નવાજૂનીના એંધાણ / CR પાટીલ કેન્દ્રમાં ગયા તો આ દિગ્ગજ મંત્રીને સોંપાઇ શકે ગુજરાતનું સુકાન, જાણો અન્ય કયા નામો રેસમાં

• જે.પી નડ્ડાને મળ્યા કેન્દ્રીય મંત્રી મનસુખ માંડવીયા
• હવે ગુજરાત અને MPમાં સરપ્રાઈઝ આપશે ભાજપ!
• મનસુખ માંડવીયાને સોંપાઈ શકે છે જવાબદારી 

લોકસભાની ચૂંટણી નજીક આવી છે ત્યારે રાજકારણમાં ફેરફારનો દોર પણ શરૂ થઈ ગયો છે. ગુજરાત ભાજપના પ્રદેશ પ્રમુખ સી.આર પાટીલ ગુજરાત વિધાનસભાની સફળ કામગીરીને લઈ હવે લોકસભાની ચૂંટણી ચોક્કસ લડશે, પરંતુ હવે તેમનો કાર્યકાળ પૂરો થતો હોવાની વાત પણ સામે આવી છે તો હવે ગુજરાતના નવા પ્રમુખ કોણ હશે તે દિશામાં પણ ચર્ચા ચાલી રહી છે. 

જે.પી નડ્ડા અને મનસુખ માંડવીયા વચ્ચે યોજાઈ બેઠક
એક માહિતી મુજબ ભાજપે ગઈકાલે પંજાબ સહિત 4 રાજ્યોના પ્રદેશ પ્રમુખોને બદલ્યા છે. પરંતુ આ યાદીમાં ગુજરાતનું નામ નહોતું, જેના કારણે એવી અટકળો તેજ થઈ ગઈ હતી કે ગુજરાત ભાજપના પ્રદેશ અધ્યક્ષ પદે સી.આર પાટીલ યથાવત રહેશે. પરંતુ આજે જે.પી નડ્ડા અને મનસુખ માંડવીયા વચ્ચે 40 મિનિટ સુધી બેઠક યોજાઈ, જેમાં ગુજરાતનો મુદ્દો કેન્દ્ર સ્થાને હતો.

ભાજપ કરી શકે છે નવા પ્રદેશ પ્રમુખની જાહેરાત 
2024માં યોજાનારી લોકસભાની ચૂંટણી પહેલા ભાજપના સંગઠનમાં મોટો ફેરબદલ શરૂ થઈ ગયો છે. હવે એવા સમાચાર છે કે ભારતીય જનતા પાર્ટી ગુજરાત અને મધ્ય પ્રદેશમાં નવા પ્રદેશ પ્રમુખની જાહેરાત કરી શકે છે. સૂત્રોના જણાવ્યા અનુસાર, કેન્દ્રીય આરોગ્ય મંત્રી મનસુખ માંડવીયાને ગુજરાત પ્રદેશ અધ્યક્ષની જવાબદારી સોંપવામાં આવી શકે છે. એટલું જ નહીં ગુજરાત ભાજપના મહામંત્રી પ્રદિપસિંહ વાઘેલા, રાજ્યકક્ષાના મંત્રી જગદીશ પંચાલ અને ભરત બોઘરાનું નામ પણ રેસમાં ચાલી રહ્યું છે. મધ્યપ્રદેશમાં પ્રદેશ અધ્યક્ષ પદ માટે કેન્દ્રીય મંત્રી નરેન્દ્ર સિંહ તોમર, કૈલાશ વિજયવર્ગીયનું નામ ચાલી રહ્યું છે. આ સાથે જ પ્રહલાદ પટેલ અને સુમરેસિંહ સોલંકીના નામ પણ ચર્ચામાં છે.

આ ચાર રાજ્યોમાં બદલાયા પ્રદેશ પ્રમુખ 
ગઈકાલે ભાજપે આંધ્રપ્રદેશ, તેલંગાણા, પંજાબ અને ઝારખંડમાં નવા પ્રદેશ પ્રમુખોના નામની જાહેરાત કરી હતી. ભાજપના રાષ્ટ્રીય અધ્યક્ષ જેપી નડ્ડાએ પૂર્વ કેન્દ્રીય મંત્રી ડી. પુરંદેશ્વરીને આંધ્રપ્રદેશના નવા પ્રદેશ અધ્યક્ષ તરીકે નિયુક્ત કર્યા છે. બીજી તરફ વર્તમાન કેન્દ્રીય મંત્રી જી. કિશન રેડ્ડીને ચૂંટણી રાજ્ય તેલંગાણાના પ્રદેશ અધ્યક્ષ બનાવવામાં આવ્યા છે. કોંગ્રેસમાંથી ભાજપમાં આવેલા સુનીલ જાખડને પંજાબ રાજ્યની કમાન સોંપવામાં આવી છે. ઝારખંડમાં રાજ્યના પૂર્વ મુખ્યમંત્રી બાબુલાલ મરાંડીને નવા પ્રદેશ અધ્યક્ષ તરીકે નિયુક્ત કરવામાં આવ્યા છે. 

PMના નિવાસસ્થાને યોજાઈ હતી બેઠક
લોકસભાની ચૂંટણી પહેલા ભાજપે પોતાની રણનીતિ મજબૂત બનાવવાનું શરૂ કરી દીધું છે. તાજેતરમાં જ પીએમ મોદીની અધ્યક્ષતામાં તેમના નિવાસસ્થાને એક બેઠક યોજાઈ હતી. આ બેઠકમાં પાર્ટીના રાષ્ટ્રીય અધ્યક્ષ જેપી નડ્ડા, કેન્દ્રીય ગૃહ મંત્રી અમિત શાહ અને સંગઠન મંત્રી બીએલ સંતોષ પણ હાજર રહ્યા હતા. સૂત્રોના જણાવ્યા અનુસાર, આ બેઠકમાં સંગઠનની સાથે સાથે સરકારમાં પણ ફેરબદલ થશે તેવી ચર્ચા કરવામાં આવી હતી.