- ઉજ્જેનના ભાજપ સાંસદની આઠ વર્ષની પુત્રી અહાના પીએમ મોદીને મળી
- પીએમ મોદીએ અહાનાએ પૂછ્યું, હું શું કરું છું તને ખબર છે
- અહાનાએ કહ્યું- તમે લોકસભામાં નોકરી કરો છો
- તમને રોજ ટીવી પર જોઉ છું- અહાના
ભોપાલના ઉજ્જેનના ભાજપ સાંસદ અનિલ ફિરોઝીયા અને તેમના પરિવારે સંસદ ભવનમાં પીએમ મોદી સાથે મુલાકાત કરી હતી. આ દરમિયાન તેમના પરિવારની પાંચ વર્ષની પુત્રી અહાના પણ પીએમ મોદીને મળી હતી. પીએમ મોદીએ અહાનાને જ્યારે પૂછ્યું કે શું તું મને ઓળખે છે, ત્યાર બાદ અહાનાએ કહ્યું, હા, તમે મોદી છો અને રોજ ટીવી પર આવો છો, ત્યાર બાદ ફરી વાર મોદીએ અહાનાને કહ્યું કે તને ખબર છે કે હું શું કરુ છું ત્યારે અહાનાએ ભોળાભાવે જવાબ આપ્યો કે હા, તમે લોકસભામાં નોકરી કરો છો.
અહાનાનો જવાબ સાંભળીને પીએમ મોદી સહિતના લોકો ખડખડાટ હસ્યા
અહાનાનો જવાબ સાંભળીને ત્યાં હાજર રહેલા પીએમ મોદી સહિતના લોકો ખડખડાટ હસી પડ્યાં. બધાને હસતા જોઈને અહાના પણ હસવા લાગી હતી. આ પછી પીએમ મોદીએ અહાનાને ચોકલેટ આપી હતી. સાથે જ પીએમ મોદીએ અનિલ ફિરોઝિયાના વજન ઘટાડવા માટે વખાણ કર્યા પરંતુ કહ્યું કે તેમને અત્યારે વધુ વજન ઘટાડવાની જરૂર છે.
નીતિન ગડકરીએ અનિલ ફિરોઝિયાને વજન ઘટાડવાની સલાહ આપી હતી
અનિલ ફિરોઝિયા એ જ ભાજપના સાંસદ છે જેમને કેન્દ્રીય માર્ગ પરિવહન પ્રધાન નીતિન ગડકરીએ વજન ઘટાડવાની સલાહ આપી હતી. ગડકરીએ કહ્યું હતું કે જો તેમનું વજન એક એક કિલો ઓછું થશે તો તેમના વિસ્તારોને 1000 કરોડ રૂપિયા મળશે. ગડકરીના આ નિવેદન બાદ ફિરોઝિયાએ અત્યાર સુધીમાં 21 કિલો વજન ઘટાડ્યું છે, એટલે કે તેમણે પોતાના વિસ્તાર માટે 21 હજાર કરોડ રૂપિયાની ખાતરી આપી છે. કેન્દ્રીય પરિવહન પ્રધાન નીતિન ગડકરી 24 ફેબ્રુઆરીએ ઉજ્જૈન આવ્યા હતા. વિકાસકાર્યોની જાહેરાતો વચ્ચે તેમણે આરોગ્ય અંગે પણ સલાહ આપી હતી અને સાંસદ અનિલ ફિરોઝિયાને પડકાર ફેંક્યો હતો. જેને સ્વીકારીને 4 મહિનામાં સાંસદે 21 કિલો વજન ઘટાડ્યું અને હવે કેન્દ્રીય મંત્રીના નિવેદન મુજબ તેઓ 21000 કરોડના હકદાર બની ગયા છે. આ પહેલા જ્યારે ભાજપના સાંસદ અનિલ ફિરોઝિયાએ પોતાનું વજન 15 કિલો ઘટાડ્યું હતું ત્યારે તેમણે મીડિયાને કહ્યું હતું કે હું દુનિયાનો સૌથી મોંઘો સાંસદ છું, અત્યારે 6000 કરોડ આપી ચૂક્યો છું. વિકાસ ચાલુ છે, મેડિકલ કોલેજ મળી. મને પૂરો વિશ્વાસ છે કે જો તમે 15 કિલો વજન ઓછું કર્યું છે તો તમને વિકાસના કામો માટે વધુ પૈસા મળશે.
