ભાજપ એકશનમાં / ગુજરાતના 71 MLA રાજસ્થાન તો 48 ધારાસભ્યો જશે મધ્યપ્રદેશ, વિધાનસભા ચૂંટણીને લઇ ભાજપ એક્ટિવ મોડમાં

• 5 રાજ્યોની ચૂંટણીને લઈને ભાજપ એકશનમાં
• સંગઠનને મજબૂત કરવા તમામ MLAના શિરે જવાબદારી
• MLAને પોતાના વિસ્તારમાં પહોંચી જવા પણ મોવડી મંડળ દ્વારા સૂચના

છત્તીસગઢ, મધ્યપ્રદેશ, રાજસ્થાન, તેલંગાણા અને મિઝોરમ સહિતના પાંચ રાજ્યોમાં આ વર્ષે વિધાનસભાની ચૂંટણી યોજાવા જઈ રહી છે. જેને લઇને અત્યારથી જ રાજકીય વાઘા સજાવી ભાજપ કામગીરીમાં જોતરાયું છે. રાજસ્થાન અને છત્તીસગઢમાં કોંગ્રેસનું શાસન છે તો તેલંગાણામાં BRS સત્તામાં છે. રાજસ્થાન અને છત્તીસગઢ સહિતનો ગઢ જીતવા ભાજપ અત્યારથી જ એક્શન મોડમાં કામ કરી રહ્યું છે. જેને લઈને ગુજરાત ભાજપના MLAને અન્ય રાજ્યમાં જવાબદારી સોંપવામાં આવી છે.

10 દિવસ સુધી ભાજપના ધારાસભ્યો કામગીરી કરશે

હાઈકમાન્ડના આદેશ અનુસાર ગુજરાતના 71 MLA રાજસ્થાન, 48 MLA મધ્યપ્રદેશ ચૂંટણીને લઈને પચાર, પ્રસાર અર્થે જશે. સરકારના કામો ગામડાના ખૂણે ખૂણે પહોંચે અને જમીન લેલવે સંગઠનને મજબૂત કરવા સહિતની દરેક MLA જેતે વિસ્તારમાં જઈ સંગઠન લેવલે કામગીરી કરશે. એટલું જ નહીં તાબડતોબ આજ સુધીમાં MLAને પોતાના વિસ્તારમાં પહોંચી જવા પણ મોવડી મંડળ દ્વારા સૂચના આપી દેવામાં આવી છે. જેના ભાગરૂપે 10 દિવસ સુધી ભાજપના ધારાસભ્ય પોતાને સોંપાયેલા મત વિસ્તારમાં કામગીરી કરશે.

ભાજપ દ્વારા મધ્યપ્રદેશ અને છત્તીસગઢમાં ઉમેદવારોની પ્રથમ યાદી જાહેર 

નોંધનીય છે કે ચાલુ વર્ષના અંતમાં મધ્યપ્રદેશ અને રાજસ્થાન સહિતના રાજ્યોમાં ચૂંટણીના ભાગરૂપે ગઈકાલે ભાજપ દ્વારા મધ્યપ્રદેશ અને છત્તીસગઢમાં ઉમેદવારોની પ્રથમ યાદી જાહેર કરી દેવામાં આવી હતી. જેમાં મધ્યપ્રદેશના 39 અને છત્તીસગઢના 21 ઉમેદવારોના નામ જાહેર કરી દેવાયા છે. આમ આ રાજ્યોમાં બરાબરનો ચૂંટણીનો જંગ જામ્યો છે.

આ 5 રાજ્યોમાં યોજાશે વિધાનસભાની ચૂંટણી 
વર્ષ 2023માં આ 5 રાજ્યોમાં વિધાનસભાની ચૂંટણી યોજાવા જઈ રહી છે- મિઝોરમ, મધ્યપ્રદેશ, રાજસ્થાન, છત્તીસગઢ અને તેલંગાણા. મિઝોરમમાં વિધાનસભાની કુલ 40 સીટો છે. અહીં લોકસભાની 1 સીટ અને રાજ્યસભાની 1 સીટ છે. મધ્યપ્રદેશમાં વિધાનસભાની કુલ 230 સીટો છે. અહીં લોકસભાની 29 અને રાજ્યસભાની 11 સીટો છે. 

રાજસ્થાનમાં લોકસભાની કુલ 25 સીટો
રાજસ્થાનમાં વિધાનસભાની કુલ 200 સીટો છે. અહીં લોકસભાની 25 અને રાજ્યસભાની 10 સીટો છે. છત્તીસગઢમાં કુલ 90 વિધાનસભા સીટો છે. અહીં લોકસભાની 11 અને રાજ્યસભાની 5 સીટો છે. તો તેલંગાણામાં કુલ 119 વિધાનસભા સીટો છે. અહીં લોકસભાની 17 અને રાજ્યસભાની 7 સીટો છે.