Israel Hamas War / 'જો ઈઝરાયલ ગાઝામાં બોમ્બમારો નહીં રોકે તો...', હમાસ સાથેની જંગ વચ્ચે ઇરાનની આડકતરી રીતે અમેરિકાને ધમકી

• ઇઝરાયેલ અને હમાસ વચ્ચે યુદ્ધ યથાવત 
• ઈરાને ફરી એકવાર અમેરિકાને ચેતવણી આપી
• ....આગથી અમેરિકા પણ બચશે નહીંઃ  હુસૈન અમીર

Iran Warns US: ઇઝરાયેલ અને હમાસ વચ્ચે યુદ્ધ શરૂ થયાને 20 દિવસથી વધુ સમય થઈ ગયો છે. યુદ્ધમાં બંને તરફથી ભારે તબાહી મચી ગઈ છે. દુનિયા બે જૂથોમાં વહેંચાઈ ગઈ છે. અમેરિકા ખુલ્લેઆમ આ જંગમાં હમાસ વિરુદ્ધ ઈઝરાયલનું સમર્થન કરી રહ્યું છે. આવી સ્થિતિમાં ઈરાને ફરી એકવાર અમેરિકાને ચેતવણી આપી છે. ઈરાનના વિદેશ મંત્રી હુસૈન અમીર અબ્દુલ્લહાનિયાએ કહ્યું છે કે જો ઈઝરાયેલી સરકાર ગાઝામાં પેલેસ્ટાઈનીઓના નરસંહારને ચાલુ રાખશે તો તેની આગથી અમેરિકા પણ બચશે નહીં. 

શાંતિ-સલામતી કામ કરવું જોઈએઃ ઈરાનના વિદેશ મંત્રી 
તેમણે કહ્યું કે, હું અમેરિકી સરકારને કહેવા માંગુ છું જે પેલેસ્ટાઈનમાં નરસંહારની દેખરેખ કરી રહી છે. અમે પ્રદેશમાં યુદ્ધ નથી ઈચ્છતા, પરંતુ જો ગાઝામાં નરસંહાર ચાલુ રહેશે તો અમેરિકા પણ આ આગથી બચશે નહીં. અમેરિકાએ શાંતિ અને સલામતી માટે કામ કરવું જોઈએ અને લોકોને યુદ્ધની આગમાં ન ફેંકવા જોઈએ.

'અમેરિકા જોઈ રહ્યું છે તમાશો'
તેમણે કહ્યું કે, ગાઝા પર હુમલો કરવા માટે રોકેટ, ટેન્ક અને બોમ્બ મોકલવાને બદલે અમેરિકાએ આ નરસંહારનું સમર્થન કરવાનું બંધ કરી દેવું જોઈએ. અમેરિકા ત્રણ અઠવાડિયા કરતા ઓછા સમયમાં 7000થી વધુ નાગરિકોની હત્યાનો તમાશો જોઈ રહ્યું છે. વ્હાઇટ હાઉસ ઇઝરાયેલ સરકારને આર્થિક અને રાજકીય રીતે સંપૂર્ણ સમર્થન આપી રહ્યું છે. ગુરુવારે સંયુક્ત રાષ્ટ્ર મહાસભાની વિશેષ બેઠક દરમિયાન  ઈરાનના વિદેશ મંત્રી હુસૈન અમીર અબ્દુલ્લહાનિયાએ આ નિવેદન આપ્યું હતું.

અમેરિકાએ આપી હતી ધમકી
તમને જણાવી દઈએ કે, આ યુદ્ધમાં ઈઝરાયલ વિરુદ્ધ નિવેદનબાજીને લઈને આ પહેલા અમેરિકાએ પણ ઈરાનને ધમકી આપી હતી. અમેરિકાના વિદેશ મંત્રી એન્ટની બ્લિંકને કડક શબ્દોમાં કહ્યું હતું કે, અમે ઈરાન સાથે યુદ્ધ નથી ઈચ્છતા, પરંતુ જો ઈરાન અથવા તેના પ્રતિનિધિઓ ક્યાંય પણ અમેરિકન કર્મચારીઓ પર હુમલો કરે છે તો અમને (અમેરિકા) અમારા લોકોની સુરક્ષા કેવી રીતે કરવી તે આવડે છે.

'અમેરિકા કોઈપણ પ્રકારનું યુદ્ધ વધારવા માંગતું નથી'
તેમણે કહ્યું હતું કે, અમે અમારી ચેનલો દ્વારા સતત ઈરાનના અધિકારીઓને કહી ચૂક્યા છીએ કે ઈરાનની સાથે અમેરિકા કોઈપણ પ્રકારનું યુદ્ધ વધારવા માંગતું નથી. પરંતુ જો ઈરાન કોઈ ભૂલ કરશે તો અમે અમારા લોકોની સુરક્ષા કરીશું.