હેકિંગમાં રસ ધરાવતા લોકોને દુનિયાની પ્રતિષ્ઠીત કંપની એપલ પૈસા કમાવવાની સુંદર તક આપી રહી છે. એપલે હાલમાં જ મોબાઈલ ફોન હેકરોને લાખો-કરોડો રૂપિયા આપવાની જાહેરાત કરી છે. જે મુજબ કોઈ હેકર તેમના મોબાઈલમાં રહેલી ખામીઓને શોધી આપશે તેને કંપની લગભગ 16 લાખ રૂપિયાથી લઈને એક કરોડ 33 લાખ રૂપિયા સુધીના ઇનામ આપશે.
હાલમાં જ યોજાયેલી બ્લૈક હેટ હેકિંગ કોન્ફરન્સમાં એપલ તરફથી તેમના પ્રોડક્ટમાં ખામી શોધી આપનાર વ્યક્તિને ઈનામ આપવાની જાહેરાત કરવામાં આવી હતી. તેમાં જે હેકર કંપનીના ડિઝિટલ ડિપાર્ટમેન્ટમાં ખામી શોધી આપશે તેને 16 લાખ રૂપિયા ઈનામ તરીકે આપવામાં આવશે.
ગ્રાહકોના ડેટામાં કોઈ વાઈરસ શોધનારને લગભગ 33 લાખ રૂપિયા અને જે હેકર એપલના iCloudમાં અથવા અન્ય કોઈ ગંભીર ભૂલને શોધી આપશે તેને કંપની એક કરોડ 33 લાખ રૂપિયા ઈનામ આપશે. પાછલા છ વર્ષોથી સિલિકોન વેલીની ફેસબુક ગૂગલ સહિતની અન્ય કંપનીઓ હેકરોને ખામી શોધી આપવાના પૈસા આપે છે. જો કે આ પહેલી વખત છે જ્યારે એપલ તરફથી પણ આ પ્રકારની જાહેરાત કરવામાં આવી છે.
