નેશનલ / 2026મા આ પાંચ રાજ્યોમાં જામશે ચૂંટણી જંગ, NDA કરતાં વધુ ઈન્ડિયા બ્લોકની અગ્નિપરીક્ષા

Assembly Elections 2026: નવા વર્ષના આગમન સાથે આપણે 2026માં પ્રવેશ કર્યો છે. ભારતના રાજકીય પરિદૃશ્યની દ્રષ્ટિએ 2026ને ચૂંટણી વર્ષ તરીકે જોવામાં આવી રહ્યું છે. આ વર્ષની શરૂઆત મહારાષ્ટ્રમાં બીએમસી સહિત 29 મહાનગરોમાં નિગમ ચૂંટણીઓથી થાય છે, અને દક્ષિણ ભારતથી ઉત્તરપૂર્વ સુધી વિધાનસભા ચૂંટણીઓ યોજાવાની છે, જ્યાં વાસ્તવિક કસોટી એનડીએ માટે નહીં, પરંતુ વિપક્ષી ગઠબંધન માટે હશે.

2026 દેશ માટે સંપૂર્ણ ચૂંટણી વર્ષ બનવા જઈ રહ્યું છે. પૂર્વ ભારતમાં પશ્ચિમ બંગાળ અને આસામ તેમજ દક્ષિણ ભારતમાં પુડુચેરી, તમિલનાડુ અને કેરળમાં વિધાનસભા ચૂંટણીઓ યોજાવાની છે. વધુમાં 75 રાજ્યસભા બેઠકો માટે ચૂંટણીઓ એપ્રિલથી નવેમ્બર 2026 દરમિયાન યોજાવાની છે, જ્યારે ઉત્તર પ્રદેશમાં પંચાયત ચૂંટણીઓ પણ યોજાઈ રહી છે, જેને 2027ની સેમિ-ફાઇનલ માનવામાં આવે છે.

એવું માનવામાં આવે છે કે 2026ના ચૂંટણી પરિણામો અને રાજકીય પ્રવૃત્તિઓ માત્ર રાજ્ય માટે રાજકીય મંચ સાથે સાથે દેશનું ભાગ્ય અને દિશા પણ નક્કી કરશે. આવી સ્થિતિમાં રાજકારણીઓના નિવેદનો અને યોજનાઓની દૈનિક જાહેરાતોને કારણે આ રાજ્યોમાં ચૂંટણીનું વાતાવરણ રાજકીય રીતે ગરમ થઈ ગયું છે.

2026 માં પાંચ રાજ્યો માટે ચૂંટણી

2026 માં ચાર રાજ્યો અને એક કેન્દ્રશાસિત પ્રદેશમાં વિધાનસભાની ચૂંટણીઓ યોજાવાની છે: આસામ, કેરળ, તમિલનાડુ, પશ્ચિમ બંગાળ અને કેન્દ્રશાસિત પ્રદેશ પુડુચેરી. આસામ વિધાનસભામાં 126 બેઠકો છે, કેરળમાં 140, તમિલનાડુમાં 234 છે, પશ્ચિમ બંગાળમાં 294 અને કેન્દ્રશાસિત પ્રદેશ પુડુચેરીમાં 30 બેઠકો છે.

એપ્રિલ, જૂન અને નવેમ્બર દરમિયાન દેશભરના વિવિધ રાજ્યોમાં રાજ્યસભાની 75 બેઠકો ખાલી થઇ રહી છે, જેમાં ઉત્તર પ્રદેશમાં 10, બિહારમાં 5, મહારાષ્ટ્રમાં 7 અને રાજસ્થાન અને મધ્યપ્રદેશમાં 3-3 બેઠકોનો સમાવેશ થાય છે. આ ઉપરાંત, તમિલનાડુ અને પશ્ચિમ બંગાળમાં પણ રાજ્યસભાની ચૂંટણીઓ યોજાવાની છે. મુંબઈ મ્યુનિસિપલ કોર્પોરેશન (BMC) સહિત મહારાષ્ટ્રમાં 29 મ્યુનિસિપલ કાઉન્સિલોમાં ચૂંટણીઓ યોજાઈ રહી છે.

