OMG! / બ્રેડના પેકેટમાં નીકળ્યો ઉંદર! એ પણ જીવતો, Blinkitથી ઓર્ડર આપીને શખ્સ પસ્તાયો

• બ્લિંકિટ એપ પરથી વ્યક્તિએ બ્રેડનું પેકેટ મંગાવ્યું હતું
• પેકેટ તેની પાસે આવ્યું તો તેમાં ઉંદર જોઈને તે દંગ રહી ગયો
• ફરિયાદ બાદ બ્લિંકિટે પાર્ટનર સ્ટોર સામે કાર્યવાહી કરી છે

બ્લિંકિટ અને જેપ્ટો જેવી એપ્લિકેશને આપણા દરરોજના જીવનમાં આપણી સગવડતાઓમાં ઘણો વધારો કર્યો છે. જો કે ઘણી વખત એવી વસ્તુઓ ગ્રાહકો સુધી પહોંચે છે, જેમાં બેદરકારી સામે આવે છે. આવો જ એક કિસ્સો બ્લિંકિટ દ્વારા સામે આવ્યો છે, જે સોશિયલ મીડિયા પર ખૂબ જ ચર્ચાનો વિષય બન્યો છે.   ઓનલાઈન ગ્રોસરી ડિલિવરી એપ દ્વારા બ્રેડ ઓર્ડર કર્યા પછી, એક વ્યક્તિને તે બ્રેડના પેકેટમાં ઉંદર મળ્યો છે.

બ્રેડના પેકેટમાંથી ઉંદર મળ્યો
નિતિન અરોરા નામના વ્યક્તિને બ્રેડના પેકેટમાંથી ઉંદર મળ્યો, જેની ફરિયાદ બાદ બ્લિંકિટે પાર્ટનર સ્ટોર સામે કાર્યવાહી કરી છે. નિતિને પોતાના ટ્વિટર હેન્ડલ પરથી બ્રેડના પેકેટની તસવીર શેર કરી છે, જેને જોઈને તમે પણ ચોંકી જશો. ટ્વિટર પર નિતિને જણાવ્યું છે કે તેણે બ્લિંકિટ એપ પરથી બ્રેડનું પેકેટ મંગાવ્યું હતું. જ્યારે પેકેટ તેની પાસે આવ્યું તો તેમાં ઉંદર જોઈને તે દંગ રહી ગયો. પેકેટની અંદર એક જીવતો ઉંદર હતો.

10 મિનિટમાં આવો સામાન આવે છે, તો....
નિતિન અરોરાએ ટ્વીટ કર્યું, "બ્લિંકિટ સાથેનો ભયાનક અનુભવ. 1 ફેબ્રુઆરી 2023ના રોજ બ્રેડનું પેકેટ ઓર્ડર કર્યું હતું,   જેની અંદરથી એક જીવતો ઉંદર ડિલિવરી કરવામાં આવ્યો. આ આપણા બધા માટે ચિંતાજનક છે. જો માત્ર 10 મિનિટની ડિલિવરીમાં આવો સામાન આવે છે તો હું થોડા કલાકો વધુ રાહ જોવાનું પસંદ કરીશ. 

આ વ્યક્તિની ફરિયાદ પર કંપનીએ આપ્યો જવાબ
બ્રેડના પેકેટમાં જીવતા ઉંદરની તસવીર સોશિયલ મીડિયા પર વાયરલ થયા બાદ કંપનીએ પોતાનો જવાબ આપ્યો હતો. બ્લિંકિટે નીતિન અરોરાના ટ્વીટનો જવાબ આપતા કહ્યું, "હલ્લો નિતિન આ તે અનુભવ નથી,   જે અમે ઈચ્છતા હતા કે તમને મળે.   કૃપા કરીને આ બાબતની તપાસ કરવા માટે તમારો રજિસ્ટર્ડ નંબર અથવા ઓર્ડર આઈડી મેસેજ દ્વારા શેર કરો. બાદમાં બ્લિંકિટે જાણકારી આપી કે તેણે પાર્ટનર સ્ટોરને ડી-લિસ્ટ કરી દીધો છે અને કંપની સ્ટોરના માલિક સાથે તપાસ કરી રહી છે.