- CM યોગી આદિત્યનાથે આજે મોટું એલાન કર્યું
- કહ્યું UPમાં 1 કરોડ યુવાનોને રોજગારી આપવામાં આવશે
- 6 વર્ષમાં 6 લાખ લોકોને રોજગારી આપવામાં આવી હતી- CM
મુખ્યમંત્રી યોગી આદિત્યનાથ લોકભવનમાં આયોજિત નિમણૂક પત્ર વિતરણનાં કાર્યક્રમમાં જનસંબોધન કરી રહ્યાં છે. આ દરમિયાન તેમણે મિશન રોજગાર અંતર્ગત નવા પસંદ કરાયેલા 393 હોમિયોપેથિક ફાર્માસિસ્ટને નિમણૂક પત્રો આપવામાં આવ્યાં હતાં. જનસંબોધન દરમિયાન તેમણે કહ્યું કે ઉત્તરપ્રદેશ સરકારે 6 વર્ષોમાં 6 લાખ યુવાનોને સરકારી નોકરી અપાવી છે. હવે આગળ 1 કરોડ યુવાનોને રોજગાર આપવામાં આવશે.
38 લાખ કરોડ રૂપિયાનું રોકાણ
તેમણે કહ્યું કે ગ્લોબલ ઈન્વેસ્ટર્સ સમિટમાં 35 લાખ કરોડ રૂપિયાનું રોકાણ કરવા માટેનો MoU કરવામાં આવ્યો હતો પણ હવે આ આંકડો વધીને 38 લાખ કરોડ થઈ ગયો છે જેના લીધે વધારે યુવાનોને રોજગાર મળી શકશે.
હવે માહોલ સંપૂર્ણપણે બદલાઈ ગયો છે- CM
CM યોગીએ કહ્યું કે, 'હવે યુપી રોકાણ અને રોજગાર માટેનું મુખ્ય સ્થળ બની ગયું છે. 6 વર્ષ પહેલાં દંગા અને હિંસાને લીધે વિકાસ નહોતો થયો. હવે માહોલ સંપૂર્ણપણે બદલાઈ ગયો છે. '
યુવાનો માટે ખાસ નવા કોર્ષ શરૂ થશે
તેમણે કહ્યું કે કોરોના મહામારીમાં આયુષ ચિકિત્સા પદ્ધતિ તેમજ યોગે સમગ્ર વિશ્વમાં પોતાનો ડંકો વગાડ્યો હતો. તેમણે કહ્યું કે ભારતનાં યોગ તેમજ પ્રાકૃતિક ચિકિત્સાને સમગ્ર વિશ્વએ અપનાવ્યું છે. તેવામાં યુવાનોએ આયુર્વેદ, હોમ્યોપેથી, યૂનાની અને સિદ્ધા વગેરેમાં કરિયર બનાવવામાં સંકોચ ન કરવો. ટૂંક જ સમયમાં યુવાનો માટે નવી ડિગ્રી અને ડિપ્લોમાનાં કોર્ષ શરૂ કરવામાં આવશે.
