OMG / વેલેન્ટાઇન્સ ડેના મેસેજિસ છેક આઠ મહિને મળ્યાં, કેટલાંકના બ્રેક-અપ થઈ ગયાં જ્યારે અમુક તો...

જયારે પોસ્ટનો જમાનો હતો ત્યારે દિવસો,મહિનાઓ કે વર્ષો પછી ટપાલ મળે તે સામાન્ય વાત હતી.પણ ટેકનોલોજી અને ઇન્સ્ટન્ટ મેસેજીસના જમાનામા કોઇ મિત્ર કે સ્વજને મોકલેલો ટેક્સ્ટ મેસેજ તમને આઠ મહિના પછી મળે તો? આવો પ્રશ્ન કોઇ કરે તો પહેલા તો કોઇ તેના પર વિશ્વાસ કરે નહીં પણ આ હકીકત છે. 
ગત વેલેન્ટાઇન ડે પર મોકલેલા ટેક્સ્ટ મેસેજ ગત ઓકોટોબર માસમાં લોકોને મળી રહ્યા છે.નવાઇની વાત એ છે કે આ ઘટના ટેકનોલોજીમાં અગ્રેસર બનાવતા અમેરિકામાં બની છે.

ટેકનીકલ ખામીને કારણે અટવાયા મેસેજ
 
ખરેખર આઠ મહિના પહેલા, વેલેન્ટાઇન ડે નિમિત્તે અમેરિકામાં લાખો લોકોએ એકબીજાને ટેક્સ્ટ સંદેશાઓ મોકલ્યા હતા. પરંતુ ટેકનિકલ ખામીને કારણે હવે મેસેજ મળી રહ્યા છે.એન્ડ્રોઇડ મોબાઇલ અને આઇફોનના યુઝર્સને આ અનુભવ થયા છે. એક યુઝરના કહેવા પ્રમાણે તેને બે વર્ષ પહેલા કોઇએ મોકલેલો મેસેજ હવે મળ્યો છે.

USAના મોટા ટેલિકોમ માથાઓએ કર્યું ભોપાળું

યુ.એસ.ની તમામ ટેલિકોમ કંપનીઓને સર્વિસ આપતી સિનિવર્સ નામની કંપનીને ટેકનિકલ ખામી માટે દોષી ઠેરવવામાં આવી છે.યુ.એસ.ની ટેલિકોમ કંપની ટી-મોબાઈલ, એટી એન્ડ ટી, સ્પ્રિન્ટ અને વેરીઝોનના યુઝર્સે આ છબરડા માટે ટ્વિટર સહિત સોશિયલ મિડીયા પર નારાજગી વ્યક્ત કરી છે.

વીતેલા સમયના સંદેશ હવે બન્યા અર્થહીન

 ઘણા વપરાશકર્તાઓએ ફરિયાદ પણ કરી છે કે જેમની સાથે બ્રેકઅપ થઇ ગયું છે તેવી વ્યકિતનો મેસેજ હવે મળ્યો છે.કેટલાકે કહ્યું કે જે વ્યકિત હવે દુનિયામાં હયાત નથી તેના મેસેજ હવે મળી રહ્યા છે. સિનિવર્સ કંપનીએ આ ખામી માટે તેની વેબસાઇટ પર માફી માગી છે. કંપનીએ એમ પણ કહ્યું છે કે હવે આ ખામી દૂર થઈ ગઈ છે અને ભવિષ્યમાં આવી કોઈ સમસ્યા સર્જાશે નહીં.