- પીએમ મોદી વર્લ્ડ ક્લાઈમેટ એક્શન સમિટમાં ભાગ લેવા દુબઈ પહોંચ્યા
- 'મોદી-મોદી', 'અબકી બાર મોદી સરકાર' ના નારા સાથે પીએમ મોદીનું સ્વાગત
- ભારતીય સમુદાયને મળ્યા બાદ પીએમ મોદીએ પણ ખુશી વ્યક્ત કરી
પ્રધાનમંત્રી નરેન્દ્ર મોદી COP-28 વર્લ્ડ ક્લાઈમેટ એક્શન સમિટમાં ભાગ લેવા માટે 1 ડિસેમ્બરે દુબઈ, સંયુક્ત આરબ અમીરાત (UAE) પહોંચ્યા હતા. ત્યાં NRIઓએ 'મોદી, મોદી' ના નારા અને તેની સાથે જ 'અબકી બાર મોદી સરકાર' સૂત્રોચ્ચાર સાથે એમનું સ્વાગત કરવામાં આવ્યું હતું.
પીએમ મોદીએ ટ્વિટ કર્યું કે 'હું COP-28 સમિટમાં ભાગ લેવા માટે દુબઈ પહોંચ્યો છું. અમે સમિટની કાર્યવાહીની આતુરતાથી રાહ જોઈ રહ્યા છીએ જેનો ઉદ્દેશ વધુ સારો ગ્રહ બનાવવાનો છે.' વિદેશ મંત્રાલયના પ્રવક્તા અરિંદમ બાગચીએ ટ્વીટ કર્યું કે 'PM નરેન્દ્ર મોદી COP28 વર્લ્ડ ક્લાઈમેટ એક્શન સમિટ માટે UAE પહોંચ્યા. PM નરેન્દ્ર મોદીનું UAE ના નાયબ વડા પ્રધાન અને ગૃહ પ્રધાન શેખ સૈફ બિન જાયદ અલ નાહ્યાને એરપોર્ટ પર સ્વાગત કર્યું હતું. WCAS માં તેમની ભાગીદારી ઉપરાંત, વડા પ્રધાન વૈશ્વિક નેતાઓ સાથે બેઠકો કરશે અને આબોહવા પગલાંને આગળ વધારવાના હેતુથી વિશેષ કાર્યક્રમોમાં ભાગ લેશે.'
પ્રધાનમંત્રી નરેન્દ્ર મોદી દુબઈની એક હોટલમાં એકઠા થયેલા NRIને મળ્યા હતા. પીએમ મોદી જ્યારે દુબઈમાં તેમની હોટલ પહોંચ્યા ત્યારે ભારતીય સમુદાયના સભ્યોએ સાંસ્કૃતિક નૃત્ય કર્યું હતું. દુબઈમાં પીએમ મોદીને મળ્યા બાદ ભારતીય ડાયસ્પોરાના એક સભ્યએ કહ્યું કે હું 20 વર્ષથી યુએઈમાં રહું છું પરંતુ આજે પણ એવું લાગ્યું કે જાણે મારું પોતાનું કોઈ આ દેશમાં આવ્યું છે.'
દુબઈમાં ભારતીય સમુદાયને મળ્યા બાદ પીએમ મોદીએ પણ ખુશી વ્યક્ત કરી હતી. તેણે ઘણી તસવીરો પણ શેર કરી છે. પીએમ મોદીએ લખ્યું, “દુબઈમાં ભારતીય સમુદાય દ્વારા મળેલા ઉષ્માભર્યા સ્વાગતથી હું ખૂબ જ પ્રભાવિત થયો છું. તેમનો ટેકો અને ઉત્સાહ એ આપણી જીવંત સંસ્કૃતિ અને મજબૂત સંબંધોનો પુરાવો છે.''
સાથે જ હાલ ઘણા વિડીયો વાયરલ થઈ રહ્યા છે જેમાં વડાપ્રધાન નરેન્દ્ર મોદી દુબઈ પહોંચ્યા ત્યારે NRIઓએ 'મોદી, મોદી'ના નારા લગાવ્યા હતા. અને 'અબકી બાર મોદી સરકાર' સૂત્રોચ્ચાર કર્યા હતા.
જણાવી દઈએ કે વડાપ્રધાન મોદી યુનાઈટેડ નેશન્સ કોન્ફરન્સ ઓફ પાર્ટીઝ ઓન ક્લાઈમેટમાં ભાગ લઈ રહ્યા છે. શુક્રવારે, તેઓ COP28 તરીકે ઓળખાતી વર્લ્ડ ક્લાઈમેટ એક્શન સમિટમાં ભાગ લેશે. ગ્રીનહાઉસ ગેસના ઉત્સર્જનને ઘટાડવા અને આબોહવા પરિવર્તનને અસરકારક રીતે નિપટાવવાની રીતો પર ચર્ચા કરવા માટે ઘણા વિશ્વ નેતાઓ ક્લાઈમેટ એક્શન સમિટમાં હાજરી આપવાના છે. વડાપ્રધાન અન્ય ત્રણ ઉચ્ચ સ્તરીય કાર્યક્રમોમાં પણ હાજરી આપવાના છે. COP28 30 નવેમ્બરથી 12 ડિસેમ્બર સુધી સંયુક્ત આરબ અમીરાતની અધ્યક્ષતામાં યોજાઈ રહી છે.
