કાર્યવાહી / ઉતરાયણ પૂર્વે ચાઈનીઝ દોરીના વેચાણનો પર્દાફાશ, અમદાવાદ પોલીસે લાખોના મુદ્દામાલ સાથે એકની કરી ધરપકડ

• અમદાવાદમાં ઉતરાયણ પૂર્વે ચાઈનીઝ દોરીના વેચાણનો પર્દાફાશ
• સરખેજમાં ચાઈનીઝ દોરીનું ગોડાઉન ઝડપાયું 
• પોલીસે 2520 રીલ સાથે એક આરોપીની કરી ધરપકડ 

ઉતરાયણ પર્વને હવે ગણતરીના દિવસો બાકી રહ્યા છે ત્યારે બજારમાં પતંગ, દોરાનું મોટાપાયે આગમન થયું છે. જેમાં ઉતરાયણ પૂર્વે ચાઈનીઝ દોરીના વેચાણ પર પ્રતિબંધ હોવા છતાં અનેક વેપારીઓ છાને ખૂણે વેચાણ કરતા હોય છે. તેવામાં અમદાવાદમાં મકરસંક્રાંતિ અગાઉ ચાઈનીઝ દોરીના વેચાણનો પર્દાફાશ થયો છે.

અમદાવાદના સરખેજમાં પોલીસની કાર્યવાહી

અમદાવાદના સરખેજ વિસ્તારના ચાઈનીઝ દોરીનું ગોડાઉનની બાતમીને પગલે પોલીસ દોડી ગઈ હતી. જ્યા તપાસ હાથ ધરતા ચાઈનીઝ દોરીનું ગોડાઉન ઝડપાયું હતું. જેને પગલે પોલીસે 2520 રીલ સાથે એક આરોપીને દબોચી લીધો હતો. પોલીસે 2. 54 લાખના મુદ્દામાલ સાથે અબ્દુલ ગની શેખ નામના વેપારીને ઝડપી પાડી કાયદેશરની કાર્યવાહી હાથ ધરી હતી. જ્યારે વધુ એક આરોપીનું નામ પણ ખુલ્યું છે.

પોલીસે 2.54 લાખનો મુદ્દામાલ જપ્ત કર્યો

ઉલ્લેખનિય છે કે ઉતરાયણમાં ચાઈનીઝ દોરાના ઉપયોગને લઈને અબોલ પશુ પક્ષોઓને ઇજા અને મોતના કિસ્સાને ધ્યાને લઇ આ દોરી પર પ્રતિબંધ લાગવાયો છે. બીજી બાજુ વાહનચાલકોના ગળા કપાઈ જવાની પણ ઘટનાઓ સામે આવતી હોય છે. આ દોરી પર પ્રતિબંધ હોવા છતાં બેફામ વેંચાઈ રહી છે. જેની સામે કાર્યવાહી કરવા માંગ ઉઠાવાઈ છે.