવનારી હકીકત આવી હતી અને પ્રોફેસરે વિદ્યાર્થિનીની અનિચ્છા હોવા છતાં તેને સ્પર્શ કરી સન્માન ઘવાય તેવા શબ્દો ઉચ્ચાર્યા હતા. કમિટીના રિપોર્ટના આધારે કુલપતિ ડોક્ટર ગિરીશ ભીમાણીએ કુંડલિયા કોલેજના પ્રોફેસર સામે 7 દિવસમાં પગલાં લેવા એમ.જે. કુંડલિયા કોલેજના સંચાલકોને આદેશ કર્યો હતો. જે બાદ હવે સંચાલકોએ હવે સસ્પેન્ડનો નિર્ણય કર્યો છે. .

NSUI વિરોધ કર્યો હતો
સમગ્ર મામલે NSUI અને કોંગ્રેસ દ્વારા પણ કુંડલિયા કોલેજ ખાતે સૂત્રોચ્ચાર સાથે વિરોધ કરવામાં આવ્યો હતો. પ્રોફેસર જ્યોતિન્દ્ર જાનીને સસ્પેન્ડ કરવાની માગ કરવામાં આવી હતી. જ્યારે NSUI  દ્વારા આક્ષેપ કરાયો હતો કે, સૌરાષ્ટ્ર યુનિવર્સિટીમાં અગાઉ પણ આવી ઘટનાઓ બની ચૂકી છે.