મમતા બેનર્જી બંગાળમાં લિટમસ કસોટી

પશ્ચિમ બંગાળ વિધાનસભાનો વર્તમાન કાર્યકાળ 7 મે, 2026 ના સમાપ્ત થઈ રહ્યો છે, જેથી ચૂંટણી પંચ એપ્રિલ-મે 2026 માં ચૂંટણી કરાવી શકે છે. બંગાળમાં કુલ 294 વિધાનસભા બેઠકો છે. 2021ની ચૂંટણીમાં ટીએમસીએ 213 બેઠકો જીતી હતી, જ્યારે ભાજપને ફક્ત 77 બેઠકો મળી હતી.

મમતા બેનર્જી 2011 થી પશ્ચિમ બંગાળમાં સત્તામાં છે, અને ટીએમસીએ સતત ત્રણ વિધાનસભા ચૂંટણીઓ જીતી છે. મમતા બેનર્જી સતત ચોથી જીત માટે પ્રયત્નશીલ તો સામે ભાજપ કોઇ પણ સંજોગોમાં આગામી ચુંટણી જીતવા બેતાબ છે. મમતા બેનર્જી માટે આ ચૂંટણી તેમની સત્તા જાળવી રાખવાની કસોટી છે, જ્યારે ડાબેરીઓ અને કોંગ્રેસ માટે તે તેમના રાજકીય અસ્તિત્વને બચાવવાની કસોટી છે.

તમિલનાડુમાં એમકે સ્ટાલિનની કસોટી

તમિલનાડુ વિધાનસભાનો વર્તમાન કાર્યકાળ 10 મે, 2026 ના સમાપ્ત થઈ રહ્યો છે. પરિણામે કેરળમાં ચૂંટણીઓ એપ્રિલ-મે 2026 માં યોજાઈ શકે છે. તમિલનાડુમાં ડીએમકે નેતા સ્ટાલિન પણ કસોટીનો સામનો કરશે, જ્યારે એઆઈએડીએમકે પણ સત્તામાં પાછા ફરવા માટે બેતાબ છે, પરંતુ ભાજપ સાથે ગઠબંધન તુટી ગયા પછી મુકાબલો રોચક બની છે.

2021 ની ચૂંટણીમાં એમકે સ્ટાલિનના નેતૃત્વમાં ડીએમકેએ રાજ્યની 234 બેઠકોમાંથી 133 બેઠકો જીતીને સરકાર બનાવી હતી. ડીએમકે સાથે જોડાણ કરીને કોંગ્રેસે 18 બેઠકો જીતી હતી. 10 વર્ષ સુધી રાજ્યમાં સત્તા સંભાળનાર એઆઈએડીએમકેને ફક્ત 66 બેઠકો મળી હતી. એઆઈએડીએમકે સાથે જોડાણ કર્યા પછી, ભાજપે ચાર બેઠકો જીતી હતી.

આ પણ વાંચોઃ "ભેદભાવ છોડો, દરેકને પોતાના માનો...", હિન્દુ સંમેલનમાં સામાજિક એકતા પર સંઘ વડા મોહન ભાગવતનો સંદેશ

કેરળમાં યુડીએફ વિરુદ્ધ એલડીએફ ચૂંટણી યુદ્ધ

કેરળ વિધાનસભાનો વર્તમાન કાર્યકાળ 23 મે, 2026 ના સમાપ્ત થાય છે. કેરળમાં ચૂંટણી એપ્રિલ-મે 2026 માં યોજાવાની શક્યતા છે. કેરળમાં સતત બીજી વખત સત્તા મેળવનાર ડાબેરી મોરચાને પણ UDF તરફથી પડકારનો સામનો કરવો પડશે. જો પિનરાયી વિજયન કેરળમાં ત્રીજી વખત સફળ થાય છે, તો તે એક રેકોર્ડ હશે, પરંતુ જો તેઓ હારી જાય છે, તો ડાબેરીઓનો દેશમાંથી સફાયો થઈ જશે. તેથી ડાબેરીઓ સામે તેના છેલ્લા ગઢને બચાવવાનો પડકાર છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