સ્વાસ્થ્ય / વધુ સોફ્ટડ્રીંક્સ પીનારા હવે ચેતી જજો નહીં તો થઇ શકે છે...

જામા ઇન્ટરનલ મેડિસિન જર્નલમાં પબ્લિશ એક રિસર્ચ મુજબ જે લોકો દરરોજ બે કે તેથી વધુ ગ્લાસ સોફટડ્રીંકસ પીવે છે તે પોતાના મોતને આમંત્રણ આપે છે. આ રિસર્ચ માટે સંશોધકોએ યુરોપના 10 દેશોના સાડા ચાર લાખથી વધુ લોકોના આરોગ્ય પર સોફટડ્રીંકસથી કેવી અસર થાય છે તેનો ડેટા એકત્ર કર્યો હતો.

જેમાં ડાયેટ તરીકે પ્રચાર કરવામાં આવે છે તેવાં આર્ટિફિશિયલ સ્વીટનરવાળા સોફટડ્રીંકસ પીનારા લોકો પણ સામેલ હતાં. લંડનની ઇમ્પિરિયલ કોલેજના જોનાથન પિયરસનના જણાવ્યાં મુજબ કોલા જેવા સોફટડ્રીંકસ (Soft Drinks) વધુ પડતું પીતા લોકોને હૃદયની બિમારી અને સ્ટ્રોકનો ખતરો અનેકગણો વધી જાય છે.

તેઓ કહે છે કે સોફટડ્રીંકસની આરોગ્ય પર આવી માઠી અસર કેમ થાય છે તેના પર વધુ સંશોધન જરુરી છે. જો કે સોફટડ્રીંકસ વધુ પડતુ પીતા લોકોમાં વહેલા મૃત્યુ પાછળ અન્ય પરિબળો પણ જવાબદાર હોઇ શકે છે. આવા લોકો જલ્દી મેદસ્વી (Obese) બને છે અને વધુ પડતા વજનના કારણે થતી બિમારીઓનો ભોગ બને છે. ઉલ્લેખનીય છે કે 100 મિલિલીટર કોકાકોલામાં 10.6 ગ્રામ સુગર હોય છે.

અમેરિકન હાર્ટ એસોસીએશન કહે છે કે પુખ્તવયની હેલ્ધી વ્યકિતએ દરરોજ સાતથી નવ ચમચીથી વધુ સુગર લેવી ન જોઇએ. જો કે બદલાતી લાઇફ સ્ટાઇલને જોતા ઘણાં નિષ્ણાંતો આ માપ સાથે સંમત નથી. જે લોકો ખાસ નિયમિત એકસર્સાઇઝ ન કરતા હોય અને બેઠાડું જીવન જીવતા હોય તેમણે બને એટલી ઓછી સુગર લેવી જોઇએ.